EL TROUT
Keridos Amigos i mis Amigitas
El TROUT es un grupo de sinko mansevos ekstremamente talentuozos i sin duvda los mijores del siglo 20 en sus kategoriyas. Los genios de la musika klasika ke se toparon naturalmente por no ser ke un solo puerpo kuando fueron invitados a Londres por un festival. Deviyan primero lavorar endjuntos i dospues salir en frente de un publiko muy rafinado…. Teniyan de 21 a 26 anyos, todos entuzyastos, ambisyozos, yennos de vida, briyantes i kon anyos de estudyos muy seryozos i de grande difikultad de la muzika klasika (pasi por aya sin yegar ande eyos yegaron !!!), un lavoro kolosal detras de eyos.
Para esta okazyon prepararon :
EL QUINTET PARA PIANO DE FRANZ PETER SCHUBERT
(5 PARTIDAS) KE KOMPOZO KUANDO TENIYA 22 ANYOS…
A SUS GRUPO LO YAMARON ”THE TROUT “
Los vamos a konoser en seguida…..
Todos los sinko konosyeron la fama i el sukseso, los aplozos, los premios i los rekonosimyentos los mas altos kuando eran solo adolesentes…. Los kuatro, de mi edad mas o manko, biven en lugares diferentes. La sinkena, la unika ijika entre eyos, se muryo a sus 42 anyos en 1987… No esta mas en este mundo. Esta kon los anjelitos… Desho todo en 1978 porke no teniya remedyo. Su hazinura era la MS, Multiple Sclerosis i es esto ke kavzo su fin. Avlo de la grande chellista del sieglo JACQUELINE DU PRE. Era la ermana de la flutista HILARY DU PRE. Dizen ke dyo una alma al violonsel ! Era ingleza i es en Londres, mirada komo una prensesa i al lado de su madre ke muryo.
Su marido nunka le izo saver ke teniya una relasyon kon la famoza pianista Russa ELENA BASHKIROVA en Paris i de la kuala tuvo 2 ijos David Arthur (1983), direktor/kompozitor de la banda hip-hop Level 8 en Almania, i Michael (1985) un violonisto de muzika klasika.
El es DANIEL BARENBOIM. Un formidavle piyanisto/konduktor. Su ovra es immensa ! Nasyo en 1942 en Argentina de una famiya judiya ashkenazi de Rusya. Emigraron a Israel en 1952 i es al lado de las Muralyas de Lamentasyon en Yerushalayim ke se kazo kon la ke amo, Jacqueline du Pre la chellista. No tuvyeron kreaturas. Daniel se kazo por la segunda vez a la muerte de Jackie kon la mujer de su vida, la pianista Elena Bashkirova en 1988
El treser del grupo de mansevos es ITSHAK PERLMAN. Nasyo en Palestina (Mandato Britaniko) agora ISRAEL en August 31, 1945. Es un konduktor i un pedagogo tambien. Uno de los mijores violonistos del mundo… Una karyera de las mas shoronfonfon ke puede aver ! Tanya en sus instrumentos STRADIVARIUS 1714* I otros… (Aparteniya antes a Yehudi Menuhin) Teniya 23 anyos en el famozo konserto ! Un virtuoz ke me izo yorar de emosyon.
A sus 4 anyos i medyo kontrakto el polio, muy propajado en Israel en estos anyos. Peryo sus pyernas, kamina kon protezas i da sus konsertos asentado. Kazado kon una New Yorkeza judiya, hanumika, estava tanyando el violon por su bebiko para ke durma ! Perlman es un kantador Basso de Opera tambien. Dyo un konserto para la Reyna Elisabeth, en la Kaza Blanka, performo por varyos filmos ke ganaron el premio por el mijor filmo, performo para la inogurasyon de Barak Obama en 2009. Professor del konservatuar en el Kolejio de Brooklyn i dospues tomo el lugar de su profesor Dorothy DeLay en Juillard School (Chair of violon studies). Mora en NewYork kon su mujer ke es violonista klasika. Tienen (Mashallah !) 5 kreaturas Noah, Navah, Liora, Rami (de la banda Rock Something for Rockets) i Ariella. (Di-o le ayego un ijo !) Konduktor de las mas grandes orkestras filarmonikas del mundo tiene innombravles premios, medalyas i rekonosimientos.
El kuatren ni mas ni manko es PINCHAS ZUKERMAN, un otro violonisto gaon/ dotado de un talento muy raro ! De la misma eskola de PERLMAN – Juilliard School en New York. Es Isaac Stern ke lo rekomendo ! (Hehehehe… NO es para todos esta eskola !!! Kale tener sangre blue ! )
Nasyo en Tel-Aviv Israel el 16 de Julyo 1948. El teniya 21 anyikos en el konserto. Un geante de la muzika klasika.. Vino a Londres kon su mujerika, dulse i ermoza, EUGENIA ZUKERMAN , flutista i novelista kon ken tuvo dos ijas durante sus kazamiento de 17 anyos. Todas las dos de sus ijas kantan. ARIANA es una kantante de opera i NATALIA kanta blues i muzika folklorika. Pinchas se aviya kazado kon la aktrisa TUESDAY WELD por la segunda vez. Su tresera mujer es AMANDA FORSYTH, la prensipala chellista de la NAC Orchestra, de lakuala Pinchas es el Direktor de Muzika. Biven en Ottawa Canada.. No ansina ! En un palasyo por seguro…
AMANDA FORSYTH es la ija del kompozitor MALCOLM FORSYTH. Vinyeron al Kanada del SUD AFRIKA kuando teniya dos anyos. Tanya des de la edad de 3 ! Eya tambien estudyo en Juilliard School antes de estudyar en Los Angeles. Resitalista, soloista dan munchos konsiertos tambien kon su marido el grande Pinchas Zukerman. (Mi mamita diziya la moneda se kaza kon la moneda… No saviya ke la muzika se kaza tambien kon la muzika !)
Amanda, su mujer, tanya su violonsel echo por Carlo Guiseppe Testore en 1699. Pinchas Zukerman tanya en su instrumento GUARNERIUS DEL GESU echo en 1742. Konduktor de las mas konosidas orkestras en el mundo tiene innombravles premios, medalyas i rekonosimientos ke violonisto i violisto. Su ovra es immensa.
El sinken mansevo del konsierto ke tanyo el bass, malgrado ke no lo aviya tokado por 10 anyos (!) es… ken otro mas ke ZUBIN MEHTA ! Nasido el 29 Avril 1936 en India – MUMBAI (Antes Bombay) . Su famiya vino a la India del Iran . Violonisto virtuoz i konduktor alavado, es un grande maestro de la muzika klasika del Oeste i konosido en el mundo entero. Su padre MEHLI MEHTA era violonisto i es el ke fundyo i fue el konduktor de la Orkestra Filarmoniya de BOMBAY. Zubin kijo estudyar Medisina ma se topo a sus 18 anyos en Vienna estudyando muzika klasika i Violon. Es en esta eskola ke se konosyeron i se izyeron muy amigos kon Daniel Barenboim un pianisto virtuoz i konduktor.
( Este eskrito me trusho kompleksos de inferioritad komo nunka sinti en mi vida ! Uno deyo ehhhhh, 2 OK ma sinko deyos ansina …I mas kon sus mujeres ets. Ke ago yo en este mundo !!!!)
ZUBIN MEHTA (Grande Don Juan ! Lo konosi en un konserto en Tel Aviv i dospues del konserto fui envitada povre de mi a komer kon los mijores de mi !) se kazo en un primer kazamiento kon Carmen Lasky en 1958. Tienen un ijo Mervon i una ija Zarina. Divorsiaron en 1964. Dos anyos mas tadre Carmen se kaza kon el ermano de Zubin, ZARIN MEHTA (Al takke ver kulah !) agora el Direktor Ekzekutivo de la Orkestra Filarmonika de New York (No ay manko de esto Bar minan !) En 1969 se kaza kon la bellisima aktrisa Amerikana de filmos i de la TV Nancy Kovack… Mehta tiene su rezidensya en los Estados Unidos ma es sivdadino de India tambien.
Chef d’orchestre de las orkestras filarmonikas de Vienna, Liverpool, Montreal, Los Angeles i dospues Direktor de Musika fina el anyo 1978. A esta data se aze el konduktor prensipal i el Direktor de muzika de la orkestra filarmonika de NewYork fina ke sale por su retreta en 1991.
Ayyyyyyyyyy ke no kero mas kontar todos los premyos, innombravles honores, rekonosimientos, medalyas, plaketas i todo bueno ke arresivyo en su larga i gloryoza karyera komo sus mijores amigos PERLMAN, ZUKERMAN i BARENBOIM kon loskualos siempre tuvyeron sienes de okazyones de vinir lado kon lado…
Filmos, dokumentaryos se realizaron, livros se eskrivyeron por estos nombres lejendarios de la muzika klasika mundial.
Ay ansina de gente tambien…. Alavado el Sinyor del Mundo ke regalo ansina de talentos ekstraordinaryos i los metyo todos enjuntos enfrente de mi para kitarme mas trololo de lo ke so !
Por vuestra informasyon, todo esto seguro ke yo no lo saviya… Ke no me vengan kon tsipurey tsafta (historyikas de granmama) de copyright ets dospues. Por kada nombre puedesh mirar en el Internet (Wikipedia Shmikipedya gologolo i gloogloo ets) – Yo me namoro por Itshak Perlman –
Vuestra
sharope.blanco@gmail.com
*El Stradivarius o Strad es uno de los violones, violonselos, i otros instrumentos de kuedras fabrikados por los miembros de la fanmilia Stradivari (Stradivarius), en partikular por Antonio Stradivari, durante los siglos 17 i 18. El biervo “Stradivarius” es tambien un superlativo para eksprimir la ekselensya…
Un Stradivarius fabrikado en los anyos 1680, o entre 1690 et 1700, puedriya valer milliones de Dolares. En 2011, el «Lady Blunt », violon de 1721, i ke esta en un estado perfekto, se vendyo por serka de 16 milliones de Dolares.