El Dio Santo Bendicho kreo al mundo kon 3 elementos. “B’sefer, V’sofer, V’sippur/El livro, El ke konta i La istoria”. Kuando kae el Livro Santo, lo bezamos. A los livros viejos i arrankados los enterramos. Mismo a un rabino, 2 siglos antes era kosa muy rara. de tener en su kasa 300 livros. Oy kon la fasilidad de imprimir i grasias al presio ke viene mas barato los eskolares tienen paredes yenas de livros en sus kasas en temas relijiosas i en otras temas. Librerias grandes i signifikantes se topan en las universidades i en el Vaticano. Ayí se topan manuskritos i livros djudios de valor grande. Una parte grande de los libros djudios fueron destruidos en Europa en tiempo de los Nazistos. En la Universidad Ebrea se topan mas de 5 millones de livros i tienen la koleksión la mas grande de Djudaika i Ebraika.
En noche de Shavuot en muchas sinagogas tuvieron “Tikkun Leil Shavuot” kon lekturas i diskusiones entre grupos. Tenian extraktos del Kode de la Biblia i de la Mishna al lado de otros livros santos. Un livro era “Sefer Yetzirah/Livro de kreasión” atado a la Kabbala i avía una frase ke me atiro la atensión. “El Dio Santo i Bendicho” kreo al mundo kon 3 elementos. “B’sefer, V’sofer V’sippur”. Esto explika todo. Kisas los livros kambiaron de format kon el tiempo, ma el prinsipio es el mismo. Oy avanzamos verso la Era Dijital. Es ke el CD es un komponente del livro? Yo lo regreto si es. Livros elektrónikos no se usan en Shabat. No ay substituto por los livros. El Lubavitcher Rebbe dezía “Bayit Male Sefarim/Kaza yena de livros” Son los livros ke krean el ambiente djudio. Asi se absorban las tradisiones del pasado.
En una okasión me topi en el estudio del Rabino “Chaim Gutnick” avlando de siertas kestiones en la komunidad. Se fue a su komputer i me demando de meter ayí estas kestiones i me disho ke el metería su signatura. Esto mostrava ke el no se servia del komputer i lo dejshava para su mujer. Después le demande komo es ke el komputer se topava en su librería.? Me respondió diziendo ke en el komputer se topava una seria de CDs de la Universidad Ebrea ke kontenian 1000 volumes de responsas rabbinika, eskrita sovre el tiempo. Yo le demandi si unos kuantos CDs eran el ekivalente de una multitud de livros grandes? El me disho “Kuando Moshe Rabeinu se abasho del Monte Sinai tenia 2 tabletas en sus manos. Kontenian la Tora entera. Asta oy dinguno lo entiende komo 2 piedras pueden kontener toda la Tora”. En verdá unos kuantos CDs tan chikos ya pueden kontener todo”. La kestión es de saver komo akseder a esta informasion. Tenemos ke ambezarlo.
Trezladado por Simon Geron
Sydney
Fuente: Ladinokomunita