“Deke los artistos ollandezos se enteresaron tanto en la istorya de Esther”?
Ay razones prensipales ke eksplikan sus entereso en la istorya de Purim.
Rembrandt era personalmente fasinado por el Testamento Antiko. Komo el biviya en una maale judia de Amsterdam, el se sintiya muy serka de los judios i de la Bibla. Kuando era chiko, su madre le meldava pasajes de la Bibla. Entremientes Rembradt mirava a las fotografias del livro, arekojiendo enspirasion de la pajinas. Los dos Testamentos le prokuro sujetos para dezvelopar su talento artistiko.
En el anyo 1634, Rembrandt se kazo kon una mujer rika, i empesaron a bivir una vida rika. Se merkaron una kaza en el mas luksyoza maale de Amsterdam. Rembrandt no teniya problemas ekonomikos i menester de lavorar komo lo devian los otros artistos de su tiempo. La rikeza de su mujer le dio la libertad de lavorar kon los estudiantes de arte en su studio.
Ademas, Rembradt tuvo una sempatia por el judaizmo. A traver de su amistad i entimidad kon los mas emportantes personajes djudios de Ollanda, Rembrandt empeso a enteresarse a la sinyifikasion profonda del Tanah.
En akeyos anyos, en Ollanda aviya una tolerensiya relijioza i munchos entelektuales djudios. Las famiyas djudias eran rikas, i tenian el gusto de bivir. Los rikos davan grande emportansia al arte i merkavan pinturas para dekorar sus kazas. Naturalmente, los djudios preferavan pinturas bazadas en las istoryas tomadas del Tanah.
En akeya epoka, los djudios portugezes aviyan fuyido de sus paiz, i aviyan trayido una grande kantidad de eksperiensa i konosimientos kon eyos a la Ollanda. La Ollanda se aviyo echo el paiz el mas floresiendo de Evropa, en los kampos kulturales i ekonomikos. Los djudios portugezes i espanyoles se aresentaron en Amsterdam i ayudaron a enstalar la endustria del diamante en Amsterdam.
Komo a los djudios les era permetido de pratikar sus relijion, eyos aziyan todos los servisios relijiozos i teniyan todo modo de fasilidades en sus komunidades.
Esta libertad de los djudios era totalmente diferente de akea de los otros djudios ke bivian en otros paizes i ke devian eskonder sus servisios relijiozos. Esta diferensia se viya mezmo en la arshitektura de las sinagogas. En las senas istorikas de las pinturas no aviya kristianos krusifikados, madonnas yorando, o djudios mirados kon malisia, komo era en los otros paizes. Los djudios ollandezos estavan topando pinturas ke podian merkar en sintiendosen orgoliozos.
Ademas, en akeya epoka, los ollandezos se viyan komo el İsrael muevo i viyan la Espanya komo el tirano kruelo. Kon la istorya de la selebrasion de Purim, los Ollandezos podian eksplikar el mirakolo del Dio durante sus propria jenerasion.
Durante la solevantasion de la Ollanda kontra la Espanya, los lideres de la revolta fueron identifikados a los lideres de la Bibla, i los tiranos a Faraon, Haman i Nabukodonasor. Los ollandezos avian komparado sus pais a la tyerra de Kenaan.
Por munchos anyos, los artistos ollandezos kompararon sus sivdadinos a los djudios de Persia. Esther i Mordehai fueron modeles de endependensia. El livro de Esther fue el prensipal sujeto de los artistos ollandezos. Teatros prezantaron ovras bazadas sovre el Livro de Esther. Un oratorio kon el nombre de Esther fue kompozado por Handel. El famozo poeto ollandezo Van den Vondel eskrivio dos poemas bazadas sovre la istorya de Esther.
Por munchos anyos, Esther i Mordehai fueron la personifikasion de los ollandezos buenos.
Dora NİYEGO