EL KANSER I LA ASUKAR
OTTO WARBURG es un savyo sientifiko ke se topa en el sentro de los lavores i de las bushkadas relatadas al kanser, esta maldita hazinura ke mos aze tremblar de espanto ! Es vedra ke agora dizen ke en las primeres fazas ay siempre posibilitad de kurarla i salvar la persona ma guay ke no venga el mal ! Mijor eskapar una vez por todas antes de sufrir tanto i pasar por tratamientos dezgrasyados ! Enfin, es lo ke yo penso…. Ke dingunos den importansya a mi opinion porke yo so de vedra un fenomeno de persona mas aya de todo lo ke es konvensyonal !….
Kada studente en medisina estudya la deskuvyerta de Otto Warburg ke aviya topado kualo es la diferensya entre una selula sana i una selula kanseroza o en otros biervos kuala es la razon del trokamiento biokemikal de la selula ke se “enlokese” supito ! Fueron estos estudyos tan importantes ke le izyeron ganar el premio NOBEL en los anyos 1930 ….
Asigun Otto Warburg la origin del kanser es el trokamyento de la selula sana del puerpo ke bive kon el oksijeno, kon una selula “anaerobik” (nada de ver kon el aerobiks” !!!) ke egziste sin oksijeno….
La selula kanseroza se metaboliza de manera muy diferente de la selula sana. Las selulas sanan tienen menester de oksijeno. Las kanserozas “fuyen, se espantan !” del oksiijeno. En klinikas ande se pratika los tratamientos alternativas uzan la terapiya del oksijeno hiperbarik. (yo no se kualo es i komo es ma los medikos i estas klinikas lo saven….)
Lo ke se save kon la deskuvyerta de Warburg es ke la selula kanseroza se alimenta kon la “fermentasyon” i su metabolizasyon es 8 vezes mas de la sellula sana…. ! Oyhoyoyoy….. I esto endika ke el puerpo “lavora” muy muncho mas de su kapasitad para alimentar el kanser…. Esta selula loka (!) esta siempre para murir de ambre i egzije del puerpo de alimentarla!
Si se le korta lo ke tiene de menester se muere ! Por seguro si no puede obtener ke el puerpo le de asukar…
ASUKAR DE LAS PROTEINAS
Este sindrom se yama “cachexia” . Cachexia es obtener asukar kon la prosedura “glukoneogenez” -azer otra vez la glukoza- de la proteina i NO de los karbonhidratos i de las grasas. I es este asukar ke mantiene el kanser. Lo ke afita es ke a la fin, el purpo se ambreya en tratando de alimentar el kanser.
Agora…. Komo puede ser logiko de darle asukar al kanser savyendo ke se alimenta de asukar ? Dunke azer una dieta rika en karbonhidratos ?
Oy dan munchas dietas para tratar el kanser. Ma no sierven a nada !
Lo mas justo es de no permeter de komer alimentos rikos en karbinhidrato.
No se deve de meter dingun asukar en boka porke es el asukar ke lo alimenta.
Bueno….. Kuala es la razon ke los medikos no kontan esta verdad ? Ken save ? Puedeser ke pensan ke les kaye a eyos de tratar la hazinura i no a vozotros…. Puedeser ke oyo de la deskuvyerta de Warburg ma no puido meter todos los elementos enjuntos ? Puedeser ke no konese la alimentasyon?
Fina 1978 estava establesido en los Estados Unidos ke el kanser no tiene dinguna relasyon kon la alimentasyon. Los ke konosiyan este sujeto salyeron kon muevas terapiyas. Uno es el “Leatrile”. Un otro es el uzo del Hidrazin Sulfat ke empide la glukoneogenez por mas de los 50 porsien de los hazinos kon “cachexia”
Oy la Universitad de Minnesota esta azyendo bushkadas sovre una “bomba inteligente”. La kura tiene una kuvyerta ensima. Kuando entra en kontakto kon una zona sin oksijeno se libera de la kuvyerta i desha salir la kemoterapiya. La unika zona sin oksiijeno en el puerpo es ande se topa el kanser.
Ay i otras terapiyas kon el motivo de ambreyar el kanser… Al kanser le plaze mas el kocho ke el krudo…. Las enzimas i las vitaminas se peryen en kozyendo los alimentos… I no vos olvidesh ke el kanser “adora” asukar
i los adulsadores komo el Aspartam, el Sukraloz ets. son mizmo mas negros de la asukar. Se save ke el sakarin kavzo el kanser en las eksperyensyas sovre los animales.
En Inglaterra la konsomasyon de asukar por persona era de 5 kg. en los anyos 1815. En 1970 yego a 50 kg. ! El puevlo Amerikano konsumo 100 litros de maziya de bevyenta kon asukar komparado a los anyos 1970-2000. Se uza de una manera loka asukar i arina blanka…. I de esta manera, entendemos mijor la razon de la augmentasyon de personas kon kanser.
Dos tiersos de kanser se pueden evitar en :
– Fuyendo de la asukar i de la arina, dunke tratando de no kayer en la rezistensya a la insulina.
– No konsumando del todo bevyentas o alimentos dulses o adulsados.
– Evitando alimentos empaketados en loskualos echaron elementos para konservarlos. Komer komo komiyan en las primeras eras !….
– Komer vedruras i frutas freskas.
– Tomar el Omega 3 (pishkado, gueyvo….) en konsumando solo la azeyte de oliva… Grasas animales komo la manteka ets…. No a la margarina i otros olios vejetales.
– Konsumar alimentos rikos en probiyotikas (mikrobes sanos !) komo el yogurt, el vinagre ets..
– Komer la karne i los gueyvos de los animales libres en la natura
– No uzar leche pastorizada en paketos.
– Dar preferensya al yogurt de kaza, a los kezos… al lugar de la leche.
– Komer ajo i/o sevoya kada diya.
– Konsumir una o dos kucharas de “tumeric” al diya. (esta koza amariya !!!!!! – el kurkum diziyamos en Israel… Zencefil en Turko)
– Bever te preto sin asukar
– Bivir leshos del stress i durmir bien.
– Alesharse de las toksinas del environamiento i del sigario
– Tomar Vitamina D o kedar un poko al sol.
– Azer egzersisyos i no bever alkol
– No komer el soya ke fue tratado
– No uzar el mikro ondas.
– Preferar gizar en ustensiles de tierra, de vidro i no uzar del todo el teflon i el aluminium.
Me servyeron las publikasyones de la Fakultad de Medisina de Cerrahpasa en Istanbul, las publikasyones del Prof. A. Aydin i estudyos de la Metabolizma i de la Alimentasyon para preparar este eskrito i kon muncho de mi-mizma (!) tambien….
Sanos i rezyos todos AMEN….
sharope.blanco@gmail.com