KULO ES LA METAFIZIKA ? LA MUEVA FILOZOFIYA !

Los milagros de los kualos los Livros Santos avlan se pueden diskutir por ken tiene una miente kritika ke no aksepta de konvenserse kon una repuesta ke asemeja a “Ansina es i punto !” o “La relijyon es un paketo i no se avre… Es a tomar o a deshar !” …

Si la persona se forma des de su primera chikes de manera a efasar toda manera de kestion ke ni le viene al tino de esta manera, no ay dingun problem. Tiene la kreensya de esto debasho de su piel, en su sangre, le viene naturel todo lo ke se paso, mismo si se kontava ke aviyan personas ke kaminavan en el aver o vakas ke bolavan… Lo ke no puede i no deve de ser natural para los otros ke keren tratar de entender i ir al mas profundo de las kozas… A este punto, mos asemejamos a las kreaturas ke empesan solo ir a la eskolo i keren saver en estos anyos mismo lo ke tienen de ambezarsen en la Universitad !

Mozotros no tenemos un background bastante godro para pueder entender siertas kozas… Esto es una vedra ! I es por esto ke las personas se van a las akademiyas de judaismo, a las yeshivas i no se mas ande para ambezarsen muncho mas ondo de lo ke savemos mozotros. Ma i eyos tambien no tienen repuesta a todo ! A kuaji nada !

Dingunos pueden tener una repuesta al kueshko del problem. La vida, la muerte, la neshama! Antes ? Dospues ? Porke es el Kadosh baruhHu ke no kijo ke lo sepamos… Teoriyas, entuisyones, sonyos, endevinos.. i toda manera de siensya puede dar una ideya o puede developar una konviksyon personal ma la vedra no es posivle de saverla i esto es la unika vedra. Ademas si no era por muestro bien, esto no seriya ansina.

Me vino al tino el debato ke trata de “Es mijor saver la vedra o no ?” Avlo de una hazinura terminal. Todos keren saver i no saver en mismos tiempo ! Es mijor para eyos de no saver ma esto no les viene justo porke komo siempre kieren tener las kuedras del destino en sus manos ! Una persona ke “no save” es mas felis. No tiene espanto. Tiene siempre la esperansa de kurarse, lo ke es mijor para su moral i sus fuersas de kombatir la hazinura. Psikolojikamente tambien su vida tiene muncho mas kolor i goza mas… No todos tienen la fuersa de akseptar la muerte kon sorizas bayles i kantes ! Yo no ! A mi ke me avlen mintiras i ke me digan ke tengo dolor de estomago porke komi una susyedad ! No kero saver ke me vo murir i en kualas kondisyones! Antes lo eskondiyan agora no mas. Me parese ke era mijor lo de antes ! Esto es egzaktamente la razon ke nunka saveremos la verdad i es esto lo ke es muncho mijor para mozotros.

Alora ? Devemos, no se komo, ma por miliun remedyo de tratar de no pensar en esto i tener konfiensya en El ! Soriyir a los anjelitos i yamarlos para ke mos ayuden si tenemos menester. EL nunka se emlesko de los echos de este mundo….. Nunka, aparte de la salida de Egypto…. El izo el universo i todo ma NO esta enteresado a la vida en este mundo i lo ke ay mas aya no savemos…. I si pensamos ke muestra galaxia entera no es mas ke un grano de arena en el firmamiento, i ke muestro sol es ni una ormiga allado de Antares, un otro sol en un lugar milyones de anyos de luz leshos de muestro sol… Imajinavos ken somos….Ni ayre, ni siniza …

No kreyo ke ayga de pensar tan profundo a las kozas…. Mas ke ser en akuerdo kon muestra konsiensya i kon lo ke azemos ! Porke, en todo kavzo, mos da mas plazer i satisfaksyon de saver ke izimos muestro posivle para ser una BUENA persona, amada i no odyada por los otros, ke tuvimos fe en el Di-o de muestros padres asigun EL lo kijo i en muestra vida fuimos un elemento “pozitivo”i no “negativo”. Kreyo ke a lo manko esto tiyene su pezgo, si no para algunos o kualsiker koza ma para mozotros mizmos !

Siempre pensi ke puedo irme kontra el mundo entero ma nunka kontra mi !
Kon karinyo
Sharope blanco
“Los gajos de las Agranadas”

LEAVE A REPLY

Please enter your comment!
Please enter your name here

Previous articleKnesset advances regulations imposing fines on illegal housing construction
Next articleEgyptian professor: ‘Israeli violence is in Jewish genes’
Sharope Blanco

SHAROPE BLANCO lives in Istanbul (Turkey) Sharope Blanco, Economist and Language Teacher, Administrator and founder of the Yahoo’s group SEFARADI MUESTRO, where she writes and shares her poems, articles, memories and her novel ALMOND. She is also the author of countless poems and articles in English, French, Turkish and Djudeo-Espanyol. Her work will be published post-mortem according to her wish, by her son Nebil F. Behar, a doctor residing in England.

LEAVE A REPLY

Please enter your comment!
Please enter your name here