LA ISTORIA DEL SHEKEL
En la Tora se oye ke en tiempo del Templo kada uno , sea riko o prove tenia ke dar un medio Shekel por el mantenimiento del Templo. Oy vamos a egzaminar la istoria del Shekel. La primera vez ke se avla del Shekel era en el tiempo de Abraham Avinu ke merko la Mearat Ha Machpela/el kavo de las tombas de los Patriarkos” i pago 400 Shekalim de plata. En el tiempo la palavra Shekel signifikava el pezgo de la plata.
Despues esto se ve en la Megila. Aman promete a Ahashverosh ke si el le da el derecho de destruir los Judios, le dara “Aseret Alafim Kikar Kesef Eshkol/dar 10.000 Shekalim al tresorio del rey”. De los Shekalim de esta epoka se topa poka evidensia fizika. Ma ay Shekalim de tipos variados ke mos dan una idea sovre la istoria Judia.
El primer grupo se konekta al tiempo de la Gerra en Judea kontra los Romanos en los anyos 66-70CE. Tenian el Medio Shekel i el Shekel entero. Eran una taksa al Templo pagado kada anyo por los Judios de Judea i de la Diaspora, asta la destruksion del Templo. Tenian tambien piesas de bronze, menos de valor i komo data se metia el anyo 1 asta 5 representando los anyos del revolte. Ensima de las piesas metian la inskripsion “Le Cherut Tsion/Para la Libertad de Sion”.
Los Romanos tenian sus piesas i eyos metian a los Imperadores Romanos komo simbolo. Kuando a las piesas de los Judios, komo no era permetido segun la Halah de meter karas, metian frutas komo el etrog, lulav, uvas i granada.
En el segundo grupo ke salio durante el Revolte de Bar Kochba en los anyos 132-135CE no avian karas por la segunda vez en las piesas. Komo desinyo se favorizava tambien el Templo i el Aron HaKodesh. La data era de muevo “Anyo 1, 2, 3 ets desde la liberasion. En las 2 Revoltes tenian 2 razones.
Uno] Preferavan ke no aiga karas en las piesas.
Dos] Mostrar el deseo de liberar el pais en harvando a los Romanos. Asi se metian simbolos Judios. Kisas Bar Kochba kijo mostrar tambien la destruksion del Templo i de dar boz a la esperansa ke un dia el Templo sera rekonstruido de muevo. Esto mos mostra ke muestros avuelos eran bien determinados.
Se utiliza el Shekel oy en Israel, ma al prinsipio no era el kavzo. Tenian en primero la “Lira i las Prutot” En kontra los timbres ke fueron fabrikados al empesijo mostravan el Primer i Segundo Revolte. Kisas lo ke kerian dizir es ke en el Israel de oy el pezgo era grande enfrente de sus enemigos komo fue en el pasado. Kon el tiempo la moneda en Israel fue devaluada. En 1960 se desidieron de trokar la moneda. Vino el Shekel komo una baze de finansas. Kon la inflasion i devaluasion se toparon ovligados a krear un “Shekel Hadash/Shekel Muevo” en 1986. En realidad mismo este Shekel era en nombre solamente, komo las otras monedas de otros paises. Las piesas no puedian mostrar la valor del metal sovre todo si era plata. En una Seremonia ke se yama “Pidyon HaBen/El primer nasido” se da 5 Shekalim en valor del pasado.
Por siglos utilizaron el “Thaler Europeo” por la misma razon. Israel esta vez vino a la ayuda en kreando “Un Ounce en plata”. Antes unas dekadas era el “Crown Britaniko” de plata ke se utilizava en la Australia.
Trezladado por Shimon Geron, Sydney
—————————————————-
Kuando vine a la Australia el salario minimo era 15 Pounds/30 Dolares por semana. Despues de 52 anyos mismo un salario de 500 o 1000 Dolares no abasta. El Dolar se torno a groshes. La inflasion la yaman “Galloping Inflation/Korriendo komo un kavayo.
Un Milion de Dolares tenian una valor grande al punto de ser rikos. Oy el Milion merka apenas un apartamento.
En Turkia i en Israel la moneda se troko munchas vezes en kitando unos kuantos zeros.