El humano eksperyensya un estado muy diferente de lo ke es akustumbrado en unas fazas de su egzistensya. Lo toka lo mas kuando es mansevo, tiene fuersas i es atraktivo… Es el mijor tiempo para tener kreaturas sanas i bien eklibradas… Es la natura ke lo empusha de manera irrezistivle a formar un couple ma supito siente komo si le aviya entrado al korason una flesha (egzaktamente komo si fuera Cupidon ke lo embiyariya… !) Es el dulse veneno del amor !
Namorarse es una “hazinura”, leshos de mozotros (!), un estado de anksietad provokado por unas substansas hormonalas i chemikalas ke alokesen el meoyo i el puerpo ! Una kombinasyon de reaksyones psikolojikas sin dingun sensyo ma ke son vedraderas i muy fuertes.
Es preferar una mujer o un hombre a los otros, sintirse kapache de todo por eya o el, una felisitad sin limitos, una admirasyon ineksplikavle, la nesesitad de estar enjuntos, avlarse i el kontakto fiziko, no seya solo ke tomar su mano en la suya, i izolarse del mundo por bivir este amor kon la amada/amado solamente, o kon si-mizmo en kavzo de absensya. Se korta la gana de komer i se siente komo pilishkos en el estomago, i en kavzos ekstremos, no pueder aunarse se termina por una melankoliya, una depresyon ke puede yevar final el suisidyo !
Oy en diya diriya ke estos sentimentos egzisten dayinda ma son manko fuertes si se komparan a los tiempos historikos seya porke las personas se izyeron mas materyalistas, ven el prezente i el futuro de manera mas objektivo, no egziste mas lo eskondido i lo defendido, las personas son mas edukadas i intelijentes, dan mas importansya a sus karyera, saven lo ke keren en la vida i sus primeras prioritades no es ser kazado i tener kreaturas, ademas en un mundo kon tanta insertitud i tanta insekuritad…
Al amor le plaze bolar ! Es instable… Relasyones aresentadas, bien vistas por el i por eya, ademas de sus entornos, todo ermozo i sin dingun problem NO le gustan… Se infasya ! Bushka siempre otros korasones para amargar sus egzistensya mizmo si no lo saven dayinda !….. Keda prezente si el couple bive sus sentimentos en sekreto, se eskonde, son los ijos de famiyas enemigas komo en el kavzo de Romeo i Julyet, son kazados kon otros (i esto afita malorozamente !) biven leshos el uno del otro i munchos otras razones ke no mankan para espartirlos ! En estos kavzos el amor fiesta, se enflorese, yega a dimensyones difisil de luchar.
Kuando se fuye el amor (sin muncho tadrar !) el couple no tendra mas dinguna
voluntad para kedar enjuntos… Sus ojos se les van a avrir i tendran ganas de fuyirsen deskolsos de sus prizyon i en vezes, mizmo si adoran sus kreaturas ! Tendran la hambre de gozar otra vez de sus LIBERTAD i de sus INDEPENDENSYA.
-Ke no me oygan mis amigos i mis amigitas kazadas…. Vidas largas i todo bueno ke tengan kon sus espozos i espozas.. Amen!-
Pensando, yegi a entender ke el amor es koza muncho mas barata i simple de lo ke me imajinava i ke munchos personas no lo saven dayinda , los mansevos lo mas, i azen un gameyo de una pulga. Yo tambien ! Grasyas al Di-o ke kon la technolojiya ke avanso tanto, se ve de manko en manko, o diremos ke se kura mas presto ! (El internet de una vanda aze sarpikar sinteyas i de otra vanda te detiene bien asentadika/ko en el lugar, leshos del peligro !)
Lo bueno en esto es ke kon la edad avansada, mizmo si ay unas eksepsyones, la produksyon de estos “venenos” aminguan i los sentimientos se stabilizan ! Mi madre diziya ke yo tengo un “korasoniko de enginara” (coeur d’artichaut) i es esto ke me iva detener en la manseves mizmo a una edad avansada ! Ayyy mi mamita medya-santa ! Ke vizyon !!!! Aki no se trata solo de esta manera de “amor” ma muncho mas ! El AMOR UNIVERSAL para las personas, los animales, las plantas i la natura…. Lo todo attado a UNA UNIKA ENTITAD, mi Amigo en los Sielos, ke adoro inkondisyonalmente, ke me ama, me kudya, me da la savor de bivir, ganas de riyir, fe en el prezente i en el futuro.. Tenemos SU Voluntad en mozotros, SU fuersa mos anima… Muestros alimentos tienen SU espirito porke komemos lo bivo ke kriyo ! Somos diferentes i limitados por muestra impureza fizika i mental.. Porke es ansina ke mos kijo i es esto ke deve de ser !
Kon todo esto, mizmo por un tiempo limitado, el amor es la mijor koza ke puede afitar a la persona ! Es sintir la vida i la egzistensya en sus mas altos niveles, un regalo de Di-o i una otra razon para reingrasyarLo por todo lo ke mos dyo i mos da…. Ke pekado ke komo kada otra koza, el humano tiene tendensya a ser egoisto i meter baryeras entre lo natural i sus intereses, sus selos, los faktos ke no le konvienen, su sadizmo i su mazohizmo.. No le konviene de akseptar ke el humano, el hombre komo la mujer son poligamos, ke azen partido de la natura egzaktamente komo los animales, komo eran kuando fueron kriados. El fakto es ke son muy raros los ke kedan sin ir kon otros tambien i mizmo si esto afita es pormodo de las frontieras psikologikas, la influensa muy fuerte de komo le lavaron el meoyo i fue edukado… I mizmo el espanto….
Todo lo ke dishe es unikamente mi fason de ver las kozas. Puedo no tener razon i yerrarme… Esto segura ke kada uno i una tiene su propria opinion sovre este tema tan profundo i tan popular. Siglos no abastaron para diskutir, eskrivir, pintar, kantar, baylar, skulptar el amor i sus kalejikas ! Lo ke kavzo tantos muertos, guerras, dezgrasyas, bueno, maldad, odyo i mas i mas en el mundo, en un mundo ande somos los envitados i savyendo ke desharemos muestro lugar a las muevas generasyones.
Kon karinyo,
sharope.blanco@gmail.com