Oy mos iremos a enrikeser los ojos de ovras de architektura ke nunka puedremos ir a ver de serka… Ma egzisten i vale la pena de konoserlas. Sera un viaje muy interesante.
El hombre nunka desho de fraguar sus mas ermozos i mas valorozos edifisyos para arekojerse kon los adeptos i rogar al Divino asigun su relijyon, en las Sinagogas, en las Katedralas, en las Meskitas o en los templos ande idolatran el sol, Baal, Jupiter, Budha, Horus, Conficius, Isis, Ishtar, Odin i mil otros diosas i dioses paganos (Has ve halila !) Todo esto por su instinkto de kreyer en un poder de muncho superyor al suyo i ke lo kriyo a el mizmo, ansi ke todos las kozes en su deredor, los astros, el firmamento, la tierra ets. !
Es ansina ke se fraguo el Beit Hamigdash dos vezes, la mas somptuoza fragua de la antikitad, el Vatikano, las mas famozas Katedralas del mundo, la ovra maestra de Gaudi La Sagrada Familya, el Templo de Bahai, las mas selebras meskitas, entre otras la Selimiye de Edirne, la meskita la mas impozante del Emperyo Otomano, el Muzeo de Aya Sophia fraguada por Byzance, los templos en la India i en el Ekstremo Oriente.
La Grande meskita de Sheikh Zayed en Abu Dabi, la kapital de los Emiratos Arabos Unidos, es la mas ermoza meskita del mundo. Kosto 545 Milliones de Dolares. 40.000 personas i mas pueden rezar enjuntos. Es una ovra klasika i moderna en mizmo tiempo. Se empeso a fraguarla en 1996 i terminaron los echos en 2007. Es illuminada por kandelabros de oro de 24 karat i el grande kandelabro (aranya) , de oro tambien, es el mas grande del mundo kon sus 10 metros de diametro, 15 metros de altura i un pezgo de 12 tonas…
La mezkita tiene 82 kupolas ensima de 1000 kolumnas. El mas grande tapet del mundo kovre el suelo i es tissado enteramente a la mano… La primera seremoniya en la mezkita fue la de los funeraryos del Sheikh Zayed ke esta enterrado ayi. Immensos basinos al rededor se transforman en espejos i amplifikan su ermozura. De diya, su blankura i sus kolores de oro asemejan al sol, alora ke de noche, kon una sistem de illuminasyon unika, se reflektan las fazas de la luna.
El MASJID AL-HARAM en Mecca es la mas grande meskita ke egziste en el mundo. Kovre 400.800 metros kuadrados (99 akros) i 4.000.000 de personas kaven en las partes avyertas i serradas de este sityo. Es el lugar el mas santo i venerado de los Muzulmanos . Todas las meskitas i las orasyones se azen tornadas a eya. Tiene 9 minaretes de 89 metros. El pelegrimaje al sityo es uno de las 5 mitzvas del Islam. La administrasyon del lugar apartenese a la Arabia Saudita.
LA GRANDE MESKITA DE HASSAN II
Es una de las mas nombradas mezkitas del mundo. Se tope en Casablanca en el Maroc. El architekto Fransez Michel Pinseau uzo el granito Italiano en toda la fragua.. Es una de las mas grandes meskitas del mundo. 20.000 personas aryento i 80.000 afuera pueden azer sus orasyones. El tejado es retraktable i se kayinta por debasho. La fragua de la meskita se eskapo en 1993 i kosto 800 Milliones de Dolares. Turistos etranjeros de todas las partes vienen a vijitarla i solo durante el servisyo de midi kuando los muzulmanos rezan no se puede entrar.
La meskita es fraguada ensima de una roka en frente del Oseano Atlantiko. Su unika minaret es el mas alto del mundo kon 210 metros. Siendo alleshado del trafik de la sivdad, es fasil de yegar a este lugar kalmo, perfektamente limpyo siempre. Komo lo savesh, kale kitar los kalsados antes de entrar aryenyo. Se oyen solo los pasharikos ke kantan, la briza i las olas de la mar…
Las mujeres rezan ariva en un balkon. 5000 muzulmanas pueden azer sus orasyones. Dizen ke solo 900 personas vienen kada diya a la mezkita ma por seguro ke esta yenno en las fiestas i en los diyas santos. Es fraguada de tala manera ke no le afitariya nada en kavzo de terremoto.
Espero ke muestro tour de las meskitas en estos payizes del Islam no vos kanso muncho porke aviya muncho de kaminar, mizmo si embasho lo todo era kuvyero del mijor marbro ke egziste! Por seguro ke son ovras de arte de grande interes i no ay de inyegar la ermozura de estas meskitas i la valor de sus architektos… La vedra, entre mozotros, no es el espanto ke me mankava… Mu muero del sar de los kuchiyos!
Diyas buenos ke tengash..