Imaginavos ke estas asentáda en Fransia en un restaurante, asperando kon oras i oras, a tu kerido, kuando subitamento tus oyos estan viendo de muy lejos, viniendo kon grande velosita de una de las kayes chikas, un jeep de polisía, aretandose delante de ti, kon un ruido terivle de frenos i deskargando dos jandarmos vistidos en uniformas mavis, i tu marido yevando dos botellas de vino i un kuti grande, korriendo en tu direksyon akompañado de un otro ombre, gritando muy fuertamente “ola” i abrazando te delante de todos. Me paresio ke me se tomo el suluk.
Esto es sólo el empeshido de la istoria ke kero kontarvos i ke me paso a mí durante mi vijita a Colmar. Estando en el vezindado de Strasburg i del “Bosko Preto”, mos dezimos viajar a Alsacia, azer una vijita ayi a la sivdad Colmar, El Kamino de Vino i el chiko kasal Riquewihr. Estuvimos endjuntos sinko personas, pero kada uno i uno tuvo una idea diferente lo ke deve ser el buto de este viaje. Mi marido kisho merkar algunos vinos ekslusivos, desde ke mosotros estavamos kombidados ande mis kosfuegros, i era el último día de muestre viaje en el asheno .
Colmar es la komunita la tresera de grandura de la región de Alsacia en Francia del Noreste. En 1945 Alsacia-Lorrain fue retornada a Fransia después de la Segunda Guerra Mondial . Es el lugar de la prefectura del Haut- Rhine. La vijita del museo de Colmar i su kal vale la pena, ansí komo el viaje kon un kaik por los kanales estrechos del rio Lancha ke servió antes por los vendedores de frutas i alimantasiones, los molineros, los karniseros, los peskaderos o por otros kargamyentos. Es yamado la “Petite Venice’. Colmar es también la sivdad de Frederic Bartholdi, ke diseñó la Estatua de la Libertad de Nueva York. La Estatua de Libertad es agora una eskultura neoklásika kolosala en la Isla de la Libertad en el Puerto de Nueva York. El museo de Bartholdi en Colmar kontiene numerosos modelos de sus ovras. En 1886 Francia aregalo la Estatua a las personas de los Estados Unidos, en el rekonosmiento de la amistad estableada durante la Revolusión Nortamericana. Kon el paso de los años, la Estatua es el simbolismo de la libertad i demokratia ansí komo de esta amistad internasionala,
Además de Colmar, mis amigos kerian vijitas Riquewihr ke es una kasaba bonita en Alsacia ke tiene también una mahalla djudía, Riquewihr se topa sovre el Kamino de Vino, es un museo vivo de la architektura antika de la Alsacia vieja. Kon sus kayes eskarpadas, se ve la vida de este lugar desde él siglo l5 i es frekuentado por muchos touristos ke les interesan sus kortijos, ver los kazanes de uva i las enormas pressas de vino. Según la guía de viaje “En el siglo XV, los habitantes povres de Riquewihr pudieron emprestarse sumas grandes de dinero de los rikos judíos del ghetto. Ma kuando dezisaron de anular unilateralmente sus devdas, eyos masakaron a sus kreditores.”
Tuvimos sólo un koche, i después de alkanzar el sentro de Colmar, kada grupo tomo kaminos diferentes. Ningún tiempo espesífiko del día, ni una hora fue avisado para muestra retornada, pero todos supimos ke deviamos estar en tiempo a Freiburg por el supe.
A la tadrada, yo enkontré de muevo a mis kompañeros en el merkado, ma el úniko ke mankava fue mi marido. Mientres vide kon preokupasión komo se oskurio i demismo vide kómo los kafes i los bistros salieron afuera de esta oskuridad kon sus luses. Mirando verso la distansya, de ande mi marido kon su shaketa kolorada devia venir, i se podia rekonoser fásilmente de leshos, asperi kon oras a sus gritos de alegria, komo lo usava i koriendo en mi direksyon, para apaniar me i serarme en sus brasos,.
Kuando él no aparesió, empesi a preokuparme, desde ke él avía deshado su pasaporte konmigo, él no supo la lingua alemán ni francés. Keshke no lo deshia ir se solo!!!! Los oyos me se mareyaron, i mis amigos no mankaron de ver mi apreto. Se metieron todos al lado de me asperandolo, en un pequeño restaurante.
Mis kongoshas fueron konpartidos. Mí sangre se suvio a mi kaveza , mí korazon se apreto i yo mí topi a estas oras en estrechura. Entonses dezidimos de ir mos al kuarto de la polisía, para solisitar una búskeda más intensiva, kon la patrulya de la polisia ke pasa las kaleshas todo el dia. Eyos, tratando de konsolarmos, me disheron ke sin duda mi marido enkontró un lugar en una chika kaye i esta disfrutando del vino ke merko. Memuara yo.!!!!. .
Kuando a la fin, despues de oras, mi marido aparesio, al mydan de Colmar, me se alivanio , me kalmi, no avlimos demasiado i tomimos mosotro viaja de retorno a Freiburg, donde un riko i muy savroso supe fue preparado para mosotros.. En entrando en kaza vimos sovre la mesa el kodrero en papel al orno, la quiché-Lorena, el “flammekueche”, “choucroute” i los biskochos ke se merkaron , yenos de dulsuria i kondimentado kon kanela i klavos de komer.
Ke kef !!!.
Avlando de vino en Alscas kaji todos los vinos son blankos, pero estos echos de la uva Pinot Negra tienen una kolor rojo klaro. Mucho de los vinos blankos de Alsacia son echos de variedades aromátikas, ansi son florales i pikantes. Tradisionalmente todos los vinos de Alsacia son sekos , ma pero para produsir vinos kon el karákter más komún se enkontra azúkar al kazandibi . El Pinot Gris, alkanza un kontenido natural más alto de azúkar en la madurez, ke el Riesling, Muscate o Sylvano. En Alsacia, el vino ke se beve kon la “choucroute” es o un Gewürztraminer riko i pikante o un Riesling kompletamente seko. Un mejor igual es el Alsacia Riesling, ke es delikamiente floral kon un poko de kesab,
Además en passando el tiempo, oyímos las istorias pikantes ke todos mos kontaron sovre la región, espesialmente la istoria de mi marido kómo se unió a un grupo de viajadores de Israelís, entre eyos i Uri, el mansevo, muy henoso ke le ayudo.
Para akurtar este kuento este mansevo ke vino en el jeep kon mi marido, fue un Israelí, uno de sus parientes distantes, ke se enkontraron para mazal en uno de los kayezikas de Riquiwehr,. Lo ayudó demesmo, en yevandolo al karakol de Colmar i fue despues invitado de mosotros de venir a Freiburg para partisipar a la fiesta, un moabet ke kreeme yo nunka no me vo olvidarme. Ma es sovre todo grasias del vino ke merko mi marido,ke tovimos tanta gana de fiestar. Estavamos komo kudureados. La savor de esta nochada mos desho la savor en la boka o fue komo desia mi marido “Ken beve, bive”.
I al kavo se dise: No vesh mal del diya sin ver la meduadia, o el diya avla avagar, la noche mira detras.
