Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Por empesar, vos akodro ke el proksimo atelye de konversasyon de Vidas Largas se tendra el martes 6 de marso, a las dos i medya, en el Centre Communautaire. Estos atelyes son avyertos a todos, venid munchos.
Vos akodro tambyen ke las emisyones de Radio J se pueden oir por internet sovre el sityo de Radio J, de toda manera en direkto, i tambyen despues en la redifuzyon de la mediudiya entera.
Antes de empesar mis emisyones de oy, vos kyero dizir ke no vo pueder azer una emisyon en direkto el djueves ke vyene, 22 de fevrero, porke tendré de okuparme en kaza de mi inyetiziko. Ke keresh, vuestro servidor es papu, lo ke kyere dizir ke de vez en kuando, vyene a ser tambyen el servidor de sus inyetizikos (ke son por la mayoriya inyetizikas).
Ama, si kyere el Dyo, mi emisyon sigyente, la del primo de marso, sera, en franses por una vez, una entrevista kon el Doktor Maurice Soustiel, ijo de Joseph Soustiel, muy famozo antikaryo de kozas oryentalas, de orijen selaniklia, ke teniya su botika en Paris, 146 Bd Haussmann. Es la istorya de su famiya, sovre todo durante la gerra, ke mos konta su ijo, ke dyo djustamente komo titolo a su livro 146, Bd Haussmann. Akonsejo a los ke entyenden el franses de oir esta emisyon en direkto si lo pueden.
I agora vengo a mi emisyon de oy.
Ay serka de diez anyos, el 4 de septyembre 2008 para ser presizo, vos ize una emisyon intitolada “Los djudyos partikolares”, avlandovos de munchos puevlos, milyones de djente, ke eyos mismos se dizen desendyentes de uno o mas de los diez trivos pedridos del reyno de Israel (kuando fueron deportados por los Asyrianos en 722 antes de la era kristyana).
En medyo de todos estos, vos dishe esto:
Serka de los Karens, en el nordeste de la Indya (sovre todo en la provinsya del Mizoram) i en Birmaniya, biven los Shinlung.
Los primeros misyonaryos kristyanos ke ayegaron en Birmaniya en el empesijo del siglo XIX se enkantaron de topar povlasyones ke konosiyan las istoryas del Tanah sin tener dingun kontakto kon el djudaismo o el kristyanismo. Se dizen vinidos de Kina ay muncho tyempo, i ke los kinezos les arrovaron sus pergamino. Kreen en un dyo uniko, el Dyo de Menashe. Uno de los nombres de los Shinlung es Lu-chi, lo ke kyere dizir diez trivos.
No tyenen dingun eskrito, ama tyenen una tradisyon orala singun la kuala el trivo de Menashe fue, en 721 antes del Kristo, embiyado komo los mueve otros en Assiriya, i de aya en Afghanistan, i despues de aya en Tibet i en Kina, ande los Cohanim mantuvyeron las kostumbres israelitas. I de Kina se fueron en Birmaniya i Indya.
Tyenen munchas kostumbres ke son israelitas. Ay un Cohen en kada kazal, ke aze sakrifisyos komo se konta en el Tanah, ke se viste kon korona sovre la kavesa, i un pektoral komo un efod.
No tyenen derecho de komer karne kon sangre, azen mila del ijiko en su ochen diya, los ombres tyenen un vestido komo un taleth, kon ilos blus. Azen, komo los Pashtunes, lo ke se yama en lashon el yibum (le lévirat), kijo dizir kazarse kon la bivda del ermano muerto sin kriatura. No ay relasyones entre marido i mujer kuando la mujer tyene la sangre, lo ke en lashon se yama la nida, i kuando s’eskapa la mujer aze una immersyon, ets.
Lo mas kuryozo son los kantos tradisyonales ke kantavan sin entenderlos…i empesaron solo a entenderlos kuando konosyeron el Tanah !
Estos kantos avlan del amor de Tsion, del kamino en el dezyerto, del Monte Moria i del Monte Sinaï, todas kozas ke konosiyan antes de konoser el Tanah.
Los misyonaryos los izyeron kristyanos, ama agora son 3.500 ke se izyeron djudyos (i no solo israelitos). Yo vide un filmo muy kuryozo sovre estos djudyos kon kara de birmanos, ke, en medyo de las sharras de Birmaniya, kantan en lashon i baylan la hora…I 200 de entre eyos izyeron su aliya i biven agora en Israel, o, por munchos d’entre eyos, en el Gush Katif, serka de Hevron, en los territoryos, komo se dize.
Ansina se eskapava lo ke vos diziya sovre este puevlo aze unos dyez anyos. Halbuki, este lunes, mi amigo Jose Molho (bendicho sea, ke azeriya sin el?) me embiyo una video de agora, un reportaj en franses de la kadena de televizyon France 24 sovre los mismos, yamados Kukis, i no Shinlung, ama no ay yerro posivle, se avla de los mismos, afillu si me ambezi munchas kozas ke dainda no saviya.
Por egzemplo, el reportaj mos dize ke afillu si “unos kuantos son kristyanizados,” yene todos, yamados Kukis, se pelean kontra el governo de New Delhi para la independensya, kon una bandyera yevando un magen David, i todos se saven, si no djudyos, a lo manko israelitos desendyentes del trivo pedrido de Menashe.
Son un puevlo gerrero, i por esto es ke los ke izyeron sus aliya, ke agora ya son 7.000 ama ke van a ser muncho mas, se topan en los territoryos, en Kiryat Arba, serka de Hevron, frente a miles de arabos enemigos. No solo los mansevos i las mansevas azen el askerlik en Tsahal komo los otros israelyanos, ama unos 200 entre eyos entraron en las fuersas espesyales.
El reportaj amostra bivyendo en kaza los ke izyeron sus aliya. Todos dizen ke no aboltaran en Indya, afillu si guadran uzos de aya, i sovre todo la komida. La mueva jenerasyon ya se mesklo al kusur de los otros israelyanos i azen agora parte de muevo del puevlo de Israel 27 siglos mas despues.
Una vez ke empesi kon lo ke teniya yamado dyez anyos antes los djudyos partikolares, me akodri ke, en 2013, el 25 de avril, aze mas o menos sinko anyos, ize una otra emisyon, intitolada “Otros djudyos partikolares”. En esta emisyon, vos avli (a parte de los Japonezes) de los Lemba i de los Danites, dos puevlos de Afrika ke se dizen israelitos.
No kale konfundir estos puevlos, ke se dizen desendyentes de los trivos del tyempo de Israel, kon los pretos bantus ke eyos pretyenden sovre internet ke son eyos el haliz Israel del Tanah, i ke los djudyos son mentirozos i enganyadores i no tyenen nada de ver kon el puevlo del Tanah, ke syempre fue preto. Youtube i internet son yenos de talas bavajadas.
En mi emisyon de 2013, tomandolo de una emisyon, La source de vie, del haham Josy Eisenberg, de bendicha memorya, vos diziya lo ke sige sovre los Danitos:
Agora, para aboltar a los Danitos de la Côte d’Ivoire, es un pastor, ke se yama Robert Dion, ke desde vente anyos se interesa a las orijenes de su trivo, ke se topa en un lugar yamado las 18 montanyas, ke asemeja un poko a la Suisa i por esto es diferente de los otros lugares de Afrika. Este pastor eskrivyo (en franses) dos livros para azer konoser lo ke asigun el amostra las orijenes israelitas de su trivo, ama mismo si pudo ver el embashador de Israel, la djente en jeneral no se intereso a lo ke el sosteniya.
I un diya, en 2010, el govyerno de Côte d’Ivoire fraguo en Abidjan un muzeo de las sivilizasyones del pais, i un haham se hue a vijitarlo, i aya aviya una parte konsagrada a la etniya de los Danitos. I este djudyo fue muy enkantado de ver el vestido sagrado de los papazes danitas, syendo ke este vestido, ke se puede ver en la emisyon ke vos dishe, asemeja muncho a un taleth. Esto le travo la atensyon, se metyo a estudyar los livros del pastor Dion, i vyendo ke aviya de mirar esto todo de mas serka, avlo de esto a los hahamim de Israel ke se okupan de los djudyos partikolares, i eskaparon por embiyar aya una delegasyon de dos hahamim avlando franses, i un sineasto ke ya aviya echo un dokumentaryo sovre los djudyos del Mizoram, entre Indya i Birmanya, ke dizen desender del trivo de Menashe. Ya vos avli de estos en mi vyeja emisyon de 2008. I djustamente es la primera parte del filmo echo por este sineasto ke vide alhad. Kuando los hahamim israelyanos ayegaron en Côte d’Ivoire, dainda no aviya la paz, porke el Prezidente era Gbagbo, kontestado por Ouatara i sus partezanes . No fue kolay de viajar.
Esto dicho, los hahamim israelyanos feron enkantados i tresalidos de ver el entuziasmo de la djente ke les demandavan sus bendisyones. «Kuando kamino en Yerushalaïm, dinguno me demanda de bendizirlo, ama aki si ! » I el haham les aziya la beraha de los kohanim… Los hahamim fueron arresividos kon muncha konsiderasyon por los kapos de la etniya, i admetidos de entrar en sus salas de palavra, kon la kondisyon de vestir el vestido asemejante a un taleth, lo ke izyeron.
Tyenen munchos uzos ke dizen venir de sus orijenes israelitas : la sirkonsizyon, i tambyen una koza kuryoza, kale ver komo tokan el shofar, i otras kozas. Komo va aver mas despues una sigunda parte de la emisyon ke dainda no vide, me vo kedar aki por la ora, i puede ser vos avlaré de muevo de estos Danitos ke se yaman tambyen Yakuba, ke se asemeja al nombre de Yaakov avinu.
Ansina se eskapava mi emisyon de 2013 sovre los Danitos. Lo ke vos dishe, lo topi de muevo sovre una video de Youtube;
Vos akonsejo de ir a bushkar esta video sovre youtube en clikando en Google sovre Aux origines d’une tribu juive originelle en Afrique noire
Este titolo es falso porke, en vedra, la video no mos avla de un solo trivo, sino a lo manko de kuatro puevlos leshos los unos de los otros:
Kale dizir ke la video no es klara, i da la impresyon de todo mesklar. Ama en vedra mos avla en primero de los Lemba del Zimbabwe, en sigundo de los Beta Israel de Etyopiya, en treser de los Igbos del Nigeria, los tres en ingles kon subtitolos en fransez) i solo despues, en kuatren esta vez en franses, de los Danitos de Cote d’Ivoire.
Mismo si vyenen en medyo de la video, vos kyero avlar en primero de los Igbos, ke yo syempre oyi yamar Ibos kuando se avlo de la gerra sivil ke empeso en 1967 entre los Ibos del Biafra i los Nigeryanos dirijidos por el jeneral Yakubu Gowon. Los Ibos del Biafra fueron enserrados por la armada nigeryana, i vimos a la televizyon kriaturas paresyendo a deportados de Aushwitz, muryendo de ambre. Asigun los istoryanos, uvo entre un milyon i dos milyones de muertos. El Biafra, dirijido por el kolonel Ojukwu, eskapo por kapitular en 1970 i aboltar en el seno del estado del Nigeria.
Esto todo, ya lo saviya, i penso ke vozotros tambyen vos akodrash de este terrivle drama. Ama lo ke mos dize esta misma video de Youtube, antes de avlar de los Danites de Cote d’ivoire, es ke los Ibos, o Igbos, eyos tambyen, seriyan de orijen israelita!
En vedra son eyos mismos ke lo pretyenden – entre el minuto 3 i el minuto 6 de la video. En jeneral son kristyanos, ama se dizen yene djudyos o a lo manko de orijen djudiya…i esto es muevo para mi.
Por lo ke es de los Lemba del Zimbabwe, de los kualos ya vos tengo avlado en mi emisyon de 2013, la video mos akodra ke los Kohanim lembas tyenen el mismo ADN ke los Cohanim djudyos, esto ya lo saviyamos i en mi emision de 2013 vos aviya dicho lo ke sige:
Los Lemba, malgrado lo ke vengo de dizir, no son konsiderados komo halizes djudyos por los hahamim. Syendo ke yo no so haham, no tengo kompetensya para dizir si tyenen razon o no.
Ama por lo ke es de perteneser por la sangre al puevlo djudyo, los lemba tyenen un argumento muy fuerte : es el ADN. Munchos lemba tyenen en la sangre lo ke se yama el aplotipo de los Cohanim. No kale demandarme lo ke es un aplotipo, syendo ke, en mas de no ser haham, no so tampoko savyo en biolojiya. Ama asigun lo ke meldi, estos lemba tyenen el mismo tipo de sangre ke los djudyos Cohen, ke son konsiderados los mas puros desendyentes de los antiguos djudyos, syendo las leyes sovre los kazamyentos del Cohen, ke, entre otras interdiksyones, no puede kazarse kon una konvertida. A la rovez, i por otras razones, un Cohen se kazava munchas vezes kon una Cohen. I si me demandash kualos son estas otras razones, kreo ke ya lo sé : una ija Cohen no topava de kazarse kon un otro ke un Cohen, porke un otro ke Cohen le deviya onor vida entera por modo ke era Cohen, i esto, un orgulyozo no lo soportava. I yo me akodro ke mi vava era muy kontenta de aver tenido tres ijos i no ija, porke era un grande dert para un Cohen de topar de kazar a su ija. Kaliya topar un Cohen.
Esto es lo ke vos diziya en 2013. Lo ke parese muevo en la video de agora no es muy klaro: parese ke un profesor ingles yamado Trudor Parfitt a visto una koza yamada Nguma, ke tyene un atadijo kon la Arka de Alyansa, i ke a sido traida por estos Cohanim. Ama no mos amostra la koza ni mos dize muncho mas.
Estos todos pretos de Afrika, Lemba, Ibos, Danitos, son dainda kristyanos por lo mas, ama ke se pasariya si todos se aziyan djudyos i demandavan a aboltar en Israel? I los Pashtunes de Agfganistan, ke son milyones, oy muzulmanos?
Komo el chiko Estado de Israel puedriya arrekojer tanta djente?
Esto es la kuestyon ke un pastor, el senyor Jean-Marc Thobois, a demandado al haham Avishail, el ke se okupa de estos todos iisraelitos pedridos i topados. El pastor lo konta en una video ke tyene por titolo “les 10 tribus d’Israel, perdues et retrouvées”.
El pastor mos da la repuesta del haham: mi lavoro, dize el haham, es de ambezar i permeter a estos puevlos de aboltar en Israel. Una vez ke van a empesarlo, el Mashiah va pueder vinir para arrekojerlos i el es ke va rezolver este problema, ke no es el miyo. El miyo es solo de ayudar la venida del Mashiah!
Sovre esta repuesta me vo kedar para oy, i vos digo al djueves primo de marso kon Maurice Soustiel, si kyere el Dyo!