El chiko estado formado por dos izlas en el Caribe, Antigua i Barbuda, publiko el timbre postal kon la figura del grande kabalista djudio de Espanya, Moshe de Leon. El timbre de una valor de 60 sentavos salio en el anyo 2000.
Moshe de Leon ke nasio al deredor del anyo 1250 en la sivdad de Leon, bivio en Guadalajara, Valladolid i Avila i murio en 1305, en Arrevalo, en lo ke estava tornando a su kaza en Avila.
Desde los anyos de su chikez el uzava meldar los livros de Shelomo Ibn Gevirol, Ye’huda ‘Halevi i Rambam. Fue un grande admirador de la literatura mistika i de su mansevez eskrivio livros sovre temas de mistisizmo djudio.
Su manera de eskrivir fue briyante i exakta i a kavza de esto resivio el nombre de “Shemtov”.
Entre sus lavoros literarios puedemos mensionar las sigientes ovras:
•”Sefer ‘Harimon”, eskrito en 1287 i dedikado a Levi Ben Todros Abulafia,
•”Hamishkal”, 1290, sovre las tendensias kabalistikas.
•”Shekel ‘Hakodesh”, 1292, sovre la vida despues de la muerte
•”Sefer ‘Hasodot”, 1293, kon una deskripsion del Universo.
En 1286 eskrivio el “Midrash ‘Hamushlam”, o “Midrash Mistiko” ke es la parte prinsipala del “Zo’har”, el livro baziko de la Kabala.
Moshe de Leon es el ke dio el kredito de autor de este livro a Shimon Bar Yohay, el famozo savio i rabino ke bivio en Erets Israel, en el primer siglo despues de la destruksion del Bet ‘Hanikdash por los romanos, i se gano una grande nombradia por su aktividad en el kampo de la Tora i de la Kabala. Djuntos kon esto, en lo ke toka al Zo’har, ay munchos istoriadores ke tienen dudas i se demandan si el verdadero autor del livro fue Shimon Bar Yohay o Moshe de Leon el mizmo.
El governo de Antigua i Berbuda deve ser alavado por su inisiativa de kitar este timbro kon la figura de Moshe Shem Tov de Leon, a la memoria de este grande filozofo i kabalista djudio.