Es ke vuestra bava baylava flamenko en la kuzina, vistida kon un fostan kolorado, pezgado de tantas telas de ropa? Es ke tenia enklavada detras de su oreja una klavina blanka? Es ke baylava kon chapines pretos de takos godros, dando dadas i pitmes enbasho?

Es ke tio Moshon-el-kosho estava ayi, el tambien, batiendo sovre un teneke de azitunas, mauyando a-a-ah? I el papu Nessim dava palmas a los dos, lagrimas de alegria en sus ojos?

Es ke dia de Kipur, despues de kantar el pizmon “Hatanu lefaneha”, en el kal, todos rogando al Dio ke mos perdone, el hazan kitava un bokal vazio de su aldikera i empesava a kantar “La vida do por el raki”? No? KoDJUEDO ESPANYOLmo puede ser? En munchos konsertos de “kantes en djudeo espanyol”, los kantadores kantan el kante del burrachon pishin despues del pizmon de dia de Kipur! No, no lo
puedesh enyegar!

Es verdad ke los sefaradis no se artan kon komer una bureka? Es ke deven de komer al menos dos o tres? No? Na, aki vos do la preva! En Israel yaman esta unika kreasion de orno, “burekas”. i munchos, afilu sefaradis, dizen ke adoran “burekasim”. No, no lo puedesh enyegar!

Savesh tambien ke muestra nasion se despartio en el Maamad ‘HarSinay entre dos grupos? Uno es de eshkenazis, i el otro es de sefaradis. Todos, ama todos los ke no entraron al primer grupo, apartienen al sigundo: persianos, irakianos, yemenitas, buharalis, gruzines, sirianos, tunizianos i marokanos, todos son sefaradis. Malgrado ke no avlan espanyol i ni ke pasaron al lado de la Espanya. Afilu el famozo poeta Shalom Shabazi de Yemen era sefaradi!

Porke, vozotros demandash, es ke Am Israel no tuvo otra istoria en otros lugares del mundo? En los miles de anyos ke bivieron en Persia i Irak, en Ayifto i en el Oriente, se formaron varias linguas djudias, orasiones i tradisiones importantes. Ande se fue esta istoria? Se pedrio totalmente en sesenta anyos en Israel?

Vos dire, ermanos. En primero, ay de ver el aspekto pozitivo. Oy en dia es una gaava (grandeza) de ser sefaradi, de poder afirmar ke uno tiene raizes en esta erensia rika i ermoza. Ma al mizmo tiempo, devemos de ambezar a los otros las diferensias entre mito i verdad, falsia i realidad. Ansi evitaremos de formar un mito bazado sovre intereses komersiales, fantazia i dezinformasion.

Ay de eksplikar, por exempio, la diferensia entre la kopla, la romansa i la kantiga. Dar a entender ke las kantigas muevas i modernas ke kantamos no son “romansas antiguas de Espanya”.

Ay de asinyalar ke kada kante tiene su tiempo, i endechas de Tisha be-Av no se kantan en Purim. En verdad, keridos kantadores, no puedesh karishtirear los guevos kon la kalavasa, kantar kantes de burrachones despues de un
pizmon relijiozo. I afilu si keresh, estimados organizadores, inchir la sala kon espektadores, por favor, no traygash la bayladera de flamenko. La ermoza tradision de la muzika i de los bayles de flamenko es la kreasion de los”gitanos” ke arivaron a Espanya sienes de anyos despues de la ekspulsion de muestros antepasados, en 1492, i eya no es parte del folklor sefaradi.

I por las burekas: bueno, mizmo los ke no avlan inglez ya akseptaron ke brakes en la Tierra Santa es un freno i mozotros tambien tenemos de akseptar este fenomeno linguistiko. Antes munchos anyos mozotros izimos lo mizmo: tomimos el biervo börek de los Turkos i lo hachipuniimos un poko.

Ansi se dezvelopa la kultura: toma influensias de diferentes tiempos, djentes i lugares, las meskla i forma una tradision mueva. Este proseso se esta kumpliendo en muestros dias tambien i mozotros, los sefaradis, estamos kontribuyendo kon kantes i melodias, dichas, palavras i kumidas. “Aki por siempre”, dizia mi padre: Aki estamos dando de muestra tradision para ke kede por siempre.