En SICILIA – SYRACUSA se deskuvriyo una de las mas antiguas mikves de Europa… Era en el anyo 1999. Un lugar absolutamente sorprendente i muy misteryozo por diszir la verdad….

El mikve se topa en Ortygia en una estrecha peninsula en la parte la mas antigua de Syracusa, ande era el barrio judio antes medyo milenaryo. Konserva el nombre Giudecca ! Fue Amalia Daniele ke lo deskuvriyo pormodo de su natura muy kuryoza ! Su famiya es una de las mas viejas de Syracusa…..

Los lavoros estavan kuaji terminados kuando la Senora Daniele se rendyo kuento de una chika ventana ke se avriya a un chiko patio ande no se puediya entrar de dingun lugar ! Penso ke esto puediya ser la partida superior de una puerta ke aviyan kondanado. Demando a los lavorantes de derrokar la pared i vido ke no se aviya yerrado…. La Senora kijo saver mas i empesaron lavoros muncho mas karos fina ke vierron ke aviyan eskaleras kavakadas en la roka. Dospues de 10 anyos i aver vazyado unos 156 kamiones de tierra i rokas deskuvriyeron una eskalera de 56 eskalones ke yevava a una sala kon voutas de 6 metros al 6 metros i supportada kon kolumnas massif, enklavadas a 18 metros debasho del nivel del suelo.

Las sorprezas no aviyan terminado.

Embasho en la sala estavan kavakados 3 basinos kada uno de 1,5 metro de ondura i se topavan a 90 grados los unos de los otros, komo las ojas de los trefles. Aviyan eskalones para abashar fina los fondos de los basinos.

De la otra parte del koridor, aviyan dos otros basinos individuales ande estavan kavakados eskalones identikas.
Estos basinos eran alimentados por la agua ke yagava de une avyertura en la rokas.

La senora Daniele no teniya dinguna idea de a kualo estos basinos serviyan. Dospues de un tiempo se akodro ke su palasyo estava situado en el antiguo barrio judyo de Ortygia. Konsulto las famiyas judiyas de la lokaliltad. Estos no heziteeron del todo. Saviyan la repuesta ! Se tratava de un mikve ke era alimentado por las aguas abundantes de Ortygia.

Uvyeron munchos sientifikos, jurnalistos, personajes importantes i la senyora Daniele por seguro ke partisiparon a las diskusiones ke se programaron en la sala justo ensima de los basinos. Se pendsa ke son la ovra de los Byzantinos del VI en VII siglo. Kon esto se topo una eskritura en Latino en Catania ensima de la tomba de Aurélius Samohil i de su espoza muerta en esta izla a sus 23 anyos en el anyo 383.

Los judyos bivyeron en Sicilia mas de un milenaryo ! Todo termino en 1492,en la enkizisyon. porke Sicilia era una dominion de los Espanyoles, Asigun el Dekreto, los judyos puediyan solo konvertirsen o ir en egzilio.

Kon karinyo
sharope.blanco@gmail.com

LEAVE A REPLY

Please enter your comment!
Please enter your name here

Previous articleThe Biden administration has a Raisi problem
Next articleAdventures in Yiddishland. Postvernacular Language and Culture by Jeffrey Shandler

SHAROPE BLANCO lives in Istanbul (Turkey) Sharope Blanco, Economist and Language Teacher, Administrator and founder of the Yahoo’s group SEFARADI MUESTRO, where she writes and shares her poems, articles, memories and her novel ALMOND. She is also the author of countless poems and articles in English, French, Turkish and Djudeo-Espanyol. Her work will be published post-mortem according to her wish, by her son Nebil F. Behar, a doctor residing in England.