Mis vakansas en la montanya

Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Komo ya vos dishe, agora Radio J tyene un sityo internet. Agora mis emisyones se pueden oir en el mundo entero indose sovre Radio J kon internet, sea en direkto, sea kuando se kyere: mis emisyones son enrejistradas a mi nombre.

Esto dicho, kuando vos deshi al kavo de mi emisyon del de djunyo, ay mas de doz mezes, me kedi dos mezes en vakansas, el mes de julyo en Paris, el mes de agosto en Megeve, la sivdadika en la montanya ande estuve por la primera vez en 1943, aze 71 anyos de esto…

Ya konti aki deke me topi en Megeve en 1943. Vos akodro ke la kuatrena armada italyana vino okupar los Alpos fransezes el 11 de novyembre 1942, kuando, komo konsekuensa del debarkamyento de los Amerikanos en Afrika del Norte, los almanes i italyanos vinyeron okupar la zona sur de Fransya ke aviya kedado asta aya sin okupasyon asigun los akodros de armistisyo.

Lo ke se paso es ke, a la rovez de los almanes i del governo franses, los italyanos, en vez de persegir a los Djudyos, los protejaron, travandoles por fuersa de las manos de la polisiya franseza ke los keriya aferrar para darlos a los almanes, komo izyeron ande no aviya italyanos. La polisiya franseza aferrava a los djudyos en la zona ande no aviya almanes, i los embiyava a los almanes tresalidos. Kijo azer la misma koza en la zona ande aviya los italyanos, ama los italyanos no desharon aferrar dingun djudyo. A la rovez, rekizisyonaron oteles, por egzemplo en Megeve, para salvar djudyos fuyidos no solo de la Fransya del norte, ama tambyen de Evropa, por egzemplo de Beljika.

Vyendo esto, el governo franses se aravyo, i me ambezi solo este enverano, meldando un livro, ke por pizma i para impedir a los italyanos de rekizisyonar todos los oteles de Megeve para los Djudyos, el governo franses rekizisyono todos los oteles ke kedavan para kriaturas fransezes kristyanas sufriyendo de la gerra. Asigun el ke eskrivyo el livro ke meldi, i ke era el mizmo una de estas kriaturas, esto fue dechidado no para el byen de las kriaturas, sino solo para azer danyo a los djudyos i ke no se puedan salvar ande los Italyanos.

Konti tambyen aki lo ke se paso el 17 de marso 1943, ke mos ambezimos solo muncho mas despues:

Joseph Antignac, del Commissariat Général aux Questions Juives, insista sovre el menester de una estracha kolaborasyon entre italyanos i almanes en la lucha kontra los djudyos. Von Ribbentrop, ministro alman de los echos ajenos, intervyene personalmente verso Mussolini para obtener su ayudo. El 17 de marso 1943, el embashador alman Mackensen demanda a Mussolini de dar todas las kompetensyas sovre los djudyos a la polisiya franseza o almana, o, a lo manko, a la polisiya italyana, i no a la armada italyana.

Mussolini ya esta pronto para achetar, kuando el mismo diya, su direktor de los echos ajenos, Luigi Vidau, ayudado por Giuseppe Bastianini, otro diplomato, un fasista konvensido, ama ke no kyere del todo a los almanes, demanda a Mussolini de trokar su desizyon. Vidau i Bastianini amostran a Mussolini un rapporto kontando las matansinas de los almanes en Polonya, i un raporto del embashador italyano en Berlin dizyendo ke munchos djudyos an sido asasinados por gas. A estos dokumentos, los dos diplomatos italyanos adjustan una nota dizyendo ke dingun pais, mismo la Almanya aliyada, podriya demandar a la Italya, kuna de la kristyanidad i del derecho, de ayudar a tal matansinas por las kualas el puevlo de Italya devriya dar kuento un diya.

El diya despues, 18 de marso 1943, Bastianini i Vittorio Ambrosio, kapo del Estado Major jeneral de las armadas italyanas, van a ver a Mussolini i obtyenen ke troke su desizyon. Ansina, afillu los esfuersos de los Almanes, i, ke verguensa, de los fransezes, los Italyanos mantyenen la proteksyon de los djudyos.

Sin ke los djudyos lo sepan, la vida de miles de eyos fue salvada en estos dos diyas de 17 i 18 de marso 1943 (solo por unos kuantos mezes, malorozamente, ama en estos tyempos, kada diya de vida era una viktorya). Fue salvada por tres ombres yamados Vidau, Bastianini i Ambrosio. Kyen se akodra oy de estos tres ombres ? Solo konosemos a tal djugador de futbol, ke supo byen djugar kon el balon, i mos olvidamos de ombres ke salvaron a miles de djudyos, i por tanto agora lo savemos.

Vyendo komo los djudyos eran byen kon los italyanos, mi padre reusho de ayegar en Megeve en mayo 1943, i eskrivyo a mi madre ke aviya kedado en Paris de venir kon mi, ke estava eskondido ande una kristyana, Mme Sauty, tambyen en Paris.

Mi madre me tomo kon eya, i kon el ayudo de un pulis ke le izo falsos papeles a su nombre (Boutrouille) i ke vino kon mozos por el treno, mos topimos en junyo 1943 los tres en djuntos en Megeve, mi padre, mi madre i yo.

Esto todo para dizirvos ke konosko esta sivdadika de haleshentos. En 1945, mos aboltimos en Megeve, esta vez para las vakansas. Para mozotros la gerra era eskapada ama en el Pasifiko kontinuava entre Japonezes i Amerikanos. Esto tambyen ya lo konti aki.

Mismo kon para, no era kolay para topar un biliete de treno. No esto avlando aki de un lugar de asentar, esto avlando solo de un biliete. Kaliya azer la kola 24 oras delantre el buro de los bilietes para pueder esperar tener solo un biliete. Mi padre ograsheyo kon un mushteri ke teniya una adjensiya de viajes, i pudo obtener tres bilietes sin azer la kola. Ama djusto bilietes. Nada para asentarse. Kuando vino el treno a la gare de Lyon, una mar de djente se echo en los vagones, i se pudiya solo kerdarse en pies, o a lo mijor asentado sovre su validja, en el kalejon yeno de djente. Asentados en los kompartamentos se topavan los privilejiados, sea ke lavoravan a la SNCF (la kompaniya de trenos) sea ke konosiyan djente en los ministeryos, no se…

Yo los mirava de mi kalejon un poko komo un sorretero mira a los ke tyenen kama para durmir. Un ombre i su mujer se adjidearon de verme ansina i me tomaron para asentarme al lado de eyos. Yo era tresalido de pueder asentarme durante esta larga noche en ke era imposivle de durmir. I para pishar? Imposivle tambyen de kaminar en el kalejon yeno de djente i de validjas. La djente me tomava en los brasos en riva de sus kavesas, (yo era una chika kriatura de ocho anyos) i de brasos en brasos me yevaron komo un bogo asta’l numero, i el retorno se izo de la misma manera…

Me abolti en Megeve para las vakansas en 1948 i 49, las kozas ivan mijor i se empesava de topar de komer ande los merkaderes. I ansina, de vez en kuando, kuando me ize mansevo, i despues kuando me kazi, i kuando tuve kriaturas, me fui a pasar mis vakansas de enverano en esta sivdadika ke vide kreser a poko a poko. Agora, i desde 1980, kijo dizir desde 34 anyos, kada anyo me vo aya en agosto, i esto es lo ke ize tambyen este anyo.

Por siguro las kozas trokaron : de un kazaliko de djente bivyendo de la tyerra i de las vakas, Megeve se izo mas i mas una sivdadika de djente bivyendo del turismo, sovre todo el de invyerno.

Kada mes de agosto, alkilo el mismo apartamento en una kaza ke se topa en las alturas, en medyo de los kampos, afillu si a poko a poko se fraguan kazas mas i mas serkas , mas i mas ermozas i rikas. Agora son tan karas ke los fransezes no las pueden merkar, son para los ajenos, prinsipes arabos o rikinyones rusos o suisos.

En kuanto a mi, mi plazer es de kedarme asentado sovre mi balkon, tomando un kave (turko, me yevi de Paris lo ke es de menester) i mirando la ermozura de las yervas, de las flores, de las aguas, de las montanyas, de los arvoles, i de sentir el aver puro arrebivir mis pulmones.

No ay syempre sol. Munchas vezes kaye la luvya, ama yene la montanya keda ermoza, ermoza i freska.

Por siguro, el problema kon la montanya, es ke ay pokos kaminos yanos: a kada vez kale abashar o suvir. Es un plazer, ama un plazer ke kansa. I kon la edad, la montanya yamada Rochebrune, ande yo suviya en ora i medya (de 1.200 a 1.800 metros de altura, lo ke aze, si no me yerro, 600 metros de suvir) agora la suvo en dos o tres oras. Yo pretendo ke no troki, es la montanya ke se also de si para si, ama…puede ser me yerro…

Alderredor de Megeve ay montanyas de 2.400 (el Monte Charvin) o 2.500 metros (el Monte Joly) ande suvi kon muncho plazer no ay tanto tyempo, ama yene unos kuantos anyos. Agora no me atrivere de aprovar de azerlo de muevo. I kuando era muncho mas mansevo, en los anyos sesenta, diremos kuando yo teniya entre 23 i 30 anyos, me teniya ambezado de azer eskalada de montanyas de roka, kada una de mas de 3.000 metros de altura. Aprovi mismo de suvir a una montanya de 4.000 metros; ayegados a 3.200 metros, yo me sentiya muy byen, sin kanseryo, ama malorozamente el tyempo ennuvlado i yelado (afillu ke eramos en agosto, kaiya inyeve) ovligo el giya de renunsyar de ir mas alto i tuvimos de aboltar a basho. Pekado…

Suvir sovre la roka no es koza kolay. Kale kalsados espesyales ke no se aresvalan; i kale una kuedra muy rezya entre el giya i yo, o entre el amigo de arriva i yo, ke si me arresvalo me detyene por la kuedra. Me ambezaron varyas teknikas asigun se prezenta la roka (chimenea, laja, dyedro, etc). Kale tambyen saver abashar presto de la montanya, en las pyedras, el yelo o la inyezve, sin arresvalarse.

Ke ermozos rekodros…La ermozura i el plazer de toparse arriva de la montanya, mas arriva de todos, i tomar su piknik a 3.300 metros, serka de las nuves i de las inyeves, mirando alderedor la grandeza de la vista.

Por siguro, agora son solo rekodros. A kada edad sus plazeres. Kon los anyos el ombre renunsya a mas i mas kozas ke puediya azer antes. Ansina es la vida.

En Megeve en enverano vyenen munchos djudyos para gozar de este pedasiko de Ganeden, a tal punto ke fue menester de topar un lugar para las orasyones de kadal diya, syendo ke si Megeve tyene una iglesya i un templo protestanto, no tyene kal. En primero fueron varyos djudyos ke organizaron la koza en sus kazas. Organizar la koza kyere dizir tener un sefer Tora i bastante lugar i siyas para arresivir a la djente. Despues fueron los papazim ke ofresyeron a los djudyos una sala del liseo katoliko, la sala de jeografiya. En tyempo de vakansas, la sala no era uzada por los estudyos, sino los estudyos djudyos. Agora es la munisipalidad de Megeve ke propone una sala serka de la Mayoriya, djusto al lado de la iglesya…Los ofisyos son dirijidos por un haham Lubavich ke vyene de Paris kon todo lo ke es de menester, no solo el sefer Tora, ama tambyen los talletes, los tefillin, los livros, ets.

Yo ke pedri mi madre en mes de agosto ay kuatro anyos, pude azer el meldado el anyo pasado aya en Megeve, tuve el minyan para pueder dizir el kadish de los uerfanos i azer las kozas komo se kale.

I los shabatot en Megeve? El plazer de kombidar a la famiya i los amigos para la komida de vyernes a la tadre; bushkar en los kampos serka de la kaza las flores ke van a embeleser la meza de Shabat. Mirar mi mujer asender las kandelas. Azer el kidush kon el vino kasher traido por mi kunyado. Gozar las buenas komidas gizadas por mi mujer…

Ama si ay djudyos, yene no alkansa la radyo djudiya a Megeve, ni la televizyon djudiya, i me arravyi de kedarme kon las solas gazetas i radyos fransezas en tyempo de la gerra de Gaza. Komo saver lo ke se pasa en Israel kon una informasyon ke da solo haberes de Gaza i de sus muertos, i no dize kaji nada de lo ke se pasa en los kibutsim de la frontera?

Orozamente, arriva de la pisina ande se iva mi mujer, aviya un lugar kon komputaderas. I de esta manera, pude mas o menos saver un poko. No se komo fue en los otros paizes, ama en Fransya la televizyon amostrava solo la estruisyon de Gaza, kon kriaturas yorando, ama sin dizir, o a penas, ke eran los arabos ke aviyan empesado de echar syenes de roketas sovre la djente de Israel, maksus para matar lo mas posivle de siviles i de kriaturas djudiyas. Enfin, no vos vo ambezar nada, esto todo vozotros ya lo savesh, keridos oyentes.

Kualo dizirvos mas de mis vakansas?

Komo syempre las topi demaziya kurtas, afillu si turaron kaji un mes entero. Me alishtereo muy presto de bivir en medyo de los kampos i de gozar el buen ayre, yo ke bivo anyo entero en el sentro de Paris.

Este plazer se paga: kale yenar la araba de un monton de validjas pezgadas (mos vamos de Paris kon la kaza entera i el kave turko) i la yevar sovre 600 kilometros. Kale vazyar la araba i suvir las validjas sovre dos tabakas sin asensor. I la mizma koza a la buelta. Ama esto es el presyo de la libertad.

Astal djueves ke vyene, si kyere el Dyo!