Asentado en una taverna kon su vino,
Pasava komo filmo la vida por su tino,
Sus kaveyos blankos, desgustozo, kaje yido,
Miradas fiksas komo rebivir un olvido.
Pensava a eya, al sol de sus primaveras,
Se alegrava kon sus memoryas verdaderas.
Kreyiya ke su sangre pasava por sus venas,
El las sintiya komo antes …de lumbre yenas.
Mirava la tierra komo bushkar sus patadas,
Teniya sus alegriyas todas amatadas.
En sus ojos syempre la linda fizyonomia,
Esto era la noche, esto era el dia.
No kijo aserkarse, ni esperansa darle,
Era espozada, puediya refuzarle.
El sekreto lo tuvo en l’alma munchos anyos,
Sin pueder amar otra mujer, le kavzo danyos.
Kon suspiro travo dos sorvos de su bevyenta,
De sus ojos lagrimozos se viya su bivyenta.
Este grande amor en ke korason kaviya?
Esto el lo supo i el Dyo solo lo saviya…
***
“La kandela antes ke este por eskaparse,
La flama se l’engrandese serka d’amatarse.”
Haim Vitali Sadacca
Montreal
Photo By Ryan Albrey Via Flickr under Creative Commons License
