Kada Koza A Su Lugar !….

ORGANIZAR SU VIDA  empesa por metter kada koza a su lugar i no solo las kozas de tres dimensyones (!)  Las kozas sin dinguna forma tambien pueden molestar mizmo mas de lo ke se puede ver i tokar…  Estos pensamientos sin fin ke a vezes ni mos deshan durmir en paz…. Muestra ravia, muestra pena, el eskarinyo, el dezeo, el odyo i mizmo la alegriya i la felisitad…

No kale olvidar ke kada persona detiene las “yaves”  de su proprio repozo i las puede uzar basta ke sepa komo servirse de estos….  Portanto es bastante simple !

Kale izolarse delantre de una meza kon papel i un kalem (lapiz).

Eskrivir uno dospues del otro, dando numeros, a  “kada” koza ke mos deranja fizikamente i mentalmente, i no topamos un remedyo o ni pensimos si ay un remedyo o no.  Dar de  1  a 10  notas-valores a esta lista asigun la molesta ke mos kavza.  Dospues puedremos estudyar kada uno de lo ke mos molesta i tratar de topar una solusyon….. Empesando por seguro por lo mas fasil, seguros de mozotros i kon fe ke para kada koza ay un remedyo a la eksepsyon de la muerte !  La buena voluntad i el optimizmo son lo ke nesesitamos lo mas…. Sorizas, divertimientos mentre “lavoramos”  es primordial tambien….  No olvidar ke para mozotros somos lo mas presyozo i  al kual kale dar lo mas de “karinyo”  i importansya!  Por egzemplo no vale la pena DEL TODO de selarse de alguno mujer komo hombre !  A la fin de la oja todos somos los mizmos kon un poko mas por aki o un poko menos por aya i estas “pokitas”  de kozas no azen dinguna diferensya dospues de un tiempo…Mas kurto ke largo !  La buendad del korason i la amistad, el kalmo i las dulses palavras siempre ganan al fin del kuento.

La rikeza es ser kontente de lo ke se tiene….  Todos dezeyan kozas ke les mankan o ke kijyeran lograr.. Del mas povre al mas riko… Dingunos no estan kontentes kon lo ke tienen a la eksepsyon de los ke son intelijentes i saven apresyar la ermozura de una flor, de un kavesaliko brodado, de un par de kalsados muevos en Rosh hashana, de un pranso riko en Pesah… Estos siempre seran felis porke la felisitad no se topa kon las “kozas”  ma kon la rikeza de los ojos artos i el korason yenno de karinyo para todo lo ke el Kreador krio.  Lo bueno komo lo negro para el ekilibro de la vida i del mundo.

No me vo meter a enumerar los aventajes de meter todo en su lugar i evitar de ser “dezordonado”en kaza komo en el lavoro.  Todos savemos ke es una pyedritad de tiempo de meterse a “bushkar”,  los inyervos por esta bushkada, i la mala humor por horas…. Muestros aguelos diziyan  “el orden  en el meoyo, el orden  en la aldikera i el orden en el korason”  penso ke es la yave de una vida akumplida….. Ademas, saver echar o dar las kozas ke no se uzan mas… No son nesesaryos en muestra vida MIZMO si valen muncho i son ermozos,   azen partido de las memoryas….  Las memoryas biven en mozotros i no en un regalo ke mos regalo una x persona…. O un souvenir de muestra chikes….. Mas importante devemos bivir el  “Oy”  i no el “Ayer”  i kon mas pokas kozas bivimos mas limpyo sera muestro entorno, manko echo tiendremos i mas repozado sera muestra miente….  Es provado kon munchos eskritos, livros i psikologos….

Es kuryozo ma pensar bien i azer las kozas komo se deve es internasyonal !  Ke seya los Eskandinavos, ke seya en Amerika o en el Oriente Medyo (!)  la lojika nunka troka…. Se save ke ansina de personas sufren lo mas poko, son mas felises i ekilibrados.  Son mas sanos, alegres i tienen mas konfiensa en eyos….

De la mizma manera es prepararse a partir de este mundo i tornar a la tierra de ande todos somos…..  Kale saver meterse al lugar de los ke vana tener kudyado de las kozas del kerido ke no esta mas….i no se avla solo de los vistidos i de los kalsados ma de lo ke se guadro por anyos i anyos en los kashones, en los almaryos i mizmo en las paredes i en todos los lugares ande el defunto paso sus diyas…. Triste echo lo mas del tiempo….  Es por esto ke deve ser el kudyo, i mizmo  el dover, de la persona de enkargarse de esto antes, i muncho mas antes (!)  de murir porke  nunka savemos kuando va sonar la hora buena…

Yo lo ize antes muncho tiempo !  Lo ize en pensando ke lo ke a mi me interesa, yo amo, yo empleyo, tiyene valor para mi solo i kon grande probabilitad se echara a mi ida, no deve ser al kudyo de los ke kontinuaran sus vida sin mi….  Si 2 anyos pasaron sin ke se toke la koza ke se guadra se utiliza o se bushka, esto es la guarantiya ke no se tiene de menester i deve salir afuera !  Dar, vendido, al sierkol komo se kere…. I espajar lo mas ke se puede…. I azer esto lo admeto ke no es fasil !  Porke psikolojikamente es la prueva ke  “estamos” i “estaremos”  todo el tiempo ke mos akompanyan muestros “souvenirs”… Mos  aunamos a las kozas materyales antes de realizar ke absolutamente nada de este mundo aze partido de muestra egzistensya eterna i saver esto, es renderse kuento ke todo lo ke logrimos, por lokual lavorimos, sudimos para tener, poseder, koleksyonar, yorar o ser felis,  deshar todo i partir a vezes, i no avlo de los “ladrones, i kozas rovadas (!)”  de muestra alegriya si topimos embasho  en la kaye una maniya o un aniyo de grande valor (!)  o de muestra pena si lo peryimos  ets…. en realitad no tiyene dinguna sinyifikasyon…. dinguna valor, es ayre, umo i siniza…..

Todos los seres keren siguir bivyendo porke es el Kadosh baruh Hu ke kijo ke ansina seya… Todo ser ke bive aktua asigun este instinkto ke  es la vida mizma… Esto komporta no tener ser,  topar kon kualo artarse, saver kombatir i defenderse para kedar en vida, no sufrir de kalor o de friyo, sintirse al abrigo i leshos del peligro, kudyar por los chikos i tratar de kurarse o rekuperar en kavzo de aksidente o hazinura.

Estas kondisyones son validas para los humanos komo para las bestyas  -se trata mizmo de las plantas fina un sierto grado- .  Todo el resto, todo, todo es la  “hambre”, los ojos ke nunka se artan del humano, sus ambisyones i su orgulyo, su komforte, su poder, su “yetser ha ra”  ke no tiyene nada de komun i mizmo kontraryo kon lo ke tiene de menester dospues de murirse…. Todas las relijyones mos diktan ke tenemos 2 alternativas.  Ser “buenos” ke es amar la Ovra del Kreador, tomar parte del “tikun ha olam”  i ayudar los menesterozos o ser “negros”, bivir solo por los plazeres de la vida materyal sin kudyar al bien  estar de los otros, azer el mal en kurto, asegun  lo ke mos aprendyeron…. Porke todos savemos lo ke es el “bien” i el “mal”   instinktivamente o por tenerlo oyido.   Va depender unikamente de mozotros kon ke modo de aksyones vamos a inchir muestros sakos invizibles ke mos akompanyaran en muestro largo viaje spiritual.

Tendremos muestra kosiensya repozada o tormentada ?  Puedremos “deskansar en el repozo” o “kastigados”  en muestra alma ?

Diyas de Luz i de Paz para todos

Sharope blanco