Vos kontare una historya ke me sorpyendo muncho. Yo no lo saviya !
El inyetiziko de un esklavo preto nasyo en “Back of Town”, un kartye muy prove de la Mueva Orleans en los Estados Unidos. Era el anyo 1901. Su padre abandono la famiya kuando su chiko era dayinda bebe. Su madre se vendiya a los ke la pagavan….Dunke fue la grandmama i su ermana ke engransdesyeron la kreatura.
Muy presto se puediya remarkar el talento i el intereso del chiko por la muzika. Empesaron a kantar en las kalejas de New Orleans kon otros
tres amigitos suyos. Los ke pasavan delantre de eyos les echavan unos groshes…. Dospues de las sinko klasas no se fue mas a la eskola…
Un diya lo remarkaron una famiya judiya, los Karnovsky, ke aviyan emigrado de la Lithuania a los Estados Unidos. Se apiyadaron del chiko de 7 anyos en las kayes i lo trusheron a sus kaza. Al empesijo le dyeron kozikas de azer para ke “gane” su komida… Se kedo kon eyos, durmyo aya i por la primera vez en su vida estava tratado kon buendad i karinyo. Kuando era la hora de durmir la senyora Karnovsky
le kantava kantikas de kuna i el se adjuntava a eya ! Mas tadre, se ambezo a kantar i a jugar munchas kantikas Judiyas Rusas.
Dospues de un tiempo, la famiya Karnovsky adopto el chiko ofisyalmente. Le merkaron su primer instrumento de muzika komo era la kostumbre de las famiyas judiyas. Admiravan sinseramente su talento muzikal….
Kuando se engrandesyo, se izo un muzisyano i un kompozitor profesyonal. Uzo las melodiyas judiyas en sus kompozisyones komo el “St.James Infirmary” i “Go Down Moses”. El pretiko chikitiko se izo famozo i eskrivyo un livro sovre esta famiya judiya ke lo aviya adoptado en 1907.
En memorya de esta famiya suya i fina la fin du su vida yevo la Estreya de David ensima de el, dizyendo ke fue de eyos ke se ambezo komo ser determinado i komo se deve de bivir.
Vos akodrarash de su nombre… El chiko se yamava Louis “Satchmo” Armstrong. Louis Armstrong era orguyozo de avlar el Yiddish komo su propria lingua ! ” Satchmo” en Yiddish sinyifika “karikas aunfladas”!
Fue el mas grande jazzisto de todos los tiempos….. Era un virtuozo de la trompetta, dirijo su orkestra, kanto, izo filmos… Se kazo 4 vezes i todos pensavan ke no tuvo kreaturas.
Aki arriva “Satch” i Lucille Armstrong… Kazados por 29 anyos….
Se deklaro muevamente, dospues de 42 anyos de su muerte, ke tiene una ija ke se yama Sharon Preston-Folta, de 52 anyos. Parese ke siempre fue allado de su madre i de su ija, les merko kaza i los mantenyo. Pensava kazarse kon la madre ma no puido espatirse de su mujer, Lucille ke lo amava ensima de todo, era intelligente i fuerte de karakter. Serrava los ojos a la infidelitadas de su marido para no yelarlo de su kaza ! Se okupava de las finansas, lo akompanyava en sus viajes i en kurto era su braso derecho !
“Satch” se muryo en su esuenyo de una kriza de korason en 1971. Teniya 70 anyos. Mas de 50 anyos bivyo en las senas, siempre amado, bushkado i alavado por sus anes ke lo adoravan….