Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Por empesar, vos akodro ke el proksimo atelye de konversasyon de Vidas Largas se tendra el lunes 13 de avril, de las tres a las sinko, en el Centre Communautaire.
Vos akodro tambyen ke agora las emisyones de Radio J se pueden oir sovre internet. Si el tekniko lo kyere byen, mi emisyon se puede oir kuando se kyere, eya sola, o de toda manera se puede oir indose kuando se kyere al kavo de la redifuzyon de la emisyon del djueves a la tadre.
El 26 de martes, uvo la inogurasyon del kal de Edirne, i el 31 de martes, ayego en Paris mi amigo Miguel Velazquez, venido de Orizaba, provinsya de Vera-Vruz, en el Mexico.
Empesaremos por el kal de Edirne. Kale saver ke en 1902, unos 17.000 djudyos biviyan en Edirne, vyeja sivdad de la parte evropea de la Turkiya. Estos djudyos veniyan de todas partes, no solo romanyotes o sefaradim venidos de Espanya o de Portugal, ama tambyen ashkenazim refujyados de los pogromes kristyanos, i tambyen karaim. Esto da a entender deke se topava 13 kales en esta sivdad: una para kada djiz o kada shishit, syendo ke kada uno kyere kantar asigun se ambezo de su chikez. Yo dainda oy no me puedo auzar a los nigunim del kal de Buffault ande me vo en Paris, porke me kedan en la kavesa los nigunim del kal de mi chikez i de mi mansevez, ande kumpli minyan i me kazi. I portanto se avla de dos kales sefaradim ande la diferensyas son chikas.
Ama lo ke afito en 1905 es ke en un solo fuego, los 13 kales se kemaron en djuntos. Ke azer? Los djudyos de Edirne dechidaron de fraguar un solo i grande kal para 1.200 personas (900 ombres i 300 mujeres), el mas grande kal de toda la Turkiya, i el treser mas grande de Evropa, despues del kal de Budapest (3.500 personas) i del kal de la Victoire en Paris (1.800 personas). Esto me akodra la istorya de la Mole Antonelliana en Torino, ke oy es el Muzeo del Sinema, ama ke al empesijo fue fraguada para ser el kal de los djudyos de Torino. Deviya de ser, i es, muncho mas alta ke el Duomo katoliko ande se topa la famoza mortaja atribuida al Kristo, ama muy presto los djudyos se espantaron de las ideas megalomanas del arkitekto Antonelli, i desharon la koza. Ama vos avlo, vos avlo, i esto todo mos alesha del kal de Edirne, fraguado en 1907 por un arkitekto franses, Depré, ke se inspiro del kal de Vienna.
Malorozamente, los djudyos de Edirne se toparon en medyo de las gerras balkanikas, djusto despues de esto de la Primera gerra mundyala, i despues de esto de los pogromes antisemites turkos de 1934. Empesaron a deshar la sivdad, ke a poko a poko se vazyo de kaji toda su povlasyon djudiya.
En kuanto al grande kal de Edirne, se topo abandonado, syendo ke no aviya mas djudyo para venir a azer orasyon en este kal.
A partir de 1983, dinguno se okupo mas de este kal, ke se derroko de suyo. Rachel Bortnick, la fundadora de Ladinokomunita, eskrivyo un artikolo muy esmovyente sovre este kal, ande mos konta en ke hal lo vido eya mizma en 1991. “En el tavan aviya un burrako grande de ande se via el sielo. I pasharos bolavan adientro i embatakavan enbasho…”
Finalmente el Governo turko dechido de adovar enteramente el kal, lo ke kosto 2 milyones de dolares i tomo 5 anyos de lavoro asta ke se pueda azer esta inogurasyon ke vos dishe, el 26 de marso.
Me enkanto un poko de ver este governo islamiko de Erdogan, ke tyene tanto odyo verso Israël, azer un tal djesto. En mismo tyempo, el hahambashi de Turkiya, Itzhak Haleva, syendo hazino i operado en ospital, Erdogan le telefoneo para dezearle buena salud.
Mijor de nada es, afillu si me demando deke fraguar un tal ermozo kal en un lugar ande no ay mas djudyo.
Los ermenis se amostran shupelis. En el sityo del collectif Van, eskriviyan en 2009 lo ke se paso para la iglezya ermeniya de Akhtamar: el Patriarko ermeni de Estambol, Mesrop Mutafian, demando la otorizasyon de azer ofisyos relijyozos en esta catedrala Santa Kruz adovada por el Governo turko, ama no tuvo la permisyon, ni tampoko de meter una kruz arriva de la iglesya.
Asigun los ermenis, esto todo es solo propaganda. Es vedra ke ay unos kuantos mezes, el Governador de Edirne, Dursun Sahin, aviya deklarado : “Kuando estos bandidos (kale entender los Israelyanos) asoflan el vento de la gerra arryentro de Al Aksa i masakran los muzulmanes, mozotros fraguamos sus kales”. Kon esta manera de avlar, los djudyos de Turkiya se topavan ser los mismos bandidos ke los Israelyanos. Uvo protestasyons en Turkiya, no solo de los djudyos, al punto ke tuvo de prezentar ekskuzas. Ekskuzas es byen, ama la shupe de los ermenis keda en la kavesa…
Kualo dizir? Veremos…
I agora tengo el grande plazer de tener a mi lado mi inyetiziko Lior, ke guadro oy, i mi amigo Miguel Velazquez, ke ayego de Mexico aze solo dos diyas.
Mi inyetiziko vos kyere dizir dos byervos:
Saludos a todos i fyesta de Pasah alegre, de parte de mi: Lior Cohen!
En kuanto a mi amigo Miguel, sin mas tadrar le vo demandar de avlarmos un poko de el, kyen es, ande bive, ke edad tyene, ets. I despues komo vino a interesarse a mozotros.