Miri en los kashones…… Topi esto …. Lo troki,
lo lavi…..lo visti ….
Kon una immensa soriza para todos !
ESTA SHAROPIKA KE ME AZE MIRADAS !
Yo i Sharope Blanco somos en vezes muy amigas
Afita ke mos peleyamos i mos mostramos las unyas !
Ya la konosesh ! No tiene gueso en su lingua !
Lo ke tiene de dizir lo dize komo bever agua..
No va pensar ke diran, komo lo tomaran, si se puede !
No ! Vazyara su korason, olvidara lo seko i lo vedre !
Maaaaaaaa…. Es buena, komo sharope i karinyoza
Se apiyada de todos, kere ambezarse i es kuryoza !
Kavesika no tiene tanto ! S’olvida todo lo k’estudya !
Se da aires de savida, s’emleska, ma riye d’eya para eya !
Kuando la veygo kon los mushikos tristes i sin su soriza
Los ojos abokados, su kavesa de lado komo la torre de Pisa
Me se parte l’alma, la kero aregalar, darle todo el amor
Este karinyo dulse, esta karesa ke la envelopa kon kayntor.
……i en un diya ke la kije aregalar ansina le di :
LOS DIEZ KOMANDAMIENTOS DE SHAROPIKA
1. A LA HAMAYA KE SE VAYGA LA DIETA !
Sharopika luzya, tu no t’estrecheyes….
Si te s’apreta el korason, no t’olvides
El mupak esta ayi para ke gostes
Todo lo del frijider, i todo lo ke izites
Burekas, supa, aroz , gayna i dulsez….
Sharopika luzya, tu no t’estrecheyes….
Si te s’apreta el korason, no t’olvides
El mupak esta ayi para ke gostes
Todo lo del frijider, i todo lo ke izites
Burekas, supa, aroz , gayna i dulsez….
2. NUNKA LAVORES I TE KANSES
Ken es el korasoniko de esta kaza ? !!!
Mi amorsito, kale ke t’akodres de esta fraza..
Para ken i para ke lavorar, lazrar i kansarte ?
Todo esta limpyo i echo ! Porke alevantarte ?
Desha ke lo agan ! Toma tu livro i espandete
3. JUGA I ENGLENEATE EN TU VIDA
Kerida, si’stas sola i no tienes dingunos
Koza ke no t’inche ! T’asperan tus jugos !
Avre el internet , topa todos tus amigos…
Engleneate kon los biervos i kon los dados
No te plaze l’uno ? Ay siempre otros sityos
4. NUNKA TENGAS SELOS !
Ke mas puedes tener en la vida ?
Porke selarte ? No te manka nada
Goza de lo ke metites debasho de l’almada
Toma, merka i no penses a la manyana !
Mira tu vizina kon brilyantes… ma no kamina !…
5. PELEYAR ALLARGA TUS DIAS !
Mi borekita kon ojos d’almendra ! Kukla….
Ke sepas ke avra siempre “animales sin kola”
Eyos te van a inyervar i te toparas muy sola !
Peleyate! No lo tomes aryento ! No estes kayada
Si kale gritar grita i no kedes triste i abatida
6. KE SEPAS FUYIR A PIEZES DESKALSOS !
Joya mia, no siempre puedras reushir i ganar…
Afitara vezes ke “el sin kola” va kerer kemar…
Ni un segundo penses ! No es tiempo de juzgar!
Korrrrrrrrrrrrre lo ke puedas! Salvate sin kedar
Fuyir es ganar, no es ora de amar i de yorar !
SEJ son los primeros komandamientos no tanto seriozos
EL SIETEN es alesharte de los envidiozos i los negros
EL OCHEN es respektar penseryos etikos i filozofikos
MUEVE va ser azer lo tuyo ma oyir lo ke dizen los otros
I EL DIEZEN es nunka olvidar tu Amigo en los Sielos
ESTA SHAROPIKA….
Ayyyyyy esta Sharope ke Satan mizmo se selo !
No uvo i no avera un korasoniko tan limpyo.
Un topiziko de chokolate i krema tan savrozo..
Es modesta ! Seguro…Si no konta la grandeza !
Alimpya i esponja SM kon su prostela de dantela..
Ofre sorizas, likor i bonbones mizmo si no ay nada….
Sus amigos son su vida i lo ke tiyene de menester,
Porke sin amor i karinyo, el diya no puede amaneser.
Las kolores dezaparesen i el sielo no se puede ver.
Es kon sus keridos solo ke oye los biervos divinos,
Todo se illumina, se divyerte eskrivyendo kuentizikos.
Sharope es mar, montes i flores, luvya, rios i tirguelos !
De un nada i de mil bavajada topa plazer en la vida
Echale una pelota de lana i pishin veras su soriza
Kuando se trata de SM, desha todo, se olvida de si-mizma
Noches i demanyanadas, tiempo de lavoro i las fiestas
No importa dolores, alegriya, dolyos o hazinuras
Todo se adjunta, se mleska… i, SM komparte sus diyas.
Sharope Blanco