Keridos Amigos i mis Amigitas

Buenos diyas !

Vos auguro una demanyanada klara i ermoza en este diya de Mierkoles, el 12 de Decembre 2018. Estan las 6.oo de la demanyana i dayinda no amanesyo. Las luvyas empesaron i el tiempo esta klaramente muncho mas yelado de antes una semana, al kontraryo de la hemisfera del Sud ande muestros amigos del Sud de Amerika i de Australia ya estan en enverano.

Yo penso ke todas las sezones tienen sus ermozuras, sus atraksyon, basta ke tengamos la alegriya de bivir i ke topemos la falesitad en muestro korason-mizmo. Penso ke tenemos el mazal de bivir las kuatro sezones del anyo porke en syertos lugares de la Tierra no tienen este privilegio….

Oy vos kere avlar de EDIRNE en TRAKYA (Thrace), una sivdad en el Nord-Este de la Turkiya a la frontiera de BULGARIA i de GRESYA i ke fue durante 88 anyos la kapital del Emperyo Ottomano, fina la konkista de Istanbul (Konstantiniye) en 1453. Se trata de la ermoza sivdad ke se yamava ADRIANOPOLIS en los tiempos ke Istanbul se yamava KONSTANTINOPOLIS i Izmir era SMYRNA. Era de los Bulgaros i fue konkistada en 1363 por el Sultan Otomano Murat II.
Oy es la kapital de la provinsya de EDIRNE en Trakya, la grande peninsula de los Balkanes (Europa) antes de yegar a Anatolia ke aze partido de Asya. Estos dos kontinentes se separan en Turkiya por el Bosphorus en Istanbul i el estrecho de Canakkale (Dardanelles) entre las mares AEGEE i MARMARA.

Durante su egzilyo en el Emperyo Ottomano el Rey de la Suede, Charles XII kedo el anyo entero de 1713 en esta sivdad.

El fundador de la relijyon BAHAI bivyo en Edirne en 1863-1868. Eskrive ke es una sivdad de misteryos. Fue egzilado a Akko.

En 1905 un grande fuego konsumo kuaji la sivdad. Biviyan en Edirne 30.000 Turkos, 22.000 gregos, 12.000 Judyos, 10.000 Bulgaros, 4.000 Ermenis i otros 2.000 sivdadinos de diferentes puevlos, en todo 80.000 personas. Oy en diya unos 400.000 habitantes biven en Edirne. Es un sentro de komersyo de textiles de lana, de seda, de tapetes i de produktos agrikoles.

ARTE I KULTURA EN EDIRNE
Munchos Hanes (fondas, hosteles para las karavanes de al tiempo), mezkitas, merkados fueron fraguados en esta sivdad ke servyo de
Kapital para el Emperyo Otomano. Se pueden vijitar los kompleksos (kulliye) de Beyazit II i de la MEZKITA SELIMIYE. Estos kontienen un Medrese (Universita de al tiempo), biblioteka, hospital, salas para dar a komer a los povres, fuentes. Se fraguavan al lado mizmo de las mezkitas.

LA MEZKITA SELIMIYE
Se puede dizir ke es la mas grande ovra architektural de Turkiya, konstruida por el mas grande architekto de la historia Turka Mimar Sinan en 1569. La eskapo en 6 anyos….INKLUIDO el komplexo. El UNESCO lo aksepto komo erensya de la humanitad en 2011. Tiene 4 minarets kada uno kon tres balkones al deredor

EL MUEVO PALASYO IMPERYAL
Yeni Saray – es el palasyo ande biviyan los Sultanes Otomanos al Ouest del Rio Tundja- era el mas grande palasyo dospues del palasyo de Topkapi en Istanbul. Se uzo fina el siglo 19. Se metyo fuego al palasyo para ke no kayga en mano de los Rusos en la guerra de 1877-78 entre el Sultan Abdulhamid II i el Tsar de Rusya Alexander II.

Malhorazamente kayo en ruinas i solo una chika fragua kedo de esta grande ovra. Se topa a las afueras de la sivdad i se espandiya sovre 3 milyones de metros kuadrados kon sus guertas, sus boskes para kazar i varios edifisyos. Oy en diya es el grande kampo ande se azen las luchas tradisyonales del KIRKPINAR.

La entrada i las kozinas fueron renovadas. Los lavoros se terminaron en 2013. Se estan renovando tambien Los Banyos Turkos del KUM KASRI, El KASTILYO DE LA JUSTISYA ke aze parte del komplexo. Kedo intakto i se topa al lado del chiko PUENTE DE FATIH ke kruza el rio Tundja.

Otra ovra de architektura es el KOMPLEXO BEYAZIT II de la Universitad de Trakya . El MUZE DE LA SALUD kon munchas annexas ke se uzavan en akeyos tiempos aze partido de este komplexo.

EL SOLDADO SIN NOMBRE es un monumento ke reprezenta el soldado Otomano a la entrada del SIMETARYO en memorya de los ke kayeron en las guerras de los Balkanes i se topa serka del Palasyo de Edirne.

La GRANDE SINAGOGA se topa al interyor de la FORTERESA. Es la mas grande sinagoga en Turkiya i la tresera mas grande en Europa. Se restoro durante 5 anyos i se avriyo de muevo dospues de 41 anyo, por la boda de la ija de la d’alkavo novya ke se kazo en la sinagoga de Edirne.

Se topan tambien dentro la forteresa La IGLESYA KATOLIKA de los Italyanos, la IGLESYA SVETI GEORGI de los Bulgaros en Kiyik i la IGLESYA SVETI KONSTANTIN-ELENA de los Bulgaros en Kirishane.

Edirne tiene tres grandes merkados kuvyertos : SELIMIYE, BEDESTEN i ALIPASA ke son verdaderos kuevas de Ali Baba….. Se topa de todo i son immensos.

Edirne era un sentro renomado por sus lavoros de fayansas i de seramika. Se topan en munchos edifisyos i el palasyo era dekorado kon estas. Oy en diya se lavoran los produktos de madera i estos muebles se pintan. Pintores desinan flores, munchos se okupan de agrikultura i ay artistos ke lavoran el marbro para los simetaryos. El artizanato de las eskova kontinua fina oy en diya. Los sabones perfumados son muy en vista tambien.

KIRKPINAR -Oil wrestling-

Edirne es konosido lo mas por los tradisyonales festivales de los luchadores ke vienen de todo el payis para ganar la famoza sintura de oro del championato. Se visten un pantalon de kuero a tres kuartos de largura, i se kovren de azeyte todo el puerpo inkluido el pantalon. Son los Agas ke arresiven la gente i los espektatores. Les prokura kamaretas en los hoteles, organiza festivitades i pransos. Es el ke da a kada uno de los ganadores los premios. Antes del final del Kirkpinar se vota por ken sera el AGA el anyo siguiente. Los etranjeros no pueden partisipar a las luchas. Ma munchos vienen komo espektatores. Timpanos -davul- i karamillos -zurna-
akompanyan las luchas….

*
Los judyos fueron trayidos por los Romanos en el tiempo del Emparador Adrian ke dyo su nombre a la sivdad, en los anyos 120 dospues de muestra era.

El los anyos 1750 el Granrabino Eli Geron kontribuo muncho a enfuerteser la komunitad. Egzistiyan unos 13 sinagogas, ke fueron kemados en el grande insendiyo de 1905.. En el siglo 20 Edirne teniya una eskola judiya de grande importansya, la Alliance Universelle.

Edirne es una sivdad muy importante para los judyos porke biviyan unos 22.000 ermanos de muestra komunitad en los anyos 1920. Dospues ? Partyeron… Unos a Istanbul, otros a Amerika, Kuba, Meksika, Palestina i mizmo a Egypto. Fueron forsados a partir i desharon o vendyeron todo lo ke teniyan kuaji debaldes.

Durante la primera i la segunda guerra mundial sufriyeron ambre dezgrasyada kon todos en la sivdad malgrado ke eran komersantes i personas rikas por lo mas. Dayinda son nombrados los kezos ke los judyos vendiyan en Edirne.

Aviyan munchas sinagogas, un chiko hospital, unas eskolas, un orfelinato, assosiyasyones de karidad i lugares ande se reunisavan….. Kon tiempo todo se derroko i kedaron oy unos dos o tres judiyos solamente.

El simetaryo judyo fue derrokado enteramente en 1973. Los estudyentes de la Universitad de Trakya (Thrace) empesaron a renovarla en 1996. Solo un diez por syen kedo de este simetaryo i no ay mas enterremientos des de 1970.

El grande kal de la sivdad ke aviya kayido en ruinas se fraguo de muevo dospues ke el governo dyo su permisyon. Se avriyo en las pasadas kon una grande seremoniya i muy munchas personas de todos los lugares se fueron ayi por esta okazyon. Sus trezoros de plata aviyan dezaparesido… Aviyan rompido sus maraviyozas almenaras de kristal i las kreaturas aviyan echado piedras a todas sus ventanas. Las siyas se aviyan espedasado i aviyan servido de lenyo para kayintarse en invyerno…

Ke kedo de los judyos de Edirne ? De Albert Sarfati, Nesim Marko Kohen i de los Malki ke eran grandes kezeros ? De Nisim el Blondo ke aziya eskovas i del ornero Altin de Ishak, los dos muy renomados bomberos de sus epoka tambien?.. De Naftali Mitrani ke teniya su botika ande vendiya manteka i kafe al empesijo de la kaleja ke saliya a la meskita Tamburacilar ? Del bakkal (epicier) Moshe, de Menahem ke
aziya papeleras, de Bello nombrado por sus chiroz (pishkado seko) i lakerda (pishkado salado) ? A la vanda siedra de la Avenida de la Republika biviyan Bohor Filozof, Dr, Sami Haras, Dr. Toledo, el maderero (keresteci) Salomon, Yuda Romano …. Del Sinema Reshadiye, de la Sinagoga Italiana ? Todos estos judyos ke partisiparon tanto a la vida kultural, ekonomika i sosyal de la sivdad ? Los ke aziyan los vinos… los grandes patiseros, los fabrikantes de la azeyte de tornesol ?…

La gente ke se pasavan muy bien i se keriyan kon sus vizinos turkos nunka se olvidaron de sus vieja sivdad. Oy en diya munchos Edirnelis vijitan sus lugar de nasimyento kon lagrimas en los ojos. Rogan por la alma de sus dezaparesidos i se akodran kon sus vizinos, de los ermozos diyas pasados.

LA BODA DE GUNES MITRANI i de HARUN ESENTURK
kon la partisipasyon del Mayor de la sivdad Recep Gurkan i sienes de invitados ke vinyeron de Istanbul i de otros lugares….

Muevamente se selebro dospues de 41 anyos una boda maraviyoza en el grande kal de Edirne ke se inoguro el anyo pasado. Ke pekado ke informaron ke uvo munchas demonstrasyones antisemitas i sloganes del puevlo keshandose (!) ke Hitler no puido eskapar el echo ke empeso !!!! Savemos ke Ibrahimzade, el dirijente de la komunitad judiya esta tenyendo diskusiones kon el Ministeryo de la Justisyo i el Parlemento para estas manisfestasyones ke kavzan el odyo entre el puevlo.

Kon karinyo
[email protected]