Miyentas kaminavamos mano kon mano kon la zinganika kon ojos de estreya, esto maraviyozo de oyer ke ermozo avla el sefaradi, mi amigita mueva.
Kon kuryozidad le demandi komo se anbezo la lingua Judiya. Me arespondyo kon muncho orguyo i alegriya ke eya nasyo en la kaza grande de mi tiya Beki en su propya kama de la tiya BEKI, i su madre CANLI son oy mizmo KOMADRONAZ/komadres i tyenen permiso del governo para azerlo.. KOMADRONAS del vizindado. Yildiz disho ademas ke mi tiya BEKI la ayudo a parir a su madre. Mi tiya BEKI kuando le vido los ojos disho: BU GOZLER YILDIZLAR GIBI PARLIYOR (Estos ojos estan briyando komo las estreyas) i entonses le metyeron su nombre YILDIZ (Estreya) Es por esto ke el tiyo HAYIM la yama ESTREYA i ke kon eyos siyenpre avlo i avla en espanyol. Su padre i madre komo no teniyan religion a poko a poko la famiya entera se izyeron JUDIYOS.
YILDIZ…. kuando mos aserkimos a la puerta misteryoza me apreto la mano kon su mano pekenyita. Un apretadiko tan kayantiko ke sinti algo en mi ser muy INESPLIKAVLE.
Avrimos la puerta i ke tenemos en frente de mozotros en una kamareta chika.. Doz mules aryento. Aznos grandes nasidos de aznos kon kavayos.
Estoz Mules son de mi primo YUSEF el avukato ke loz utiliza para asuvir a loz altos ande se estan fraguando BEYT A HAYIMES / Simetaryos para los ke kayeron en la guerra de MUSTAFA KEMAL ATATURK i ke son soldados de la NUEVA ZELANDYA, INGLATERRA i AUSTRALYA. YUSEF esta enkargado de reportales a estaz nasyones i ver ke todos los papeles legales estan en REGLA. Parese ke en este enkargo le pagan un salaryo muy alto.
La tanti BEKI moz esta yamando, ke era hora de vinir a kaza para lavarmos i refreskarmos kon un poko de BOZA un beveraje de MIJO MAJADO (millet) agua i azukar
Mi papu moz enformo ke no ivamos kontinuar el viyaje a ESTANBOL kon vapor ma mos ivamos ir kon el OTOMOBIL de YUSEF ke deviya el mizmo ir a Estanbl por una reunyon de avukatos judiyos.
AHHHHHH YILDIZZZZ…
Dospues de refreskarme korri ande YILDIZ para dizirle Adiyo.
Oy me anbezi una koza mueva… Ke uno puede sintir amistad i enamorarse muy rapido kuando el espirito esta kontente (todo parese ermozo, en paz i bueno)
A KONTINUAR kon los kaminos de la parte de EVROPA para yegar a ISTANBUL i abrasar mi madrezika.