Kijyera durmir i no azer nada,
Desharme bivir espandida en la yerva
Los ojos a mitad serrados, soriyendo
Avlando al ayre, a los ke m’estan oyendo
Dizyendoles ke el tiempo passa koryendo
I ke esto kansada, solo kero durmir de muevo.
Kijyera nadar en las aguas freskas de los rios
Limpyas i klaras ! En el vedre profundo de los lagos
Sin pensar al ritorno, nadar avagar, aleshandome
Partir leshos ande los kantos son mistikos siempre
Peryer mis fuersas i desharme ir kon el koryente
Soriyendo mas,bolando ensima de las aguas, alegre!
Ke son estas korridas, kerer eskapar kon las kozas !
Mas bolsas para inchir, dospues presto vazyar otras ..
Pensar para mas arrekojer, firyir sin kudyo, ma tener !
Tener kualo ? Todo va kedar aki ! Basta de trayer !
Basta los juegos de fama, el orgulyo ! Basta de mas kerer !
De ande viene esta hambre i el odyo ke no kere dezapareser ?
sharope.blanco@gmail.com