En la foto madres judiyas de la kehila de Istanbul.
“La Senyora Silva Filiba la madre de muestra komunitad. Una grande amiga ke todos apresian, kerensioza, kolaboratrisa, inovatrisa, su rolo es desde Sara, Rivka, Rahel i Lea, Madres de Yisrael, de kontarmos muestra historia Judia ”
Fuente : La Gazeta Shalom en Istanbul
A MI IJO ROBERT
Los dias, los mezes pasan,
Los anyos se bolaran,
Mizmo si todo se esparesera,
Muestra dolor nunka se atemara.
El sol siempre aklarara,
Las nuves siempre bolaran,
Las estreyas aklararan,
Ma tu mas no seras…
Bendicho Kriador,
De una madre oye la dolor,
Resivelo a tu lado,
A mi ijo el regalado.
En la altura de los sielos,
En el mundo de los anjelos,
En la luz del paradizo,
Durme en pas ijo mio Kerido…
Silva Filiba
LA MADRE JUDIYA DE MONA LISA
“Dospues toda la moneda ke gastimos tu padre i yo para
enderechar i ermozeyar tu boka es ansina ke deviyas de
soriyir ?”
LA MADRE JUDIYA DE CRISTOPHE COLOMB
“A mi no me interesa lo ke deskuvrites o no ! Ni me
yamates, ni tuve notisyas de ti, ni una letra me eskrivites !”
LA MADRE JUDIYA DE MICHAELANGELO
“Kualo ? Estas pintando el techo ? No te abastaron las
paredes komo a los otras kreaturas ? Saves ke difisil es
de alimpyar este schmutz (susyedad) del techo ?
LA MADRE JUDIYA DE THOMAS EDISON
OK ! Esto muy orgulyoza ke inventates este balon de
vidro ke da luz…. Agora, por favor, me lo amatas i te
vas a durmir ! Aydeeeeeeeeee a la kamaaaaa !”
LA MADRE JUDIYA DE ALBERT EINSTEIN
“El Senyor fotograf alavado i tu endjuntos, no pueditesh
topar un remedyo a tus kaveyos komo la eskova de la
kuzina ? Ni penyarlos kijitesh ! Di-o santo miyo !”
LA MADRE JUDIYA DE MOSHE AVINU
“Dezyerto, Mezyerto ! Dime agora la vedra…. Ande,
por mundo tuyo, te eskondites durante 40 anyos ? Ke te
afito, ijiko miyo ?”
LA MADRE JUDIYA DE BILL GATES
“Esto es ! Tanto ke lo kije ! Te ivas a murir si no
estudyavas medsina he ? Mi ijiko tan intelijente
lazrando para ke todos en el mundo se keden solikos
i ensiegados delantre de esta makina, la vere manka ! !”
LA MADRE JUDIYA DE CLINTON
” Walla…. A mi me plazyo muncho esta Monica !
A lo manko una ermoza ijika Judiya, ke lo bueno miyo !”
Un beziko de mi parte a todas
las madres judiyas ke son
ekstraordinaryas en sus kerensya
para sus chikos…..
El Di-o ke vos guadre sanas i rezyas !