De Babel a Sefarad. La fin de una era

Despues de la destruksion del Segundo Templo, el sentro de la vida djudia paso a Babilonia para los proksimos sesh siglos.Gaon es en ebreo, el titolo de los prezidentes de las doz akademias talmudikas, de Sura i Pumpedita, ke avian egzistido en Babilonia. Fueron jeneralmente akseptados en la emprena era medievala, komo los lideres espirituales de mundo djudio. Konosidas en plural komo Gaonim o Geonim, estas personalidades tuvieron un rolo proeminente i desizivo en la transmision i la edukasion de la Tora i de la Ley Djudia. Ensenyaron el Talmud i desidieron sovre kestiones ke no eran rezolvadas de antes.

Kon la aparision de muevos sentros de estudios talmudikos i de eruditos eminantes en la Diaspora djudia, la dependensia en las doz akademias de Babel se iva amenguarse. De otra parte, los kalifes omeyadesde Kordova, ande se avia desvelopado una egzistensia djudia importante, no fueron prontos a aprobar los atadijos de los djudios kon estas akademias, basho la soverenia de sus rivales, los abbasis.

La dekadensia del Kalifato de Bagdad, el emprovesimiento de la komunidad djudia de Babel, el desvelopamiento intelektual de la Diaspora kon las persekusiones de los dirijentes abbasis i seldjukes, el periodo de los Geonim ke avia turado kuaji 450 anyos se iva terminado aproksivamente en 1040.

El anyo 1000 es maz o menos un mayor punto de infleksion en la istoria djudia. Reprezanta la tranzision de la era de Babel a la edad de Espanya, la tranzision del Este al Oeste. Es tambien la tranzision del periodo de tiempo konosido komo Geonim al periodo de tiempo konosido komo Rishonim – “primeras otoridades” – ke inkluye los illustres eskolarios de la Tora de Espania, Fransya i Alemanya, ke kontinuaron el desvelopamiento de la sivilizasion djudia.

En Babilonia no uvo asimilasion, porke los babileos fueron bazikamente zoroastros – paganos aparteniendo a un kreensia ke no tenia dinguna atraksion para los djudyos. La komunidad djudia fue una komunidad otonoma, poderoza, rika i erudita. Ke rezistio a la influensa del mundo musulmano, ke deveria de sakudir sus fundamientos, ma no lo pudo.

Los musulmanes en Babilonia tomaron muy seriozo el Islam. De otra parte, los djudios fueron siempre konsiderados komo infideles. Lo ke no era el kavzo por los moros, ke bivian en la Afrika del Norte i en la Espanya. Aun ke fueron konvertidos al Islam, eran pragmatikos i no adaptaron su fanatismo. Kuando nesesitaron medikos, ombres de literatura o filizofos, no se opozaron a eskojerlos entre los djudios i a uzar de sus kompetensia i sus servisios.

Del siglo IX asta el siglo XI, los arabos traversaron el estrecho de Gibraltar, i invadieron la Peninsula de Andaluzia – uno de los mas ermozos i fertiles payizes, kon un klimato kayente, i muy poko poblado en akeos tiempos.  Kon kuaji kada nave de moros ke akostava a Espania, arivaron i djudyos. Estos reprezentavan pratikamente todas las profesiones i todo modo de komersios. El prinsipal porto de Espanya en la mar Mediterranea, Cadiz , fue serrado el dia de Shabat, kuaji fina los tiempos alkavos. La razon era ke kuaji todos los kapitanes de barkas i komersantes eran djudios. Porlo tanto, esto se troko en una tradision, i durante kuaji sesh siglos, el porto kontinuo a ser serrado los diyas de Shabat.

En kada komunidad musulmana avia tambien djudyos. Todas las grandes sivdades de Espanya, tenian komunidades i institusiones djudias, entre estas, rabinos illustros i akademias. Los djudyos eran tambien apresiados komo medikos, i se okupavan de todo modo de profesiones, komo shastres, sapateros, artizanos de armas, i otras. 

Servieron en la armada. El rabino Samuel haNagid fue un famozo jeneral en la armada mora. Tenia atadijos kon las altas esferos de los sultanes moros. Dominava el arabo, era un peto notable i un diplomato influente. HaNagid no era solo el kapo dela komunidad djudia, ma ansi ke de la Espanya musulmana. Fue un djudyo devuado, ke uzo su poder para enforteser la komunidad djudia i la nominasion de los djudyos a postos altos, en asigurando ke no aygan leyes de diskrimasion kontra los djudyos. De mizmo, organizo kon el sultan ke deve de ser doz dias de repozo, el Viernes i el Shabat.

Este periodo de tiempo, empesando kon Samuel HaNagid se konose en la istoria djudia en tanto ke la Edad de Oro. No se avia nunka visto de antes una epoka tan favorable de egzilo, de punto de vista materiala i espirituala. Esta epoka egzistio durante tres siglos, empesando al dereder del anyo 1000 fin’a el anyo 1300, data de  la rekonkista de la Espanya por los kristianos.