Munchos son los kuartieres de Yerushalayim ke yevan el nombre del filantropo Moshe Montefiori komo Ohel Moshe, Mazkeret Moshe, Kiriat Moshe i Zihron Moshe ma sin duda, el mas konosido de entre eyos es el muy ermozo i pitoresko kuartier de Yemin Moshe.
Moshe Montefiori, desendiente de una famiya sefaradi, ke bivio toda su vida en Ingletierra, vijito por primera vez en Erets Israel en 1827, epoka en la kuala no avia dingun edifisio afuera de las murayas de la vieja sivdad de Yerushalayim. Alientro de la sivdad ya no avia mas onde fraguar kazas i la povlasion bivia en kondisiones de estrechura.
Esta grande figura del djudaizmo sefaradi ke, durante su vida vijito en la Tierra Santa 7 vezes, se establesia en una grande tienda ke era alevantada afuera de las murayas, kon una guardia bien adekuada, segun lo azian los pelegrinos de su nivel sosial ke vinian a Erets Israel en akeyos tiempos. Es djustamente en uno de estos viajes ke el tomo la desizion de trokar la vida de los djudios ke bivian en los kuartieres alientro las murayas, en la provedad i la suzyedad, ekspozados a hazinuras i epidemias kavzadas por la falta de medios sanitarios minimales.
Su mas grande dezeo era de kitar a estos djudios del basho nivel de vida i de las malas kondisiones en las kualas bivian, fraguarles kazas mas komodas afin ke pudieran bivir en kondisiones sosiales mas mijores. Ma Montefiori no era la unika persona ke tenia a koro la komunidad djudia de Yerushalayim. Yeuda Touro, una de las figuras mas konosidas de la komunidad sefaradi de Estados Unidos, filantropo i buen amigo de Montefiori, avia deshado, a su muerte en 1854, una grande parte de su fortuna a su kolega inglez, para el benefisio de los djudios de Erets Israel.
Es ansi ke sovre su inisiativa i kon el ayudo finansario de Yeuda Touro, Montefiori pudo realizar su esfuenyo de tantos anyos i fraguar, en 1860, el Mishkenot Shaananim, el primer kuartier djudio afuera de las murayas de la vieja sivdad de Yerushalayim. Esta primera fragua era un largo edifisio, ke paresia de una sierta manera a una forteresa, kon el buto de protejar a sus abitantes. El tejado ke kuvria el largo kortijo era sostendio kon pilares de fierro konektados el uno al otro kon arkos, dekorados de manera muy sobre, ke se armonizava kon las las puertas i las reshas de las ventanas de la fragua. En el edifiso avia 16 apartamentos, kada uno de los kualos tenia dos kamaretas i una kuzina ansi ke una chika guerta.
En este muevo kuartier fueron fraguados tambien dos kales, uno eshkenazi i el otro sefaradi ansi ke un mikve para el banyo ritual. El pozo ke tenia una pompa a mano fue la kavza de una grande emosion al seno del publiko ke vinia a ver esta maraviya: el kolmo del modernizmo para akeyos dias. Mishkenot Shaananim, ke su nombre orijinal era “Kerem Yeudit ve Moshe” (la vinya de Yeudit i Moshe) fue la primera simiente ensembrada afuera de las murayas i de la kuala kresio la mueva sivdad de Yerushalayim.
Ma ainda antes de la konstruksion del Mishkenot Shaananim, el primer edifisio fraguado sovre las tierras ke avia me erkado Montefiori fue el famozo molino ke se topa en este kuartier i ke devino uno de los simbolos de la kapitala. El buto de la konstruksion de este molino era de abasteser arina a un presio mas barato afin de permeter a los proves tambien de poder merkarla. Para asegurar el buen lavoro del molino el avia embiado, de Ingletierra a Yerushalayim, un molinero eksperto en este kampo. Ma la vida de este molino fue bien kurta i su funksionamiento fue interrumpido kompletamente sea por dezareglos en su mekanizmo i sea por el fakto ke en Yerushalayim no avia bastante ayres fuertes ke podian aboltar sus alas.
Despues de esta primera inisiativa, el Mishkenot Shaananim kedo izolado serka de tres dekadas, ma aun kon esto el sirvio de exemplo para el establesimiento de muevos kuartieres djudios afuera de las murayas. Es solamente en 1892 ke fue fraguado, a su lado, el famozo kuartier de Yemin Moshe, ansi yamado a la memoria de este gran filantropo, ke antes de su muerte avia promovido su konstruksion.
Este muevo kuartier fue fraguado en un estilo enteramente diferente del Mishkenot Shaananim, kon kazas de dos etajes, kon techos de tejas koloradas i ke kaji kada una de eyas tenia un kortijo i separadas, las unas de las otras, por kalejikas i kalejonikos.
Desde sus prinsipios este muevo kuartier fue separado en dos: la parte eshkenazi ke su kaye prinsipal fue yamada Kaye Natan, al nombre de Natan Adler, el gran rabino de Ingletierra; i la parte sefaradi ke su kaye prinsipal fue yamada Yeudit, al nombre de la mujer de Montefiori.
A lo largo de los anyos munchos fueron los eshkenazis ke desharon el kuartier i eyos fueron remplasados por famiyas sefaradis. En 1920 los abitantes de Yemin Moshe avian adjustado puertas de fierro al kuartier afin de protejarsen de sus vizinos los arabos, ma malgrado todas las prekosiones tomadas eyos fueron atakados duramente, prinsipalmente durante los pogromes de 1929. El estado empeoro ainda mas durante los pogromes ke tuvieron lugar entre los anyos 1936-1939, kuando los arabos entraron a Yemin Moshe, maltratraon a los djudios i mizmo mataron a uno de eyos.
Kon la proklamasion del estado de Israel, el 14 de Mayo 1948 Yemin Moshe fue abandonado por sus abitantes ke pasaron a morar a otros lugares. Este kuartier, ke djugo un rolo muy importante, del punto de vista estratejiko, en la defensa de Yerushalayim, estava basho el fuego de los soldados jordanianos ke tiravan desde las murayas, a pokos sienes de metros a penas de las kazas en Yemin Moshe.
Kon el firmamiento del armistisio, en 1949, entre Jordania i el rezin fondado, estado de Israel, Yemin Moshe se transformo en frontiera entre estos dos paizes. En este mizmo anyo empesaron a yegar al paiz muevos olim de Turkia. Yosef Malki, ke enkaveso el komite de estos olim aksepto la propozision de la Adjensia Djudia de aresentarlos en Yemin Moshe, ke estava kompletamente abandonado, sus kazas estavan deskayidas, kon paredes derrokadas, sin puertas i ventanas i tejados rotos. La Asosiasion de los Turkanos en Israel ayudo a los muevos abitantes del kuartier a restorar sus kazas i a aresentarsen ayi sin tener ke pagar algo. Yemin Moshe fue konektado a la red de elektrisidad, a la agua koriente i a la kanalizasion solamente a los prinsipios de los anyos 50.
Kon el tiempo el kuartier se dezvelopo i muevos moradores, sefaradis i eshkenazis, se aresentaron ayi. Yosef Malki avrio el primer bakal del kuartier, en la kaye Malki, yamada a su nombre, djusto enfrente del chiko i ermozo kal sefaradi ke fue restorado kon el ayudo del Sr. Frank, el rabino eshkenazi de Yemin Moshe.
Despues de la gerra de Sesh Dias la “Asosiasion para el Dezvelopamiento de Yerushalayim Este” tomo la desizion de reabilitar el kuartier de Yemin Moshe i darle un muevo aspekto. La entision de los funksionarios de la asosiasion era de evakuar a los moradores veteranos dandoles una indemnidad ke les permeteria de merkar un otro apartamento, i en sus lugar traer al kuartier personas kon profesiones akademikas, i a sus lado artistas. Malgrado la opozision de algunos de eyos ke pretendieron ke esta es una indjustisia, en fin de kuento todos los veteranos, en sus mayoria sefaradis de Turkia, Bulgaria i Gresia, fueron evakuados.
Despues de una intensa restorasion de sus kazas i un dezvelopamiento environmental pasaron a morar a Yemin Moshe, ke se transformo en uno de los kuartieres mas ermozos de la sivdad, artistas, eskrivanos, pintores i mas.
Kon la inisiativa del “Fondo para Yerushalayim” (‘haKeren le-Yerushalayim) i el ayudo de la Fundasion al nombre del Kanseler Conrad Adenauer, el edifisio de Mishkenot Shaananim el tambien fue restorado i adaptado al konfor i modernizmo de muestros dias. Este edifisio istoriko es oy una rezidensia de luso para uespedes de onor ke vienen a Israel, prinsipalmente de los kampos de la muzika, del arte i de la akademia, i entre eyos laureatos del Premio Nobel de grande nombradia.
Al lado del Mishkenot Shaananim fue avierto un sentro de muzika onde tienen lugar konsertos kon los mas nombrados muzisianos del mundo. Entre los fondadores de este sentro puedemos mensionar a Isaac Stern, Pablo Casals, Zubin Mehta i Leonard Bernstein.. .
El Yemin Moshe de oy es muy diferente. El molino es un muzeo ke konta la istoria de este kuartier i de la famiya Montefiori. Debasho del molino, detras de una grande vitrina puede ser vista la replika de la karosa orijinal kon la kuala uzava viajar Montefiori i ke fue kemada unos kuantos anyos atras.
En Yemin Moshe, una de las perlas de la kapitala, no se oye mas avlar el ladino, ni se oyen mas las kantigas de amor i romansas ke kantavan las mujeres kuando kumplian sus keazeres en kaza. I el yasemin, ensembrado en kutis de teneke, desha dezear su golor ke salia de los kortijos espandiendose en las kalejikas estrechas i mesklandose al ayre limpio de Yerushalayim. Este pasado tan valorozo i autentiko, oy, no es mas ke istoria, aun ke no tan leshana
De otra parte, los moradores veteranos de Yemin Moshe vienen a este kal, asta oy dia, en Shabat i en las fiestas, kon sus ijos i sus inyetos. Ayi tienen lugar tambien alegrias familiales komo bodas i Bar Mitsvas.
Este kuartier, kon su vista maraviyoza, sus kazas, sus guertas tan bien miradas i su ambiente tan kalmo atira kada anyo a miles de turistas ke vienen de todas las partes del mundo.
Puedemos dizir ke Yemin Moshe i Mishkenot Shaananim, ke sus istoria es una parte integrala de la istoria de Yerushalayim, son de entre los simbolos i testigos ke azen de la kapitala de Israel uan sivdad del pasado, del prezente i del futuro.