Las mujeres no deshavan de aser los menesteres de la kasa kon el frío busaná ke asía esa demaniana, Flor Capeluto fregaba las savanás para kaplear las kolchas, Matilda Chikuriel en la grande pileta del kurtijo lavaba las kamisas kon lejía i Sarina Galantealimpiaba la kamareta, era viuvda sin ijos i sus ermanos moravan en la siuvdá de Córdoba , lavoraba kuziendo fostanes para el magazin alavado de Aron Sadrinas, temprano ajarvaba la puerta el mansevo kon las telas, las etchava enriva de la mesa, las estiraba punía el molde ke los tinía enkolgados de la paré, tomava la tiza i kortaba ….lo kurioso ke siempre tomava un pedazo de kada una i la guadraba en el kajon de la makiná, dninguno demandava para ke gradraba un pedaziko, despúes se asentaba en la makiná i ampezaba a kuzir kasi el día entero, solo se alevantaba para aserse un poko de kumida, esponshava los platos i pishin avoltaba a la makiná.
Asía unas semanadas ke morava en la kaza i poko darsava kon Flor i Matilda, ama era simpatika, benadam i niurlía pero una kosa yamava la atansión, la vinían a bushkar i ansina komo estaba vistida se etchava el paltó tomava la chanta i pishín fuía, a veses tadraba en tornar , ese notche Reyna Surijón le demandó si pudía ir a la kasa, morava a pokas kalejas i kaminando por eyas ampezó a demandarle ke le akontesía, el buto era ke la elmuera estaba preta de kalentura , gumitos i shushulera, dunke el medikó le dio medisina no mejorava.
Ayegaron i entraron djuntas a la kamareta ande estaba etchada la elmuera , era djoven, lusia de ojos i kaveyos pretos komo el kimur, Sarina la miró a los ojos , le pasó la mano por la kaveza ampezó a dizir unos vierbos en vos basha, tomó sal i seguía diziendo vierbos enmientras iba etchando la sal por detrás , kuando eskapó de esto ampezó a kontar los burakos del puerpo tres veses, enmientras dizía : ajos i klavos, ajos i klavos, …kuando eskapó de esto disho ke al dia siguiente iba a aserlo untrona vez.
Reyna asintió i asperó komo disho, esta vino sola ya konosía el kamino, tomó la mano de bronse de la puerta para yamar i kedó kon eya en la mano, estaba komo la estreya de Djojá, a lo ke ajarvó la puerta kon la mano, Reyna avrió se saludaron i fue a ver a la elmuera, demandó komo se sintía, kontestando ke un poko mijor de la shushulera i los gumitos , ama ainda tinía kalentura, Sarina ampezó a aser lo mesmo del día anterior dunke esta ves pudimos sintir lo ke dizía: todo modo de mal ke se vaiga a la dip de la mar, kuando terminó abrió la chanta i le dío una bulsika para ke se la etchara enriva, demandaron todos ke tinía adientro i Sarina arespondió : esta ijika estaba ojeada solo ize una kemeá para protejerla , adientro le puse: ojikas de ruda, siete klavos de olor, siete dientes de ajo , un ilo de kovre , un kuerno rojo i kuando podesh enkontrar una piedra blu.…..todos kedaron kayados, a Reyna se le tomó el suluk, pero Sarina ampezó a eksplikar : las ojikas de ruda, los ajos i los klavos por las golores fuertes etcha los malos penserios de ken kere aser mal , el ilo de kovre por el metal ase ke se aleshe, el kuerno rojo i la piedra blu por las kolores paran el ojo burakado, esta bulsika debe yevarla siempre enriva para ke no le akonteska mas esto, ama antes de irme vo a dizirle otro prekante: ke en este puerpo no aiga dningun mal , vate mal , salí mal i vate a la fortuna de la mar, todo el mal ke se vaiga a la dip de la mar…..la elmuera ke no kreía en estos deres, agradesió a Sarina kolgándose la kemeá ke le abía trushido, este fue el punto ande Reyna le enkolgó el shaday de oro de su madre i ke abía trushido de Izmir.
Kuando tornó a la kasa, Matilda i Zimbul se akavidaron para kualo guadraba pedasikos de telas i de ke, tinía una grande planta de ruda i una ristra de ajos enkolgados en la ventana de la kamareta, la kunvidaron a tomar kafé kon kuraviés i mulupitas resién salidos del forno i le disheron: Sarina buenas oras tenga, el Dio ke te de vida i salú para kontinuar aprekantando, konta kon mosotras para lo ke tengas de menester ke: mas vale un buen vizino ke un ermano i primo.
Vosotros ke estesh bien i mosotros también i mas mal no mos agan, i komo dize el reflán: el pan de la vizina es milizina…. semanada buena ke tengash, amen ve amen.