FIDEL CASTRO – EL DIKTATOR DE CUBA
Un guerrero komunisto, el mas odyado i el mas amado por las mujeres, por su puevlo i los otros puevlos…
Fidel Castro es un personaje ke marko la politika inernasyonal de la segunda mitad del siglo 20 . Serro sus ojos a la edad de 90 anyos en Habana el 25 de Novembre 2016. Lo remplasa en el poder des de 2008 ofisyalmente, su ermano, Raoul Castro ke informo ke el Governo tomo la desizyon de 9 diyas de luto nasyonal, fina el 4 Desiembre 2016, diya ke sus restos seran kremados asigun su dezeo. Los ke no lo suportaron i estavan kontra de el i pormodo de esto se fuyeron a Florida, deklararon ke selebreran fiestas durante estos 9 diyas….
RAOUL CASTRO
Raoul nasyo en 1931 Fue la mano derecha de su ermano durante 47 anyos fina el 2006 kuando la hazinura de Fidel lo asuvyo al poder i 2 anyos mas tadre fue el Prezidente ofisyal de Cuba. Komo Fidel, estudyo ande los Jesuites en Santiago de Cuba. Fidel lo nomo el Komandante de las Fuersas de Tierra, Mar i Aire de la Republika i mas tadre fue desinyado Ministro de la Fuersas Armadas Revolusyonaryas fina ke tomo el lugar de Fidel Castro en 2008. Se kazo kon Vilma en 1969, su kompanyera de guerilla lakuala fina su muerte en 2007 estava a la kavesa de la Federasyon de Mujeres Cubanas. Tuvyeron 3 ijas i un ijo enjuntos. Raoul konvertyo los militares Cubanos en un klasa privilejyada i fue el Governante fina 2018. Fue assignado a tomar su lugar a Miguel Diaz Canal. Izo reformas i dyo libertad de viajar a los Cubanos, de ser patrones de kazas i de autos i tener sus proprios echos.
FIDEL – BIOGRAFIYA I SU VIDA PRIVADA
No abastariya un livro entero para kontar la vida de Fidel Castro…. Nasyo en el anyo 1926 en Biran, al Este de Cuba. Era el ijo natural de un emigrado Espanyol Gallego, Angel. Su madre Lina Ruz era Espanyola tambien. El teniya 40 anyos i eya 19….Endjuntos tuvyeron 7 ijos, entre eyos Fidel i Raoul. Angel tuvo 5 ijos de su primera mujer Maria Luisa ma solo Maria Lidia i Pedro Emilio sobrebivyeron. Angel i Lina eran analfabetos ke aprendyeron a meldar a sus edad madures i yegaron a ser los duenyos de tierras i una buena situasyon ekonomika malgrado sus familyas muy modestas. Fidel tuvo otros 11 ermanos. Eran 7 ermanas i 5 ermanos, de las dos espozas de su padre.
Fidel Castro era un hombre muy viril de 1.91 m. Guerrero ke no saviya deskansar i ke nombravan “el kavayo”…. Las mujeres estavan lokas boladas por el i disheron ke era el mijor amante del mundo ! Todos los diktadores son enkantadores de serpientes i Fidel lo fue des de su kuna de oro por ser ijo de rikos tenientes de tierras i un avokato mansevo. Ni se puede imajinar kuantas Cubanitas i Latinoamerikanas kayeron basho su influensa i pasaron por sus brasos.. Tuvo 7 ijos i 2 ijas, 9 kreaturas ofisyales i ken save kuantos otros en todas los lugares de ande paso…..
Tuvo una alemana, la ija de nazis sovrebivientes, Marita Lorenz de Bremen ke yego a los Estados Unidos. Teniya 19 anyos i el 30. En kontrapartida de sus refujyo, deviya pagar el presyo… Matar a Castro ! Estava preparada para azerlo en su viaje a Cuba, ma kuando el lo devino i le entrego la arma dizyendole “matame !” eya le respondyo ke no lo puediya porke estava enamorada de el….. Torno a New York. Tuvo un ijo kon Fidel. Se lo kitaron dizyendo ke nasyo muerto. Ma estava bivo. No se supo ni su nombre ni ande lo eskondyeron…
La amiga de Hilda, la mujer de Che Guevara, (1928-1967) mediko i famozo guerillero i revolusyonaryo, kompanyero i mijor amigo de Fidel Castro, fue la primera ke amo por un tiempo. Se yamava Lucila Velazquez i teniya 20 anyos. Konta ke Fidel se kazo kon eya por gratitud porke no lo denunsyo malgrado ke fue torturada justo komo la mujer de Che…. Eran los primeros tiempos de sus aktivitades guerrilleras, kuando pasaron a Cuba kon el barko “Gramma”, tiempos de prizyon, del bestial i korrupto Fulgencio Batista en Cuba ke todos odyavan… El viento se yevo este amor.
Fidel se kazo kuando era studente en derecho kon Mirta Diaz Balart, una ermoza manseva de klasa i leshos de ser una guerillera de kampos. Su famiya eran amigos de los Batistas i su regime de bala, kuchiyo i korupsyon. Tuvyeron un ijo : Fidel Junior. Sus relasyones fueron yeladas i Mirta fue presto remplasada por Natalia Revuelta, una Habanera fuego i flama, la mas ermoza i la mas sensual de la sivdad… Le dyo su unika ija Alina ke se fuyo de Cuba i se izo model en los Estados Unidos. Bive modestamente en Miami i nunko torno a Cuba. Natalia tambien no lo puido guadar por muncho tiempo.
Fidel se torno a ser el amante de Celia Sanchez, komunista pura i dura i su sekretaria privada, su perro guardian por 30 anyos !
Ma… No le basto “al kavayo”…. Juana Vera lo kito loko…. Su Juanita, su traduktora del Inglez al Espanyol ke lavorava tambien en sus servisyos sekretos. Mando munchos a la prizyon i a la muerte ! Brutales meritos ke no alkansaron a konkistar el korason de su patron por muncho tiempo…
Fue Pilar (o Pili) ke se asento a su lugar… Lavorava en la kompanyia de aviasyon Cubana kon lakuala Fidel Castro viajava. Era tambien su traduktora en Fransez. I esta historya termino dospues de un tiempo.
Fidel se namoro de vedra de su segunda mujer. Una maestra de eskola Dalia Soto del Valle. Se konvertiya en un perro detras de sus fustas kuando estavan enjuntos ! Por sierto ke la enganyo munchas vezes ma kompartyo 45 anyos de su vida kon eya…. Tuvyeron 5 ijos. Alex, Alexis, Alejandro, Antonio y Angelito. Todos con “A”: kapricho de Fidel en honor de Alexandro el Grande, el konkistador Grego de mas de la mitad del mundo i ke siempre admiro. Demasyado suenyos dorados por el leader de una izla ke produize rom, azukar i tabako !
Solo kon Dalia sufriyo una dura dada….El, “el kavayo” el amante de todas las mujeres ! Dalia lo enganyo kon el ofisyal enkargado de su sekuritad ! Fue el shofer ke se lo konto. La devota Dalia ! La madre de sus ijos, la ke biviya siempre kon el en la mansion Punto Cero del kartye Siboney ! Se alesho un sierto tiempo de su kaza ma no puido estar leshos i torno ! Lo echo del echo al shofer ke le revelo el enganyo porke se espanto i todo se kalmo…..
UN GUERRERO, UN DIKTATOR
Fidel Castro fue un grande leader politiko, diktator komunisto, revolusyonar, militar, avokado diplomado de la Universitad de Habana, grande fumador de los famozos puros habanos -ke desho en 1970- un membro de una famiya numeroza kon munchos premios i distinksyones. Un ex-katoliko ke bolto a ser un atheisto….
Teniya 21 anyos kuando formo parte de la invazyon para derrokar el diktador Dominikano Rafael Trujillo. Fuyo de justessa kuando lo apanyaron…
Un anyo dospues en 1948, fue embiyado a Columbia para enkontrar el kandidato prezidente J.E. Gaitan… La mizma tadre este fue assasinado en la revolta “Bogotazo”.
A su regreso a Cuba se kazo kon Mirta Diaz Balart ke era una studente de Filosofia. Se fueron a New York i se installaron en Manhattan. Kijo terminar sus estudyos en Harvard. En 1950 obtuvo su diploma en Leyes.
En 1952 denunsyo a Batista a un Tribunal de Urgensya por violar la konstitusyon, los delitos ke kometiya ma no puido obtener un kavzo i es alora ke desidyo ke Batista se puediya derrokar solo kon fuersas armadas… Lo ke empeso en 1953 kon Raoul Castro. Los guerilleros kombatyeron de manera muy dura i uvo munchos muertos. Lo metyeron en prezo i salyo kon la amnistiya de 1955. Fue egzilado a los Estados Unidos i a Mexico dospues.
Empeso su lucha revolusyonara en 1956 kon Che Guevara, Raoul Castro, Juan Almeida i Camilo Cienfuego.
La guerra de guerillas kontra Batista empeso en Sierra Maestra. Eran 800 kombatantes kontra los 70.000 de Batista. Reusheron a ser viktoryozos i el 1 de Enero 1959 se proklama el triumfo de la Revolusyon. Fue proklamado primer ministro i un mez dospues, Prezidente Komandante en Chefe de las Armadas kon todos los poderes un mez dospues, fina 2008.
En 1959 viaja a Venezuela i diskute kon el Prezidente Betancourt, a los Estados Unidos i diskute kon el Vice-Prezidente Richard Nixon i a Argentina, Uruguay Canada i Brasil.
Kavzo otr’un poko una guerra atomika kon Rusya i los Estados Unidos en la kriza de los missiles en 1961. Rusya aviya embiyado missilas a Cuba i Kennedy, alora Prezidente de los EU demando ke fueran embiyadas atras. Castro demando a Krushtchev de ambiyar sus bombas atomikas ma los naves tornaron atras a Rusya kon kondisyon ke Amerika iva retirar sus missilas a la frontyera en Turkiya i esto es lo ke fue… Amerika metyo sanksyones i solo alimentos i kuras puedyeron ser embiyados a Cuba. Fue el embargo komersyal, ekonomiko i finansyero.
En 2008 anunsyo ke no dezea i ni aksepta mas ser el Prezidente i Komandante en chefe del Estado i ke el mijor ke puedriya remplasarlo seriya Raoul Castro su ermano ke estava por 49 anyos lavorando a su lado. Raoul fue elegido Presidente de Cuba por la Asemblea Nasyonal del Poder Popular.
sharope.blanco@gmail.com