Lo ke este diya mos trusho  !!!!   Oyyyyyyyyyyve !

Me akodro de mis tiempos en las kayes kon mi Nelbi (Renaud 5 era) mitad charpeyada (tresera mano i viejizika) ke dospues se izo la reyna de los kaminos porke le vazyi trezoros de Ali Baba ensima de eya !!!

Kavesa de Sharope !  Puediya merkar una otomobil mueva ma, mira tu ke yo keriya bien a esta atavanada de oto ! – Deviya ser yo mas atavanada de eya por seguro !- Kuryozo !  Kuando no aviya mas de gastar sovre eya i asemejava a una halis (verdadera)  prinsesa, la vendi i dospues  (me vino mi meoyo en si !)   merki una mueva, briyando i ke se iva de suyo kuando keriya ke se vayga…. Inkreivle ! Era tan perfekta mi Subaru ke no tomava el plazer ke me dava Nelbi…

Me aviya auzada a sus kaprichios, sus hazinuras, doktor i hospital siempre, chirurgia plastika, kazas de Alta Moda, kozmetika i massages a su puerpo, sauna para la hanum … Sin fin !  Ma… Ahhhhhhhh era ermoza ! Djilveliya…. Ke ojos ke teniya…. Me kitava la almika !

I los versos ke kijyeron ser una poeziya !
Todo lo ke vino a me kavesa i a mi pluma !
Para riyir si es  ?  No lo se !
Asigun mi humor
Mi ravya i mi amor…

Ma de muevo ?   Ke seya………

 

 

BAYLA SHAROPIKA KON ALEGRIYA….

Esto es la lokura del amor….
Sin sensyo, es alegriya i dolor,
En mizmo tiempo yelor i kayntor !
Kuando unos dizen ke saven lo ke es
Se yerran.. No lo saveran ni en la viejes !
Porke l’amor troka i se aserka a la roves !

I dospues de estos versos,
Frutas i yervas komen los aznos
Se peleyan i se pelan los primos
Porke moshkas bolan en los techos
En el lugar mizmo de los pasharos
Ke se los komen gatos ambiyertos !

Ken mos disho ke la aguela bola ?
No es eya ma la ija de la bulisa !
Ken era ? la ermana de Roza la tinyoza ?
La ke moz vendiya biskochos i borekas ?

Bayla Sharopika kon las flores koloradas

Salta a las aguas de los rios kon espumas.

Las ardillas se eskonden a mi vinida

Los zoros gritan kuando jugan en la guerta

La gente fuyen deskalsos si Moshe s’aserka

Ay este Moshe ! Ke tu kavesa se rompa Moshe !

Yegaron las keshas fina la loka de tu madre !

El bekchi te embiyara al burako para siempre !

El gayo riye i riye el borracho de la mahale
Ken los pilishko ? El uno abasha el otro asuve
El uno mira al vaziyo, atontesdido se kaya i oye
El otro aspera, s’araska, s’asenta i gole el ayre,
Bayla Sharopika kon las florizikas amariyas..
Inche del pozo los kuvos kon las aguas freskas !

Van ande se topan las yervas los kodrerikos
El vedre los yama, el sol arekaynte sus chikos
Madre, kuando va vinir el ke lavora los kampos ?
Mi fistan lo enkolgi i eskapi de brodar la rida.
Bayla Sharopika kon las kucharas de tavla
El pandero no esta. Bolta Sharopika bola.. bola !

Hora de baylar kon mi el bayle de las kucharas

bayle folkloriko de la Anatolia central

sharope.blanco@gmail.com

LEAVE A REPLY

Please enter your comment!
Please enter your name here

Previous articleParashat Eikev עֵקֶב
Next articleNetanyahu offers plan to address Druze concerns over nation-state law

SHAROPE BLANCO lives in Istanbul (Turkey) Sharope Blanco, Economist and Language Teacher, Administrator and founder of the Yahoo’s group SEFARADI MUESTRO, where she writes and shares her poems, articles, memories and her novel ALMOND. She is also the author of countless poems and articles in English, French, Turkish and Djudeo-Espanyol. Her work will be published post-mortem according to her wish, by her son Nebil F. Behar, a doctor residing in England.