Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Oy mos topamos en los yamim noraim, los diyas de espanto entre Rosh Ashana i Kipour, ke va kaer amanyana a la tadre. El djueves pasado, no aviya emisyon, djustamente porke eramos el primer diya de Rosh Ashana.  Yo teniya en kaza ijo, ermuera i tres inyetizikos ke se kedaron a echar en kaza tres diyas en sira, kon la vijita del otro ijo, kon su mujer i otra inyetizika ke se kedaron solo a komer de vez en kuando. Muncho plazer para mi, muncha kanserya para mi mujer…

Vos dezeo a todos, keridos oyentes, de toparvos eskritos en el grande tefter.

Malorozamente, otra grande dama  no tuvo este mazal i mos desho la buena vida el 14 de septyembre, a la edad de 98, kyero avlar de Klara Perahya, ke este en Gan Eden kon su marido Elie. Yo no la konosiya personalmente, ama  meldava lo ke eskriviya en las gazetas Shalom o El Amaneser, i me syervo a kada okazyon,de su diksyonaryo del franses al djudeo-espanyol, al punto ke ya se topa en pedasos. Ya se veiya ke teniya una grande klasa, i todo lo ke eskriviya era de alto nivel intelektual i moral. Afillu si lo eskrivyo en kolaborasyon kon su marido, kale meldar, al empesijo de su diksyonaryo, la introduksyon, antes mismo de la akdama del Profesor Sephiha. Es una maraviya de savidurya i de intelijensya. I sin en dinguna manera despresyar el rolo de su marido, yene se entyende meldando la akdama del profesor Sephiha ke el rolo prinsipal fue el de la mujer.

Despues de este negro haber, vos diré ke bushkando otra koza en mis vyejos emails de ay tres anyos, kayi sovre un mesaj de un primo miyo, avlandome de una kompaniya djudiya en las Brigadas Internasyonales ke se fueron a kombatir kon los republikanos en la gerra de Espanya, i dizyendome ke seriya una buena idea de dizir dos byervos sovre esta kompaniya. Kualo se paso? No se. No me akodro tener meldado este mesaj en su tyempo. Es agora solo ke lo meldi, i me pensi komo mi primo ke esto puediya ser interesante.

Kale en primero akodrarvos ke la gerra de Espanya empeso en 1936, kuando el jeneral Francisco  Franco, kon partezanos ayudados por fascistas italyanos i nazis almanes, se atako al governo espanyol. Del mundo entero vinyeron veluntaryos para ayudar a los republikanos espanyoles, sovre todo, por siguro, djente de syedra, i por lo mas muncho komunistos. Kuantos fueron? No se save muy byen, ama vamos a dizir unos sikuenta mil ombres, i mujeres tambyen, entre los kuales el eskrivano franses André Malraux, ke va konoser aya otro eskrivano, el amerikano Ernest Hemingway, (salvo ke Hemingway era aya komo gazetero i no komo kombatante).

Entre estos sinkuenta mil veluntaryos ajenos, munchos eran djudyos. Kuantos? No es kolay de saver, los istoryanos se pelean sovre la kuestyon, ama entre 5.000 i 7.000 asigun los istoryanos. Estos djudyos veniyan, komo los otros, de munchos paizes, i kombatyeron komo sivdadanos de estos paizes. No oyi ke uvo munchos djudeo-espanyoles entre estos todos, para venir ayudar a los desendyentes de los ke los aviyan echados a fuera unos kuantos siglos antes. Ama fueron munchos los lehlis, venidos no solo de Polonya ama tambyen de los paizes de Evropa sentrala i del este, de Fransya, de Amerika, i de Palestina tambyen. Lo mas de estos djudyos, komo de los non djudyos tambyen, eran komunistos empushados por el komintern, ama no solo, aviya tambyen ombres de la syedra sosyalista. Todos keriyan impedir al fascismo de konkistar un muevo pais, despues de la Italiya, la Almanya i tantos otros.

Sinko a syete mil djudyos sovre unos sinkuenta mil veluntaryos, puedesh pensar ke es poko. En vedra es muncho, porke los djudyos, afillu antes de la shoa, son muy pokos en el mundo. Por egzemplo, los djudyos forman 15% de los veluntaryos venidos de Fransya kuando son solo 0,50% de la povlasyon de Fransya.

Kale saver tambyen ke los djudyos dyeron munchos zabites, munchos medikos (70% de los medikos eran djudyos, asigun un istoryano), i malorozamente munchos muertos tambyen, a la armada republikana.

Oy, komo vos dishe, kyero solo avlar de la Kompaniya Botwin, porke fue una kompaniya ke kombatyo komo djudiya kon una bandyera djudiya eskrita en yiddisch (afillu si, por dizir la vedra, uvo a lo manko dos myembros ke no eran djudyos, eran arabos komunistos de Palestina, venidos de aya kon los djudyos).

Esta kompaniya tomo el nombre de Naftali Botwin, i antes de avlar de la kompaniya, dos byervos sovre kyen fue este Botwin.

Naftali Botwin nasyo en Ukranya en 1907 en una famiya muy prove. Lavoro komo ovrero i entro en 1922, dunke a 15 anyos, komo myembro del Tsukunft, una oraganizasyon djudiya de mansevikos del partido del lavoro, i despues, en 1925, entro en el partido komunisto.

I el 29 de djulyo 1925, a diziocho anyos, mata a Josef Cechnowski, un myembro de la polisiya sekreta de Polonya ke aviya infiltrado el partido komunisto. Pishin aferrado, es djusgado, kondenado a muerte i egzekutado, lo todo en solo ocho diyas. El 6 de agosto, es fuzilyado myentres ke grita: ” A basho la burgeziya! Viva la revolusyon sosyala!”

Es en desyembre 1937 ke es fondada la kompaniya djudiya ke toma este nombre, al seno de la Brigada polaka yamada Dombrowski. Son unos 150. La kompaniya sale una gazeta yiddish, yamada Botwin, i su bandyera esta eskrita en tres linguas: en una vande en espanyol “Para vuestra libertad i la muestra” i la misma koza, ama en yiddisch i polako por la otra vanda.

El komandante de la Brigada Dombrowski, Janek Barvinski, aze el diskorso sigyente:

“Kompanyeros askeres! Zabites i komandantes de la Brigada Dombrowski! Kompanyeros veluntaryos djudyos!

Oy, 12 de desyembre 1937, fue adjuntada a muestra gloryoza i grande famiya de kombatantes antifasistos, la kompaniya djudiya Naftali Botwin. Desde ke ayegimos al suelo espanyol, muestra brigada, todos muestros veluntaryos, fueron, en primero komo kompaniya, despues komo batalyon, agora komo brigada, una grande framiya fraternala ke aune todos sus kombatantes: Polakos, Almanes, Ukranyanos, Byelorusos, Djudyos, Ungarezes, Espanyoles i otros.

La  lucha komuna, la sangre komuna vertida, mos yevo todos en djuntos mas i mas, i mos ambezo a amarmos i estimar kada uno.

Mozotros antifasistos, sin distinksyon de nasyonalidad o de iopinyon politika, somos dechidados de azer un grande esfuerso en la lucha kontra el fasismo, el rasismo i el antisemitismo, la lucha por el puevlo de Espanya libera, por la liberasyon de la umanidad de la bestyalidad fasista i de la servitud.

Los antifasistos de todos paizes se auneron en la lucha para vuestra libertad i la muestra.

Entre los veluntaryos de las brigadas internasyonales, i partikularmente en la Brigada Dombrowski, se tyenen syepre distingido por sus eroismo, sus espiritu fr lucha, i sus devosyon por la lucha kontra el fasismo.

Afuera de Madrid, en Guadalajara, en Brunete, en Saragossa, en kada lugar ande muestra brigada se topo engajada en la lucha kontra su mas mortzal enemigo – el fasismo – los veluntaryos djudyos fue se toparon en primera linea, dando un egzemplo de eroismo, i de konsensya antifasista.

En konsiderasyon de sus grande numero i de la importansya de los veluntaryos djudyos en la Brigada Dombrowski, i kon la idea de onrar los kombatantes djudyos ke kayeron por la libertad, tenemos dechidado ke la Segunda Kompaniya del eroiko Batalyon Polako Palafox sera konosida komo la kompaniya Djudiya, yevando el nombre de Naftali Botwin.

El nombre de Botwin es karo para mozotros todos.

Botwin es el nombre de un lavorador djudyo de Polonya ke izo sakrifisyo de su korta vida en la lucha kontra la reaksyon i el fasismo, luchando kon koraje i muryendo kon eroismo, kondenado a muerte por un tribunal fasisto.

Su nombre es un simbolo, i su vida un egzemplo, de la lucha eroika de las masas djudiyas para vuestra libertad i la muestra, un simbolo de la slidaridad internasyonala i ermandad entre puevlos.”

El komandante de la XIIIena Brigada Dombrowski

Janek Barvinski
Komisar Politiko de la Brigada Dombrowski

Stach Matuszczak

El poeta yiddish Olek Nuss eskrive la marcha de la Kompaniya:

Kuando los batalyones militares republikanos adelantan,
Kuando la tyerra sangrea i la dinamita patladea,
Un kante akompanya las bandyeras volteando,
La marcha de los Botwins kantando al kombate.

Un kante de esperansa i de viktorya para milyones,
Ke kyeren bivir en la libertad i la djustisya,
I ke giya los bravos a la lucha finala.

No pasaran!

Adelantre, los bravos, kaminamos al asalto, mozotros los Botwins,
En las brigadas Internasyonalas,
Kon la armada de muestro puevlo.

Estamos unidos en muestra aborresyon de los bandidos nazis,
Ke kyeren opremir la Espanya, este pais sotometido,
Mampararemos el vedre-kolorado de la kampanya
Kon la bandyera de la unidad, arma en la mano.

En los rangos de ermanos de otros puevlos i rasas,
Ke endagora refuzan mizerya i servisyon,
Ferreramos las armas de las masas,
La frente de la Libertad, de la Paz i del Pan.

No pasaran!

No desharemos las armas de muestras manos,
Komo Botwin el gibor mos ambezo,
Asta ke el futuro mos apartenga,
Kuando el mundo liberado enfloresera de muevo.

I en este tyempo futuro sin gerra,
Muestros esfuersos seran akodrados,
Ke los askeres djudyos Botwin,
Echaron afuera la yaga fasista!

No pasaran!

Kale saver ke Olek Nuss, el ke eskrivyo este kante, sovrebivyo a sus firidas en Espanya, ama fue despues aferrado en Fransya durante la Okupasyon, embiyado a Auschwitz ande fue asasinado.

Edmond Cohen
Paris Fransya