VOS KONTARE EL KUENTIZIKO DE LOS PAPAGAYOS

BONJOUR – GUNAYDIN – GOOD MORNING BOKER TOV I BUENOS DIYAS

Keridos Amigos i mis amigitas,

No puide empesar a aparejarme para tomar el aviyon i bolar a las tierras entezadas de la Inglaterra, abrasar mi ijo i gozar de su prezensya kon mi ! Kije pasar otr’un poko de tiempo kon vozotros i trayervos una soriza a la demanyana… Estaremos endjuntos amanyana o ken save, esta noche mizmo ! En el aviyon vo eskrivir un otro kapitulo de ALMENDRA por sierto ! Esto es keyf !…
Vos kero bien !

Lucy teniya dos papagayos, Sarit i Aurora ke amava muncho. Solamente, no saviya de ande, estas ijikas luzyas se aviyan ambezado de dizir kozas ke no le gustava del todo… Komo se les aviya entrado en sus kavesikas de pasharikos sin meoyo de supito gritar…


Aurora                                                    Sarit

– Prontas ! Ken se kere divertir ?

Lucy se fue al Rabbi de su kehila i le demando konsejo…. No keriya espartirse d’eyas ma i esto no le konveniya !

– Esta bien Lucy ! Son pasharos ke deven ambezarsen otras kozas ! Yo tengo Mirza i Amos en mi kaza ke son papagayos egzamplarios ! Tienen kipa i talit i diya entero azen orasyones, rogan kon muncha
devosyon, son seryozos i si los metemos endjuntos, i tus ijas se van ambezar de eyos a ser buenas papagayikas judiyas. Ke keden un poko i las tomas atras bien edukadikas !

Lucy arresivyo el konsejo kon alegriya i se yeva sus ijikas ande el Rabbi.

Sarit i Aurora estavan tresalidas ! Kuando yegaron i vieron los ijikos gritaron :

– Prontasssssss ! Ken se kere divertir ?


Mirza i Amos

– Mirzaaaaaaaaa ! Mira las ke vinyeron ! Kita
esta kipa i tu talit por mundo tuyo ! No tenemos mas de arrogar ! El Di-o oyo muestras orasyones i por fin mos mando dos gaynikas mijor mizmo de las ke mos ensonyavamos !

sharope.blanco@gmail.com

LA VIDA SIGE SU KORSO ADELANTE
NO IMPORTA SI ESTAS TRISTE O ALEGRE
NADA KEDA EN SU PRIMERA DOLOR
NO SE MUERE NI DE DOLYO NI DE AMOR !
Sharope blanco