Sharope kerida
Arogo ke lo ke sientes tu por Israel, tu alma
Ke lo sientan todos los Judios de la diaspora.
Aron – Tel Aviv
——————————————————-
I….. Komo no ?
Todos, sin eksepsyon lo sienten ! Ke tenemos de mas presyozo
Mizmo de muestra vida….
Si dimos korban tantos I tantos mansevikos
Agora abrasando la tierra al lugar de sus keridos
Ke valor pueden tener muestros diyas,
Diez mas, diez mankos ?
Es vedra ke todos no estan en Israel, no lo deven porke de ande se topan los tenemos de menester tambien. El Judyo en su korason siempre keda judyo Aron kerido. Mizmo si diez vezes troko de relijion por tala o otra razon. Su korason trembla si afita la mas chika koza a Israel… Este amor lo tiene en su sangre, ke lo kera o no, ke lo sienta o no, ke fieste Pesah i Rosheshana o ke no le importe, ke aga tanit en Kipur o no….. Israel viene antes de todo para el Judyo, su tierra es bendicha porke es Di-o Mizmo ke la regalo a Su Puevlo.
Por mas de 500 anyos fueron Kristyanos los BneiAnusim
i mira kon ke amor i kon ke fuersa tornan a sus raises…..
Inkreyivle ! Tantos I tantos Espanyoles koryen a azer testes de DNA para ver si azen partido del puevlo judyo. Son muestros rabinos ke los rechesan I no los akseptan komo muestros ermanos ! O… Les azen mil difikultades al lugar de avrirles los brasos…..
Ken save Aron ? Kon lo bueno i lo negro en mozotros, kon la Inkizisyon, la Shoa i los progromes si yegimos a estos diyas, es, de vedra, ke el Sielo mos akordo mirakulos…. Grasyas al Di-o. Baruh Hu. Baruh Shemo.
Sharope blanco