Un ancho sukseso se akontesió en la Konvensión el pazado martes 20 de Febrero en la ermoza Sede de la Real Academia de la Lengua Española, (Rae) en Madrid.
Munchos mos topimos konvokados para la dezisión ke se kería tomar de si la Akademia Nasionala del Ladino salía adelantre, kon el buto de dar proteksión a muestra lingua, dempués de dos días de análiza onde partajaron akadémikos, tanto espanyoles komo israelíes, presonalitades i munchos amigos i profesionales dedikados a muestra ermoza lingua, ansí se dió empesijo la sesión de klausura de esta importante Konvensión kon el buen javer de la kreasión de esta importante Akademia ke dará proteksión a muestra lingua i distintas aktividades.
Para prinsipar el Sinyor Shmuel Refael Vivante de la Real Academia Española en Israel, meldó el akodro de konstitusión de la Akademia Nasionala del Ladino en Israel, ke suskrivieron los akadémikos prezentes en esta destakada konvensión, i ansimezmo se konvokó a profesionales i distintas djentes dedikados todos a muestra kultura, ansí komo algunos amantes de muestra lingua.
El akodro dizía ansí:
Darío Villanueva, Matilde y Viviana Barnatan
Los abasho firmantes, akademikos de la Real Academia Española deklaramos ke durante la konvensión akadémika del judeoespañol selevrada en Madrid los días 19 y 20 de febrero de 2018 por inisiativa de la Real Academia Española (Rae) akodramos krear una Akademia Nasionala del Djudeoespanyol- Ladino de Israel. En funksión de muestra dezisión solisitamos de la Autoridad Nasionala del Ladino i su Kultura prinsipiar las djestiones korespondientes ante el Estado de Israel, en la Sede de la Real Academia Española, en Madrid a 20 de Febrero de 2018.
Todos aplaudimos esta dezisión tan importante kon muncha alegría.
Ansimezmo Shmul Refael Vivante meldó el akodro en lingua ivrit.
Dempués de los aplausos tomó la palavra Tamar Alexander-Frizer, Presidenta de la Autoridad Nasionala del Ladino i su Kultura (ANL), rengrasió a la RAE i a la Fundación Hispanojudía por esta oportunidad de poder krear una Akademia Nasionala del Djudeoespanyol-Ladino, adjustó ke desde la Autoridad Nasionala del Ladino van a ofreser lo ke ay de menester kon el buto de krear esta Akademia, i ke en siendo la ANL el primo organismo para la difuzión de la lingua i la kultura djudeoespanyola en Israel , la Akademia, será una Akademia Israelí Nasionala i todos sus membros serán sivdadanos israelíes, la Akademia se topará basho el Ministerio de Cultura del Estado de Israel, tanto ansí komo las unotras akademias. El ministerio de Cultura dará apoyo de moneda a la Akademia traverso el proyekto eksistente i la Akademia aktuará en los markos de la ley, en siendo ke la ANL respektará la independensia de la Akademia.
Tamar Alexander destakó ke el Profesor Shmuel Refael, ke es membro de la Autoridad Nasionala del Ladino ansí komo membro korespondiente de la RAE, será koordinador entre la RAE, la Autoridad Nasionala del Ladino i la Akademia del Djudeoespanyol-Ladino.
Tamar Alexander-Frizer y Matilde Barnatan
Entre las djentes unos dizían ke si la yamamos “djudezmo”, o “sefardí” ke si “djudeoespanyol” es lo más djusto, ma lo ke mos importava era ke todos mos topábamos en el mezmo lugar kon el mezmo buto. La Academia Nasionala del Ladino en Israel es una realitá.
Ansina ke selevranos entre los amigos, representantes de instituciones, eskritores, i distintas presonalitades del mundo kultural espanyol i de siguro, sefardí. Es por esto ke mi madre Matilda i yo mezma mos topimos kontentes de ser parte de esta importante Konvensión. Mos topimos kon munchas presonas ke tuvimos el placer de konoser anyadas atrás i de enrejistrar para los programas.
Ansimezmo tomaron la palabra David Hatchwell, Presidente de la Fundación Hispanojudía, y asta poko tiempo atrás Prezidente de la Comunidad Judía de Madrid, ke rengrasió este momento dulse i este momento istóriko por poder krear esta Akademia de la Lingua Djudeoespanyola, prinispiando kon una orasión de “shejeyanu”, muy ermozas todas sus palavras.
D. Daniel Kutner, Embajador de Israel en España, ansimezmo muy esmovido en primo lugar rengrasió a la RAE, a su Director Darío Villanueva por la organizasión de la Konvensión i avló de la importansia de konservar i ensenyar la lingua sefaradí, para konservar el legado kultural komún, destakó la importansia de esta lingua eskrita i avlada ke konservaron los djudiós refuzados de Espanya, i ke se konservó grasias a las personas ke la avlaron, destakó los tiempos de konbivensia i la importansia del mundo djudió i sus aportes tanto en kultura komo en sensias, estudios i literaturas a España.
Dempués, por dar fin al akto el Direktor de la Real Academia Española, Darío Villanueva destakó la importansia de konservar esta lengua ke dunke no es espanyol tyene una baza de la lingua espanyola y destakó la ermozura de muestra lingua.
Viviana y Matilde Barnatan
Darío Villanueva rengrasió tanto al Embashador de Israel, komo el apoyo para esta mueva Akademia del Ladino i a los membros de la RAE por las djestiones de esos dos días i rengrasió ansimezmo a dos direktores anteriores de la RAE, komo a los diversos membros de la RAE en Israel, prezentes en la Konvensión, al Instituto Salti, a D. Isaak Navon z’l, a la Fundación Hispanojudía, la Embajada de Israel i al Centro Sefarad-Israel.
Darío Villanueva adjustó ke pudo sintir muestros programas en la Radio Nacional de España en dizien ke sintir el djudeoespanyol en boka de las presonas ke lo konosen i aman djenera una repuesta en los espanyoles al sintir la lingua de sus antepazados, una lingua ke destakó por su ermozura.
Ansí kreyemos mi madre Matilda Gini Barnatán, i yo mezma, ke se avre una mueva puerta para la konservasión de muestra lingua, ke savemos bien kenes la avlamos i la ensenyamos i la amamos, ke siempre se topó i se topará biva.
La tadre dió fin kon un kóktel entre los amigos ke selevramos este gran proyekto, este gran nasimiento de la Akademia Nasionala del Djudeoespanyol-Ladino i partajamos unos rikos dulzes sefardíes ke mos desharon ansí komo este importante javer, un muy buen savor en la boka:
¡Adelantre a la Akademia del Djudeoespanyol- Ladino en Israel, por amor a Sefarad!.
Viviana Rajel Barnatán
Subdirectora de Emisión Sefarad
Radio Exterior de España
Radio Nacional de España