Keridos amigos i mis amigitas,Kuando meti endjuntos A+B+C ahhhhhhhhh!!! Vide ke saver esto es no murir! Bivir para siempre! Kon todos los organos del puerpo lavorando a las mil maraviyas ! No mas kanser, no mas tension, no mas cholesterol, no mas diabetis, no mas hazinuras del ilgado i del korason, kedar mansevo kon un ten de bebe ! Kedar delgado sin nunka engodrar, durmir komo un gatiko, sin problemes en los intestinos i en la digestion, el sistem de immunizasyon lavorando komo a 18 anyos… No gripa, no toser, bivir sin abashada del todo, guesos fuerrrrrrrrrrrrrrrrrrrtes, sin el espanto de una paraliziya (has ve Halila !), sin el espanto del Alzheimer, kon una memorya piril piril komo un espojo…

Atyooooooooo ! Solo mursas ? Ay mirakolos i maraviyas… Di-o mos dyo todo djusto para BIVIR i NUNKA MURIR !…. Esto es la prova!

Yo me siento mijor kon los 12 kilos ke me se fueron…. Komer sin asukar del todo i MUY poko de azeyte de oliva…. Muy poka sal , sin frituras i kozas de orno echas kon arina.. Komer 6 revanadas delgadas al diya de pan bruno ! (55 kaloris/revanada). Komer poko kada 3 horas – Dieta de 1200 kaloris.

La natura entera es la mijor farmasiya ke egziste…. Para el uzo de todos…. Komeremos ! Kon salud i beraha… Ay de todo i mas i mas (domatas ke son buenas por el korason, para aflakar i para todo ! por
egzemplo), bamya, berendjena, spinaka (para azer sangre -fierro-), lentejas i prishil lo mizmo, kalavasikas (ni tokan ni pekan!) limones i portokales kon kivis i fragulas para muncho muncho vitamin C i
no tener grippa, kombatir mikrobes, kezos i leche (mijor yogurt i ayran) para guesizikos komo chufletikos !

Karpuz/pasteque/watermelon para arrefreskarmos en las temperaturas elevadas del enverano, muezes i avyanas en el friyo del invyerno ke mos alientan, mos arekayentan i mos regalan sanedad….

I por seguro…la reyna de las frutas las serezas.. No saviya ke eran tan buenas para la salud…. Me dizen de komer 12 deyas solo ! TODO SI, ESTO NO ! La sezon pasa presto… Ni 2 mezes a las derechas… Todo lo ke es bueno pasa presto….


A mi no me plazen mansanas (Komo por fuersa 1 kada diya !) i ke afita ? El anyo entero ay mansanas… Kita mansana mete mansana… Agora me ambezi de komer la Granny (ke es vedre) kon kanela/cinnamon. Ya esta mas aver livyano ! A propo… La kanela aregla la asukar de la sangre !

Kale saver ke

– Los kayisis/abricots son armas kontra el kanser, kontrolan la tension, protejan vuestra vista, protejan kontra el Alzheimer, se meten en medyo entre vozotros i la viejes

– El Artichoke ayuda por la digestion, amingua el cholesterol ,proteja vuestro korason, stabiliza la asukar en la sangre, vos proteja kontra las hazinuras del ilgado

– El Avokado kombate el diabet, amingua el cholesterol, ayuda a no tener paraliziya, kontrola la tension, ayuda para tener un ermozo ten.

 La Banana proteja el korason, es bueno para la tos, enfuertese los guesos, kontrola la tension, bloka la diareya.

– La fasulya/haricots/beans bueno para los intestinos, bueno para los varises, amingua el kolesterol, kombate el kanser, stabiliza la asukar en la sangre

 El Pancar/beets/remolacha/betterave/selek kontrola la tension, kombate el kanser, enfuertese los guesos, proteja el korason, AYUDA A PERYER KILOS

– Yabanmersini/Blueberries/Myrtille proteja del kanser, proteja el korason, stabiliza la asukar en la sangre, es bueno para la memorya, ayuda los intestinos.


– Brokkoli enfuertese los guesos, salva la vista, kombate el kanser, proteja el korason, kontrola la tension

– Kol/lahana/choux/cabbage kombate el kanser, bueno para los intestinos, AYUDA A PERYER KILOS, proteja el korason, bueno para los varises

– Melon/cantaloupe/kavun bueno para los ojos, kontrola la tension, abasha la cholesterol, kombate el kanser, enfuertese el sistem d’immunizasyon

– Karotas/safanorya/havuc salva la vista, proteja el korason, ayuda los intestinos, kombate el kanser, AYUDA A PERYER KILOS

– Koliflor/karnabahar/choux-fleurs proteja del kanser de la prostata, kombate el kanser del pecho, enfuertese los guesos, kura las firyidas, vos guadra de las hazinuras del korason

– Serezas (mi fruta preferida !) proteja el korason, kombate el
kanser, da un esuenyo repozado sin insomnias, guadra la persona manseva (es por esto parese ke me siento de 12 anios !), proteja de kontraktar el Alzheimer

– Kastanyas AYUDA A PERYER KILOS, proteja el korason, abasha el cholesterol, kombate el kanser, kontrola la tension

– Pimyentones chilli Ayuda la digestion, es bueno para kuando endjida el garon, alimpya los sinuses (bueno para la abashada), kombate el kanser, bueno para el sistem de immunizasion

– Igos AYUDA A PERYER KILOS (Vedraaaaaaa ?), ayuda a stopar la paraliziya, abasha el cholesterol, kombate el kanser, kontrola la tension.

 Pishkado Proteja el korason, proteja la memorya, kombate el kanser, ayuda el sistem de immunizasion,

– Keten tohumu/ flax ayuda la digestion, kombate el diabet, proteja el korason, ayuda en hazinuras mentalas,arregla el sistem de immunizasyon

– El ajo – la sevoya abasha el cholesterol, kontrola la tension, kombate el kanser, bueno por la gripa i la tos, ayuda el sistem de immunizasyon.

KE KEDEMOS SIEMPRE REZYOS I MANSEVOS !

sharope.blanco@gmail.com

LEAVE A REPLY

Please enter your comment!
Please enter your name here

Previous articleGet out your crystal ball! Take the 5779 Jewish pundit quiz
Next articleBasics getting to Kerala flood victims, with help of JDC, Indian Jewish community
Sharope Blanco

SHAROPE BLANCO lives in Istanbul (Turkey) Sharope Blanco, Economist and Language Teacher, Administrator and founder of the Yahoo’s group SEFARADI MUESTRO, where she writes and shares her poems, articles, memories and her novel ALMOND. She is also the author of countless poems and articles in English, French, Turkish and Djudeo-Espanyol. Her work will be published post-mortem according to her wish, by her son Nebil F. Behar, a doctor residing in England.

LEAVE A REPLY

Please enter your comment!
Please enter your name here