Buenos diyas
Keridos Amigos i mis Amigitas…
Oy me alevanti antes de las 5 de la demanyana i ya ize muncho echo ! Dayinda no amanesyo enteramente ma se puede entender ke sera un diya nuvlado, mizmo si esta bastante kayente. Somos el 26 de Julio 2018 (kije eskrivir 1918 porke so una persona del 20 en sieglo i porke ya me ize una viejizika de 12 anyos !), un ermozo Jueves ke Di-o mos regalo, un otro diya para reingrasyarLO i azer todo muestro posivle para ke seya un diya de salud kumplida, de kalmo i de alegriya para todos los keridos.
Esta demanyana, vos kero kontar a mi manera i en muestra lingua una estorya ke me mando Ester Hazan de Argentina i ke me plazyo muncho. Lo kije kompartir kon vozotros.
Grasyas amigita kerida…..
Shabat Shalom de paz i de ermozuras.
Sharope Blanco
I es ke…….
Latif era un povre hombre en el reynado, sin dingun bien i ke biviya kon lo ke las personas le echavan en basho… Kon esto era un mendigo ke se respektava pormodo de su savyedura i las ermozas kozas ke kitava de su boka.
Un diya el Rey estava kaminando deguizado en el merkado, para tener el pulso de lo ke se pasava en la plasa. Esto lo divertiya muncho i le plaziya konversar kon los merkaderes i los artizanos de su payis. Oyo ke alavavan de un sierto Latif, el hombre el mas prove de los sivdadinos del Rey i lo felis ke era asentado debasho de la solombra de un arvole, mirando a los leshos sin dingun problem en su kavesa… Lo kijo konoser.
Kuando se fue a su lado le demando si saveriya la repuesta a su kestion i le disho ke en kavzo ke lo saveriya le iva dar una lira de oro. Latif le arespondyo ke puediya guadrar su lira de oro porke no teniya ke azer kon esto, ma ke puediya demandar lo ke teniya en su kavesa…. Delantre del dedenyo del oro, el Rey le demando una koza muy importante sovre la ekonomiya del payiz ke dingunos de sus konsejeros aviyan puedido topar una solusyon ! La repuesta de Latif era klara, presiza i kon muncha intelijensya i savyedura ! El Rey fue muy soprendido. Le echo la lira de oro a sus pyes i torno a su palasyo.
Unos kuantos diyas dospues el Rey vino de muevo ande el i lo mizmo se repetyo. Ansina unas kuantas vezes fina ke el Rey keriya a este konsejero a su lado, en su palasyo. Le propozo esto no estando del todo seguro ke iva akseptar…. Ma ken save por kuala razon, puedeser solo por azer buendad Latif aksepto ser el “Konsejero Ofisyal de sus Majestades”.
Se le dyo una kamarate i todo lo ke un hombre puede dezeyar. No pasava diya sin ke el Rey demande a verlo i diskutir kon el los echos del estado i su vida privada tambien. El fakto ke eran tan serkas el una del otro inyervava muncho los shoronfonfones de la korte ! Keriyan komplotar kontra Latif ma no saviyan komo azerlo porke el hombre era de una derechura inkreyivle mizmo en un palasyo tan korrompido !
De una manera, portanto, deskuvriyeron ke Latif saliya kada diya del Palasyo, tadre dospues de midi i tornava a la noche abashando… Diskutyeron el kavzo i se prezentaron delantre del Rey akuzando Latif de komplotar kontra el, kon sus partizanes, i ke se topava kon eyos kada diya en una kaza ke asemejava mas a una mansarda !
El Rey no los kreyo i los embiyo de su lado kon ravya ma en su proprio interyor no estava repozado i kijo ver lo ke se pasava kon sus ojos… Effektivamente Latif saliya kada diya a la mizma hora, dospues ke terminava sus echos en el Palasyo !
Se deguizo komo amava azerlo i se fue detras de Latif. Estava solo. Pasaron la sivdad i Latif entro en una kaza kuaji en la kampanya, entera eskayida i pronta a derrokarse de suyo ! El Rey aspero un poko i dospues empeso a chaftar a la puerta. Fue Latif ke le avriyo la puerta, muy sorprendido i no savyendo ke azer !
– Sus Majestad ! Vozotros aki ? En mi povre kabana ?
– Ande estan tus amigos ?
– Mis amigos ? No ay dingunos aki mas ke yo !
– Lo se ke vienes kada diya aki… Dime porke lo azes !
– Rey poderozo, komo lo vesh, no ay nada en esta kaza mas ke un plato de tavla i una cuppe (roba) ke uzava fina el diya ke me tomatesh en vuestro maraviyozo Palasyo…. Ni una kama para durmir…. Solo paja embasho. Esto tan enkantado agora de tener todo lo ke me datesh a mi dispozisyon, ke me espanto de avrir los ojos i entender ke todo no era ke un ermozo sonyo ! Vengo aki para no olvidarme de mi vida presedente en kavzo ke no vash a dezeyar mas mis servisyos en el Palasyo. Vengo para no olvidarme ken so i komportarme ke tal kon mi entorno, mizmo bivyendo en un Palasyo !
sharope.blanco@gmail.com