Autor-poeto-orator-jurnalisto-intellektual Judyo, Leader militar Tsionisto-Ruso i Fundator de la Organizasyon de Defensya Individual en Odessa
Jabotinsky nasyo en 1880 en Odessa. Esta sivdad en esta epoka era un sentro de aktivitad judiya i sionista ma Jabotinsky se agrandesyo mas kon la kultura rusa ke judiya.
A los 18 anyos desho Odessa i se fue a estudyar el Derecho a la Suissa en primero i dospues a la Italya.
Empeso a eskrivir en Berne, la kapital de la Suissa i nunka puido alesharse de su pluma i de las ojas blankas… Sus artikolos eran muy populares i en1901 su peryodiko lo yamo atras a Odessa para ke aga partido del ekipo editoryal. Dospues del progrom de 1903 en Kishinev empeso a ser aktivo para defender los djudyos i el tsionizmo.
Todos votaron por el para ke seyga un delegado al sejen Kongreso Siyonisto. Jabotinsky fue profundamente impresyonado por Theodore Herzl . Se maraviyo del Hebreo ke oyo en el Kongreso i se metyo a estudyarlo a tal punto ke se izo un manyifiko orador i traduktor. El ya avlava el ruso, el fransez, el inglez, el alman i otras variyas linguas slavas.
Jabotinsky siempre penso ke el Hebreo era de primera importensya para la konstruksyon de la nasyon. Los sionistos sosyalistas empushavan los djudyos para luchar por sus derechos sivil ma el siempre penso ke la salvasiyon vineriya unikamente en la Tierra
de Israel.
Kon la Primera Gerra Mundial en 1914 djuntos kon Jozef Trumpeldor yamo a la kreasyon de una fuersa djudiya kombatiyente ke se uneria a los Aliados para liberar la Palestina de los Otomanos. Konvensyo el Govyerno Britaniko para ke permetan la formasyon de tres batayones djudyos. Era un hombre de aksyon tanto komo
de palavra ! Se konvertyo en ofisyal del Rejimento de Fusilyeros del REy i kombatyo al lado del General Allenby en 1917. Fue dekorado kon el endjuntos por aver pasado el rio Yarden por abashar a Palestina. Dospues de la gerra Jabotinsky kijo mantener una unidad djudiya para defender el tsionizmo kontra los Arabos, la hostilidad de loskualos estava kresyendo mas i mas ! Ma los Inglezes no permetyeron esto i dispersaron esta unitad guerrera.
Su ijo Eri Jabotinsky era un aktivisto revizyonisto, un hombre i un matematisyano akademiko. Fundyo el Movimiento Oppozisyonisto en mizmo tiempo ke el Tsionizmo.
Wikipedia
Jabotinsky se enstalo en Palestina kon su mujer Hanna. Se izo el editoryo de la gazeta Ha-Doar. Partisipo a la defensya de Yerushalayim en 1920. Los Inglezes lo apanyaron i lo kondanaron a 15 anyos de prizyon por detener armas ma fue liberado unos kuantos mezes dospues.
Jabotinsky moro en Yerushalayim en los anyos 1927 – 1929. En 1930, kuando estava al etranjero, los Ingles le defendyeron de entrar de muevo a Palestina. Nunka puido retornar a su kaza… Fina su muerte, 10 anyos despues, Jabotinsky lucho por la kavza sionista al deredor del mundo.
Jabotinsky presento kozas danjorozas kuando Hitler vino al poder en 1933 i demando a los djudyos de boykotar la Almanya esperando ansi ke iva meter este payis en una situasyon no komoda ekonomikamente ma los lideres djudyos i sionistos no kijyeron kooperar. Izo todo su posivle para ayudar los djudyos a yegar a Palestina de manera legal o illegal. Saviya ke estar en Europa iva ser muy danjerozo. En 1936 yamo todos los djudyos de la Evropa del Este de irsen a Palestina.
En 1937 en una Komisyon para Palestina deklaro ke la demanda por una mayoriya djudiya puediya ser una minimala aspirasyon solamente ! Disho ke en muy serka 3 a 4 milyones de djudyos Evropeyos bushkariyan un puerto seguro en Palestina ! El i sus amigos defendiyan ke todo el Teritoryo del Mandato Britaniko de los dos lados de los bodres del Yarden devia azer parte de las Tierras Djudiyas. El rechesyo lo ke akseptava la Komisyon Peel ke rekomendava la partisyon de lo ke kedava de la Palestina
Mandataria en dos estados. Jabotinsky se opozo a este plan. Peel no tuvo otro remedyo ke akseptar esto ma estava pensando ke mas
valiya un chiko payis ke no payis del todo ! De toda manera la solusyon fue rechesado por los arabos.
Las kondisyones estavan mal en Evropa. El empeso a apoyar la rezistensya armada kontra los Britanikos i se izo ofisyalmente el komandente del Etzel, la organizasyon militara klandestina para ayudar los emigrantes klandestinos ke yegavan por la mar. Keriya formar una armada djudiya por dospues la Segunda Gerra Mundial.
Jabotinsky muryo de un atako kardyako el 4 Augusto 1940, kuando estava vijitando un kapamiyento de los chikos de Beytar en New York.
Mos desho miles de dokumentos, korespondensya, diskorsos, artikolos publikados, libros, un diksyonaryo de rimas en ebreo. De el kedo el vistido ensima de el i una pipa de 4 Dolares …
sharope.blanco@gmail.com