Skorpios, la izla de Aristotle Onasis ke heredo su inyeta Athina i ke fue merkada en 2013 por la ija de Dimitri Rybolovlev, un hombre de negosios de los mas rikos del mundo. Su ija Ekaterina, amazona de grande fama komo Athina, fiesto su kumpleanyos de 25 anyos en la izla kon un parti formidable de piratos i se va kazar aya, oy, en la intimitad, kon su novyo Juan Sartori de 34 anyos, hombre de negosyos konosido tambien i orijinaryo del Uruguay,
UNA MALDISYON DE TRES JENERAYONES KE AHARVA TAMBIEN UNA ERMOZA MUJER DE 32 ANYOS…
Ke vidas… Tanta rikeza i tanto bueno para eksperyensar la muerte, la soledad, la trahizon, las espartisyones, los tribunales….
Peryo su madre kuando teniya solo 3 anyos…Peryer una madre es peryer todo a esta edad. Ademas kuando no tuvo otro remedyo ke de ser engrandesida por su padre Thierry Roussel, el kuatren marido de Christina Onassis i su madrasta Gaby (Marianne), un model sueduaza, kon sus tres medyo ermanos.
Ni se akodra de su madre ke era alkoolika i uzava drogas… Muerta en el banyo de unos amigos en Argentina a la edad de 37 anyos… Christina la ija adorada de su rikinyon de padre, ke nunka enkuentro el amor…. Malgrado un primer matrimonyo kon Joseph Bolker, 27 anyos mas grande de eya i ke ya teniya kuatro kreaturas i sin el konsentimiento de su padre…. Kedo kazada mezes solo… Su segundo kazamiento fue kon la rekomendasyon de su padre kon Alex Andreadis, un armator i banker en 1975, data de la muerte de Onassis. I este kazamiento no duro mas de 14 mezes. Entremientes Christina se enkargo de la administrasyon de los echos de su padre i reusho en todo lo ke izo. El treser kazamiento ke duro un anyo solo fue kon un Ruso Sergei Kauzov en 1978. Su kuatren i d’alkavo matrimonio era kon Thierry Roussel, un businessman Fransez i duro 3 anyos. Christina izo todo para este hombre ke tanto amo ma ke el no amava… Siempre la enganyo kon Gaby de la kuala tuvo 3 ijos…..Kedo kazada kon el malgrado ke estava al koryente ke la namorada de su marida estava prenyada. Paryeron Gaby en primero i Christina 6 mezes dospues… Kuando Gaby kedo prinyada otra una vez divorsyaron en fin. Russel se aviya enrikesido i Christina kuaji aviya peryido el meoyo enterrada en su depresyon, las kuras i el alkol ke tomava… La sola koza ke le kedo de este matrimonio fue su ija Athina ke yeva el nombre de la madre de Christina , Tina (Athina Livanos ke se kazo kon el grande armator Niarchos, dospues de su divorsyo kon Onassis ke, el, se kazo kon Jackie Kennedy). Se aviya jurado ke su ija no sufreriya todo lo ke eya mizmo aviya sufrido ma no lo logro…
Los problemes i los sufrimientos de Christina aviyan empesado kon el divorsyo de sus paryentes en 1960 pormodo de la soprano Maria Callas, el matrimonyo de su padre kon la bivda del Prezidente Kennedy, la muerte de su uniko ermano Alexander en Athenas en 1973 a la edad de 24 anyos i ke era el Prezidente de la kompanyia aeriyana de su padre, el Olympic Airlines. La muerte de su madre kerida Tina, kazada kon Stavros Niarchos en 1971 i ke aviya fayasido pormodo de las drogas eksesivas ke tomava… Las hazinuras de su padre dospues de la muerte de su ermano fina su muerte en 1975… A parte de todo esto Christina tuvo siempre ke kombatir su pezgo… Peryiya munchos kilos kon dietas muy seryozas para tomar atras todo lo ke aviya peryido kon su demaziya….Otra i otra vez….
Thierry Russel….Su padre ! Un hombre ke le interesava solo los bienes de su mujer, Christina en primero i dospues, de su ija Athina, unika heredera de la fortuna de su nono Aristotle Onasis, el famozo patron de la flota de naves de petrol, de kompanyia aeryana, de la izla privada Skorpios, el yerno del grande armator Livanos, duenyo de palasyos en todos los lugares, del mas grande yacht del mundo, “Christina”, el amante de la fabuloza soprano Maria Callas i dospues, el marido de Jacky Kennedy kuando assasinaron su marido, el Prezidente de los Estados Unidos, una fortuna de biliones de Dolares…
Athina sufriyo la peryitad de todos los suyos de la parte de su madre… De un padre kon el kual se arrasto en los tribunales i le kosto una fortuna. Tuvo un grave aksidente en uno de los saltos de un konkurso de kavayos. Se firyo la kolumna vertebral i no puido assistir a los konkursos durante un anyo. Lo muy triste para eya fue ke tuvyeron de abatir su kerido kavayo.
Nasyo el 29 de Enero 1985 en Fransya. Se kazo en 2005 kon Alvaro de Miranda Neto, un Brazilyano ke komo eya partisipa a los konkursos de saltos por kavayos. Es 12 anyos mas grande de eya i tiene una ija Viviane. Los dos son muy famozos en las kompetisyones internasyonalas. No tyenen kreaturas. Tiene una passion por los kavayos i es patrona de munchos kavayos de kompetisyon.
Athina se topa en un grande dilema i esta para tomar grandes desizyones en su vida. Al igual de su padre, se enterro ke su marido de 11 anyos la enganya i su ekipo de sekuritad le reporto ke lo deskuvrieron en la kama kon otra mujer en sus proprietad de 2 Miliones de Dolares en Wellington Florida. Las aventuras de Doda (Alvaro) kon munchas mujeres no kedaron de ser kontados en los serklos ekestros de Wellington….
Athina arekojo sus validjas i tomo el vuolo para la Belgika ande tiene una morada. Al empesijo los reprezentantes de Doda insistyeron ke no ay dingun problem en el matrimonio ma se viene de aklarar ke Doda i Athina se espartyeron. Doda en su interview en una revista Braziliana disho ke no esta pronto a peryer el amor de su vida. Save ke no va ser fasil ma ke tiene la intensyon de luchar fina la fin. (Oy ya estan divorsyados)
Agora no se save si Doda va reushir a ganar de muevo la konfiensya de Athina. Sus amigos dizen ke no kale ekivokarse i ke esta muy determinado. Parese ke tiene la karizma de su esuegro ke su suegra aviya kovyerto de dinero i de regalos, muncho mas de lo ke estava eskrito en el akuerdo del divorsyo, i mizmo si aviya deshado su mujer por otra….
La prima de Athina, Marilena Patronikola konta ke Athina no asemeja a su madre del todo i ke va reaksyonar de manera muy diferente. Dize ke es dura i tiene muncho de su tiyo Aristo en eya.
Muy probablamente el echo del divorsyo de Doda i de Athina se va kayar lo mas posivle para no danyar la vida privada de los interesados. Los avokados van a guadrar el silensyo i tratar de solusyonar el divorsyo lo mas presto i en sekreto si se puede…
Kuando Christina se muryo en 1988 en Buenos Aires, Athina estava kudyada por una nanny en su morada en Suissa. El puerpo de Christina se trusho a Athena por los funeralyos i de aya, se transfero a Skorpios, la izla privada, erensya de Aristo Onassis ande se izo una seremoniya de enterrimiento privado. Roussel estava prezente en la izla por su ex-mujer. Dospues se fue a tomar su ija de tres anyos para bivir kon el, su mujer Sueduaza i sus kreaturas. Se installaron en Suissa no leshos de Lausanne. Moravan en una villa de 5 kamaretas i Athina i sus ermanos ivan a una eskola publika. Gaby dyo a las kreaturas el amor de la natura i de los animales. Es puedeser por esto ke mas tadre Athina developo una passion tan grande para los kavayos. Gaby i Thierry se kazaron en 1990 kon las kreaturas a sus derredor.
La fortuna de Athina, estimada a 500 Milyones de Dolares, dospues de los 26 Milyones de Dollares pagados a Jacqueline Onassis i el 45 % de la erensya dada a la fundasyon ke Onasis kreo al nombre de Alexander Onassis, fue administrada por 4 hombres de finansas Gregos administradores tambien de esta fundasyon. Aviya tambien un sinken Direktor ke administrava el dinero de Athina… Su padre, Thierry Russel. Probablamente Christina tuvo un negro presentimiento porke eskrivyo al Prezidente de la Fundasyon, Stelios Papadimitriou : “El echo de los protektores es de bien serrar las puertas de mi fortuna, porke saven muy bien, kuanto flaka so por este hombre i dunke el puedra siempre abuzar de mi ”
Malgrado ke Athina estava arresivyendo un revenido modesto, Roussel estava demandando figuras astronomikas para su ija. (Unos 150 Milyon Dolares por 11 Anyos). Un diya Roussel trusho Athina al Tribunal en Suissa para ke deklare sovre un dokumento ke “no suporta nada de todo lo ke es Grego mizmo si su madre, su nono eran Gregos i su fortuna viene de Gresya !”
Este esfuerso de Russel era para tener el derecho de guadrar su ija malgrado ke aviya sinyado ke akseptava el dezeyo de su ex-mujer ke enkomendava ke su ija se iva engrandeser en la relijyon Ortodoksa i se ambezariya de avlar perfektamente la lingua Grega. (Oy Athina save Inglez, Fransez, la lingua Sueduaza, el Portuguez ma no el Grego) Roussel estava siempre peleyandose kon las “barvas-grizas” komo la prensa nombra los Direktores de la Fundasyon. Los akuza de komplotar kontra Athina. Eyos, lo akuzan de izolarla i tenerla leshos de sus raises Gregas. En 1999 el konflikto fue tan grande ke el Tribunal Suisso se enkargo de la administrasyon de la fortuna de Athina, sin ke Roussel o los “protektores” tengan sus opinion sovre ke azer o no azer i enkargo una Sosyetad de Finansas para okuparse de este echo. Athina teniya 14 anyos.
Dospues de 4 anyos Athina desho la kaza de su padre i paso a bivir en su morada de Bruksel. Renovelo su pasaporto Grego ke su madre aviya logrado para eya, desho la eskola i empeso kon su proseso kontra su padre ke la aviya konvensido de sinyar una Autorizasyon de Poder.
Athina se passiono de mas en mas para los kavayos. Entro a una eskola ekestra a sus 17 anyos en Belgika, las Haras de Ligny, administrada por Nelson Pessoa, un caballero Olympico Braziliano.
Una de las primeras kozas ke Pessoa izo fue de prezentarla a un otro studente, Alvaro de Miranda Neto. El alto i bello atleta, el ijo de un administrador de un compagnia de seguritad en Sao Paulo ke aviya ganado medalyas de bronza en los Juegos Olympikos de 1996 i de 2000.
El amor intenso los abrazo malgrado ke Doda teniya una ijika, Viviane de 2 anyos kon Cibele Dorsa, su amigita de muncho tiempo. La madre de la kreaturika, un model i aktrisa, viniya justo de partir de Bruksel por un program a la televizion en Brazil. El 29 de Enero 2003, Athina entro en sus 18 anyos, dospues de unos kuantos mezes de aver enkontrado Doda. Viajaron kon el al Brazil para enkuentrar sus paryentes. Merko un duplex de 1000 metro2 kon un espasyo para 15 koches en el mijor entorno de Sao Paulo ke le kosto 5 Milyones de Dolares. Merko tambien una vaka, Esperansa, ke kosto 320,000 Dolares por la hasyenda de Doda. (Athina no es gastadera para su vistimienta o sus joyas ma pronta para pagar kada presyo por los mijores kavayos i ganado (cattle).
Entremientes, Cibele kon su korason rompido deklaro : “Doda me desho por la fortuna de Athina. Siempre me disho ke la topava godra i feya…)
Roussel siempre se aviya oppozado a la romansa de Athina kon Doda lo ke no enderechava en nada sus relasyones kon su ija. En 2004 Athina empeso las formalitades para tener todo el poder sovre su fortuna. Russel aviya eskondido una partida. Se pensava ke iva aver una larga batalya entre el padre i la ija i ke esta seriya konosida por todos, un poko komo la batalya ke Russel aviya tenido kon los “protektores” de la Fundasyon, ma a la fin del anyo, se deklaro ke un kontrato se aviya sinyado i todo los bienes se aviyan transferado al nombre de Athina a la eksepsyon de 100 Milyones de Dolares.
En el mizmo enverano, antes ke empesen los Juegos Olympikos en Athena, Athina i Doda se fueron a Gresya. Nicolas Paraschis, el Prezidente de la Federasyon Hellenika Ekestra disho ke eya estava konvensyendo su novyo de partisipar por el ekipo Grego. Ma malgrado toda su fortuna i los ke konose, no puido lograr ke Doda resivga la nasyonalitad Grega i es por esto ke no puido ser inkorporado en el ekipo de Gresya. Athina demando a una paryente suya de dizir ke eya i Doda biven kon eya ma la prima no puido konvenser el Ministro del Governo Grego. Fue la d’alkavo vez ke oyo de Athina.
Doda i Athina tomaron la desizyon de espozarsen en 2004. El primer ke lo supo fue Konstantinos Kotronakis, el Konsul Honoraryo Grego de Recife en Brazil al ken demandaron de ser el padrino. Se kazaron en Desembre del anyo siguiente en una eglisya konstruida espesyalmente en el terreno mizmo de la Fundasyon Maria Luisa i Oscar Americano. Mil invitados arresivyeron kartas magnetikas kon laskualas se puediyan entrar por las entradas altamente sekurizadas. Plakas de plastik se aviyan enkolgado afuera, al deredor de las partidas avyertas de la proprietad. Aviyan muy munchos jurnalistos ke keriyan tomar fotografiyas ma pormodo de las plakas no lograron a travarlas.
Athina vistiya un fostan de seda sinyado Valentino de 70.000 Dolares. Uvyeron dos seremoniyas. La primera una Misa Katolika i la segunda una Orthodoxa Grega. Rodrigo Pessoa, el ijo del instruktor de Athina, Nelson Pessoa era el padrino por la seremonia Katolika i Kotronakis era el “kumbaros” el padrino por la seremonia Orthodoxa Grega. Ricardo Miranda, el padre del novyo fue el ke konduizo la novya en la iglesya al lado del novyo. Athina no yoro ma Doda yoro….
El skandalo entre los invitados fue ke el padre de Athina i su madrasta no se topavan en la boda. Kotronakis konfirma ke no fueron envitados ma ke los medyo ermanos Erik – 20 anyos- Sandrine -18- i Johanna -14- estavan prezentes. La prensa eskrivyo ke solo Sandrine estava aya. Athina i Doda se dyeron regalos de grande valor…Eya le regalo un kavayo champion de grande linaje i Doda sinyo un dokumento de antes-kazamiento, ma no se save nada del kontenido.
Los muevos kazados baylaron kon una orkestra de 40 personas ke jugo Bossa-Nova fina la ameneser. Los invitados konsumaron 1000 boteyas de Champagne Veuve Clicquot asigun una revista lokal. Dospues del kazamiento, Athina troko su nombre a Athina Onassis de Miranda, no mensyonando el Roussel. Engajo un profesor de lingua Grega para ke venga a su kaza en Sao Paulo munchas vezes a la semana. Marido i mujer teniyan una vida kalma, sin partis i salyendo muy poko de noche. De diya, al kontraryo se antrenavan i en sus tiempos libres, se ivan a partisipar a los konkursos internasyonales al deredor del mundo entero kon sus kavayos.
Antes del kazamiento Athina se aviya registrado a Avlona, un club Ekestro en Athena. Parachis dize “Athina aze partido de la Federasyon Ekestra Hellenika. Partisipa sovre todo a las kompetisyones de Europa en el Longines Global Champions Tour i siempre basho de la bandyera Grega ”
En 2006 Athina i Doda empesan a partisipar en el Global Champions Tour, una mueva seriya de evenimientos ekestros kon 15 roundes de kompetisyon en diferentes lokasyones del mundo. Los mijores vienen. Los premios son grandes montantes de dinero. En 2007 Athina i Doda establesyeron en Fransya el Athina Onassis Show Internasyonal de Kavayos. Se aze kada anyo i el d’alkavo era en Saint-Tropez en Junyo.
Al empesijo, marido i mujer siempre partisipavan enjuntos a los eventos, ma des de ke la infidelitad de Doda se izo publiko Athina se va sola i sin su aliansya a su dedo. Sus reushitades en las kompetisyones no son mas al mizmo nivel ke eran. Athina era la 13 en el mundo en 2014. En 2016 se izo la 88 … Doda era el 24 en 2014 i el 74 en 2016.
Al ———–empesijo de sus kazamiento vino a morar kon eyos la ija de Doda, Viviane ke teniya 5 anyos alora. Dospues, 4 anyos mas tadre, se adjunto Fernando de 13 anyos, el ijo de Cibele Dorsa, de un primer kazamiento. La madre de las kreaturas les demando de okuparse de eyos porke eya estava luchando kon drogas i hazinuras mentalas.
En sus kaza en Sao Paulo i en sus villa en los entornos de Antwerp, marido i mujer biven trankilamente kon las lisyones de ekitasyon, el futbol i las noches mirando filmos a la televizyon. Athina presizo a la revista l’Eperon ke la vida en la sosyetad nunka la attiro. Disho ke kada uno bive de la manera ke le gusta i ke a eya le gusta bivir la vida de kaza i kon kalmo.
Una terrivle trajediya aharva sus puertas en 2007 kuando estavan eyos i las kreaturas en Belgika. Cibele de 36 anyos se echo abasho de la ventana del sieten pizo en su apartamento de Sao Paulo. En su message a la revista Braziliana i en su kuento del Twitter eskriviya : “Ke el Di-o te perdone por lo ke me izites i kontinuas a azerme, a azer a Athina i a azer a las kreaturas”. Era la primera de la seriya de las katastrofas ke Athina i Doda deviyan eksperiyensar…. La maldisyon de los Onassis ke kontinuava muevamente kon la fin de sus matrimonio….
Un anyo dospues de la muerte de Cibele, Athina kaye de su kavayo i se rompe dos vertebras. No puede partisipar a dinguna kompetisyon munchos mezes…En 2014, dospues de un anyo i medyo ke Athina torna a los rings su muy kerido kavayo AD Camille Z no logra a saltar i kaye… Atina estava en el konkurso del Grand Prix del Credit Suisse en Geneva kuando su kavayo grizo de 11 anyos se kaye i se le rompe una pierna. Les toma 45 minutos para trankilizar el povre kavayo kevrandose de dolor. Lo transportan al veterinar. Athina sanglota sin kedar kuando le dizen ke deven abatir el kavayo. Su tristesa no tiene limitos…..
Athina se retira de las kompetisyones por un tiempo… Pasa lo mas de su tiempo en Wellington, una luxuoza proprietad en el Sud de Florida ande la sosyetad ekestra se assembla en invyerno fina tadre en la primavera. Merka una kaza de kuatro kamaretas en Wellington serka del club de Polo i del Country Club de Palm Beach. Da unos 12 Milyones de Dolares por establos para 20 kavayos, grande de 5.6 acres (22.663 m2) ke inkluye un ring para todas las temporadas i morada para los caballerizos (seyis – palefrenier) etc. Su mueva rezidensya permete entrada direkta a los establos i a la komunitad ekestra. Malhorozamente es el lugar-mizmo ande Doda tiene relasyones intimas parese kon una de sus amigas….
Kualo rezerva el futuro para esta mujer ke todos pensan ke deve de ser la mas horoza del mundo ? Ke se va someter al karizma de su marido, lo va perdonar i tornar a sus brasos komo su madre lo izo por el padre de Athina antes dekadas ?
Va kortar por entero kon el i va enfrentar su destino indo sola en su kamino ?
Los ke la konosen de serka komo Konstantinos Kotronakis, su padrino, dizen ke tiene el karakter de su nono Aristotle, un refujiado de las degrasyas de Smyrna ke empeso sin grosh en su aldikera i fragua un emperyo de naves en siendo mas intelijente de todos los otros…. “Athina es rezervada i pensa bien ken es el de enfrente antes de avlar… Es muy muy intelijente, ve klaro, es korajoza i tiene fuersa. Dingunos desidan para eya…. Dingunos la pueden yevar ande keren… Es eya sola ke va ande kere ir. ”
Esta opinion es kompartida kon los jurnalistos Gregos ke aklaran ke Athina entezo todos sus kuentos juntos kon Doda en las bankas i ke se toparon en una reunion sekreta kon sus avokados en el Tribunal de Bruksel el 16 de Junio. Gente serkanos de Doda dizen ke reklama la mitad de la fortuna de Athina, lo ke reprezenta unos 500 Milyones de Dolares ma ke va akseptar solo 100 Milyones de Dolares para el divorsyo, bazandose sovre el papel ke sinyo antes-kazamiento i ande esta eskrito 1 Milyon de Dolar por kada anyo de kazamiento ! Durante la reunion ni Athina ni Doda se avlaron del todo.
En los primeros diyas de Augusto Athina empeso kon las proseduras legalas. El New York Post reporto ke tomo el vuelo para la Belgika i se enkuentro kon el mas grande avokado para los divorsyos, Robert Stephan Cohen. El mizmo avokado ke logro el divorsyo de sus famozos klientes komo Ivana Trump, Marla Maples, Uma Thurman i Christie Brinkley. Town&Country reporta ke es este avokado ke va tomar la palavra por Athina Onassis.
Robert Harlan Moses, un grande avokado de Manhattan i ke tuvo el tambien klientes no manko poderozos dize ke si se va tratar de un divorsyo, por seguro ke los bienes del marido i de la mujer tiendran un rolo de los mas importantes. Todo va depender de la egzistensya del dokumento antes-kazamiento i ande se va juzgar este kavzo. “En munchos lugares el dinero, erensya de antes del kazamiento, keda kon el eredor ma en siertos sityos i payizes el dinero eredado aze partido de los bienes komun i se komparte de manera igual. De la mizma manera se va meter en la meza kada revenido del dinero de la erensya durante el kazamiento i todo lo ke se sinyo para los kuentos i los echos ke se izyeron en komun” dize Moses.
Un otro faktor es lo privado. Lo mas de las personas no akseptan ke sus vida privada seya a la konosensya de todos en la media. “Ma en kavzos en loskualos uno detyene lo mas de los bienes, kedarse kayado puede ser por el konjunto ke se siente desmunido un razon para diskutir i negosyar !”
La espartisyon de Athina i de Doda tiene konsekuensyas en los kampos ekestros tambien. En la kompetisyon Olympiko de Augusto, Doda lucho por la bandyera Brazilyana. (Fue elsinken en el ekipo Brezilyano i el mueven individualmente)
Atina estava en Valkenswaard – Hollanda luchando por Gresya en el dodjen pye de la temporada de los Championes Global. Doda estava kon su kavayo preferido Cornetto K, en Rio i teniya el plano de montar su amado kavayo maron oskuro de 10 anyos otra vez, por los Finales de las Nasyones en Barcelona en Septembre. Kon esto, kuando yego a los establos en Belgika, deskuvriyo ke no va pueder montar – ni mizmo ver – el kavayo ! Es el Tribunal Belgikano ke va juzgar ken es i ken sera el duenyo del illustre animal.
El fakto de deshar Doda sin dingun akseso a su fortuna i mizmo a su kerido kavayo, es un egzemplo por la rapides kon kuala Athina puede meter baryeras invinsiblas entre eya i los ke la trahizonan i la dezilluzyonan… La lucha en los tribunales entre los avokados de los dos partidos va ser larga i dura ma malgrado ke los amigos intimos de Doda insiten ke el va azer todo para ganarla atras, los aparejos sin echar paso atras de Athina prometen ke no va ser tan fasil de konverserla i no va ser flaka delantre del hombre ke ama komo su madre amo a su padre.
La maldisyon de las tres jenerasyones de la famiya Onassis i de su fortuna kolosal es konosida de la parte de Athina. Kuando teniya 13 anyos, aviya dicho “Si kemo toda mi dinero, no vo tener mas problemes “. Ma su fuersa, su determinasyon i su buen sensyo aviya kortado su padre i agora este marido infidel…. No parese ke va ser vulnerable mas… No tiene desendyentes… Sera sola para arastar kon eya la malediksyon de los Onassis…. Sus amigos i sus paryentes rogan para ke tenga el poder de rezistir a lo ke le mostrara el futuro. Para ke pueda destruyir los emones ke desekilibraron su famiya tanto tiempo.
El Di-o ke no mos trayga maldisyones i horas pretas…. Es muy muy duro de pueder suportor muertes antes la hora, dolyos de los keridos, el korason rompido, trahizones de las personas ke nunka pueden ser sospechadas, aksidentes ke deshan las personas sin remedyo, famiyas derrokadas, reversos de fortuna ke kavzan ke la gente keden sin nada. ambiertos i dezesperados….. Leshossss !
Kon karinyo