Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo a kada vez vos anunsyo ke el proksimo atelye de konversasyon de la asosyasyon Vidas Largas se tendra el martes 17 de desyembre, de las dos i un kuarto asta las kuatro i medya-sinko, en el Centre Communautaire, 119 rue Lafayette Paris (10°). Metro Poissonnière o Gare du Nord.
Oy no vos vo meldar un pedaso del Meam Loez, porke tengo una koza de kontarvos.
El djueves pasado, 28 de novyembre, no me oitesh en direkto, oyitesh lo ke yo aviya preenrejistrado el martes de antes, syendo ke el djueves 28 tomi el treno para irme a Bedarieux, sivdadika de unos 6.500 moradores ke se topa en el sur de Fransya, a sinko kilometros del kazal de Herepian, ande yo estuve eskondido kon mi famiya en 1944.
Ize este viyaje kon mi mujer para toparmos el vyernes 29 a les 10 i medya de la demanyana a la inogurasyon en Bedarieux, por el mayor de la sivdad, de la avenida de los Djustos entre las nasyones.
70 anyos mas antes, en mes de septyembre 1943, aviyamos echo el viyaje de Megève, ande moravamos en zona de okupasyon italyana, asta Lamalou les Bains, kazaliko del sur de Fransya en zona de okupasyon almana. Deke este viaje i este trokamyento? Porke mi padre aviya endevinado antes de los otros ke los almanes ivan a venir en zona de los italyanos, i ke, almanes por almanes, mijor seriya de toparmos en un lugar mas kyeto komo Lamalou.
Esto dicho, el viyaje de Megève a Lamalou no fue koza kolay. I kuando, enfin, ayegimos en la estasyon de Bedarieux, a 9 kilometros de Lamalou, ande kaliya salir para tomar un taksi syendo ke no aviya treno para Lamalou, mos apersivimos ke esta salida no era posivle porke los Almanes estavan a la salida de la estasyon, mirando los papeles de kada uno. Mi padre tuvo la idea de salir de la estasyon tomando otro treno…ama despues kaliya yene topar remedyo de salir del treno i topar manera de ir en Lamalou sin ser aferrado.
Kurto lo vamos azer oy, porke no es de esto ke vos kyero avlar, ni de lo ke izimos en Lamalou asta el mes de fevrero 1944 kuando un diya el amo de la kaza ande biviyamos, ke era ayudante del mayor del kazal, mos ambezo ke veniya de resivir un papel de la Gestapo anunsyandole ke ivan a venir en Lamalou para avrir un buro i ya demandandole la lista de los djudyos del kazal. Kaliya fuir pishin, esta misma noche, a eskondidas i en lo brusko.
Por mazal este ombre konosiya una mujer ke puede ser podriya arrekojermos, ama ke no morava en Lamalou, ama en un kioy no muy leshos, dos kilometros, ke se yama Herepian. Era una balukchiya (i komo no aviya mas pishkados, en vedra vendiya kezos) bivda, mujer de bien i patriota afilu ke era de orijen italiana.
El ombre mos konsejo de irmos ande eya, agora mismo. I ansina es ke mos fuimos a pie, en medyo de la noche (sin lampara por modo del “couvre-feu”i tambien porke muestra ida devia de kedar sekreta) kon la sola luz de la luna, sovre el kamino entre los dos kazales.Alkansimos asta la kaza de la mujer, ke mos disho ke no mos puedia guadrar porke, en mas de su propia famiya – su madre, uno de sus ijos, su ija kon el yerno i un bebiko – ya eskondiya dos djudyos arriva, (en vedra un djudyo i su amiga kristyana)…i otro ijo suyo tambien eskondido por no irse al servisio de lavoro ovligatorio en Almania (estos los yamavan réfractaires au STO). Kale dizir ke mozotros no eramos tres, ma sech, porke teniyamos tres kompanyeros djudios (ijo, madre i mujer) fuyendo kon mozotros.
I de muevo la kuestyon: ande irmos? La balukchia bivda, ke se yamava Laetitia Carayol, teniya una prima i amiga ke se yamava Gabrielle Gasset i ke teniya una moradika vaziya, el kat arriva de su morada, i ke no biviya muy leshos, a dos kalejas de ayi. Aya mos fuimos todos los sesh sin azer ruido, a las eskondidas, i esta mujer bendicha, Gabrielle Gasset, ke biviya a basho kon su madre i su ijo, mos arrekojo los sesh ke estavamos, i mos metyo al primer kat de su kaza.
Tres kamaretas, una para kada famiya i la tresera para komer i kozinar. Pandjures i ventanas siempre serradas, avlar kon boz basha, esta vez eramos haliz eskondidos. I de muevo no era mas kuestyon de irme a la eskola, asigun yo no egzistiya mas para dingunos. I no era mas kuestyon de amostrar kartas de alimentasyon para komer. Para los ke no saven, kada komida era vendida sigun tiketes de alimentasyon distribuidos por el governo, i kaliya amostrar karta de alimentasyon. La sola manera de komer sin tikete i sin karta era de merkar a eskondidas – i muy karo- al zarzavachi, al kasap, al bakal, ets. Lo ke se yamava merkado preto. La mujer ke mos eskondiya merkava de komer de esta manera para mozotros sesh komo si era para eya…
I ansina empeso una vida de prezo, en lo brusko. Ama al kavo de unos dos mezes de kedarme ansina en este aver enmofesido, me aferri una hazinura ke mas asta oy no me desho, la astma, i me estava atabafando mas i mas diya i noche sin topar suluk i sin pueder durmir. Yamar a un doktor? Komo saver si no mos iva a denunsiar, o sino denunsiar, avlar demaziya? La otra famiya se espantava de esta sekana ke podiya kostar la vida a mozotros sesh. De modo ke yo me kedava asentado en mi kama, sin durmir, bushkando suluk i atabafandome a poko a poko. Para pasarme el tyempo i azerme olvidar la pena de respirar, mi madre me kontava istoryas de Bereshit, por egzemplo la de Joseph i sus ermanos, ke me agradava muncho. Estas istoryas, mi madre las aviya ambezado no en una eskola djudiya, ama en la eskola ingleza de Estambol (Scotish Mission) ande aviya echo sus estudios. Kuanto a mi padre, el me kontava konsejikas ke imajinava en el mismo tiempo ke me las estava kontando, i komo yo no pudiya durmir, estas konsejas podiyan surear oras enteras. Es en este tyempo ke enfin mi padre me dyo a entender lo ke se estava pasando, la gerra, de Gaulle, lo ke eran los djudyos, muestra relijion, komo el Dyo avlo a Avraham, i todo i todo. Ya aviya afferrado yo los syete anyos, la edad de razon… Ama esto todo no me dava la salud i no me aziya respirar.
La solusyon fue de kitarme a la luz komo si era un ijiko kristyano, refujyado porke ijo de ovreros ke se espantavan de los bombardamentos. No me yamava mas Edmond Cohen, me yamava Marcel Colin. En vedra no teniya dingun papel para esto, ama visto mi edad, dinguno vino a peshkuzar. De este modo pude bashar ande mi moradera i eya pudo yamar a un doktor. Vino el doktor (un mansevo rizin salido de la universita) i vyendo ke mi hazinura era de no tener suluk, kijo ver ande yo durmiya. Mis parientes suvyeron eskonderse debasho del techo kuando vino el doktor a mirar mi kamareta. Pishin disho ke estava fediendo aki, i ke kaliya avrir ventana i pandjures. No por sedaka! disho mi moradera, i el doktor, ke no era un bovo, entendyio ke kaliya amostrarse diskreto. Ama disho ke yo deviya salir para tomar aver, i de este diya la djente del kyoy vido apareser un ijiko, yo, ke aziya el pastor kon baston i perro, para yevar kavretikas i kodrerikos a los kampos kon las viejas kyoyliyas. De este tyempo me ambezi ke las kavretikas son mas kolay, mas ovedesientes, ke los kodrerikos ke pensan syempre a fuyirse. Esto era byen para el diya, ama ande durmir la noche? Kon mis paryentes me atabafava, ande mi moradera no aviya lugar, i me fui morar ande Laetitia Carayol, la balukchiya de la primera noche. Sesh personas no podiya tomar, ama un ijiko si.
I de este diya mori ande eya, sin pueder mas ver a mis paryentes, ke por tanto eran a dos kalejas. La balukchiya, su famiya, los dos eskondidos de arriva i yo komiyamos todos endjuntos. Yo no era eskondido para la djente de Herepian ke me tomava por kristiano, ama era eskondido para la djente de Lamalou ke me saviya djudyo. De tal manera ke kuando viniya a la ora de la komida una persona de Lamalou, eramos kuatro – los dos eskondidos, el ijo tambien eskondido i yo – a tomar pishin el chini, la kupa, el kuchiyo i el piron i a ir a eskodermos en la kamareta dal lado asta ke la persona se vaya. A syete anyos, teniya yo la vida de un kondenado a muerte fuyido i bushkado por la polisiya…
Para ke la djente no tenga sospechos sovre mi, me ambezaron a ir kada alhad kon la balukchiya i su famiya a la iglesia – a esta epoka todo el kyoy se iva a la misa de alhad – a untar la mano en la agua benita i a azer el sinyo de la kruz. Las primeras vezes yo eskaldava la djente dal lado, metiendo la mano kon fuersa, ama despues me ambezi bueno komo un buen kristianiko. Esta balukchia bendicha era muy katolika, i su kaza era yena de haches; yo durmia – enfin pudia durmir, el doktor teniya razon – de basho de un grande hach. No aviya mas ke asperar el debarkamento de los Amerikanos i muestra liberasyon. Empeso la primavera 1944.
I una demanyana, ke nunka me olvidare, me esperto la balukchia, Mme Laetitia Carayol, dizyendome ke los Amerikanos avian debarkado; eramos el 6 de junyo 1944. Bendichos Amerikanos ke mos traian una luz de aftaha i de alegriya en muestra noche de sar i de espanto. No kaliya amostrarlo a los askeres alemanes, ke aziyan komo si no se paso nada. Ama penso syempre a estos askeres amerikanos ke vinieron de tan leshos para salvarmos, i ke fueron matados este diya a la salida de los vapores sin mismo tokar tierra. Nunka me olvidare ke los Amerikanos pagaron karo para salvarmos la vida. A los otros Fransezes trusheron la libertad, ama para mozotros era la vida. I esto, komo olvidarlo?
Esto dicho, el debarkamento de los Amerikanos se paso en Normandia, al norte de la Fransia. Mozotros estavamos en el sur, serka de la mar Mediterranee. El debarkamento mos dyo aftaha, ama para la liberasyon efektiva kaliya dainda asperar. Asperimos…I en medio de agosto uvo el sigundo debarkamento, esta vez en el sur. Muestra liberasyon se aserkava, ama los kombates eran fuertes, i esta vez los FFI (fuersas fransezas del interior, los partizanes, los makizardos) se solevantaron en todos los lugares kontra los Almanes para de una parte ayudar a las armadas alyadas debarkadas (amerikanos, inglezes, fransezes i arabos de Afrika del Norte), i de otra parte aprovar de impedir a los Almanes de fuyirse delantre de los Alyados para ke eyos puedan azerlos prizoneros. Ya dishe ke Mme Carayol teniya kuatro ijos i una ija: la ija era kazada kon un franses ferido a la gerra i medayado, ke bivia en kaza. Tambien un ijo eskondido i un otro , el mas mansevo (19 anyos) en kaza. Estos dos ijos se fueron a kombatir kon los FFI. Otro ijo era prizonero de los Almanes en Prusa Orientala, i el ultimo era pilot de bombardero en la aviasion franseza de los Inglezes. Sea bendicha la memoria de esta santa mujer ke se yamava Letitia Carayol, i tambien la memoria de esta otra santa mujer ke, afillu ke era kon negra salud, mos aviya eskondido, mozotros sesh, en su kaza , i ke se yamava Gabrielle Gasset. Kale dizir ke si tantos djudios se sovresalieron en Fransia, no es grasias al governo, ke izo todo lo ke pudo para ayudar a los Almanes – se yamava muy ofisialmente la “collaboration” – es grasias a estas Carayol, Gasset, i tantos otros ke salvaron el onor de la Fransya.
Fue una grande alegriya, komo se puede imajinar, kuando fuimos liberados por los FFI, ama despues vino una armada almana fuyendo delantre de los Amerikanos…El kyoy paso de muevo a los Almanes… Ama ke plazer, a travez de los pandjures serrados – ama esta vez era el kyoy entero ke serrava los pandjures, porke los Almanes travavan sovre las ventanas – ke plazer de ver estos zabites, tan arrogantes unos kuantos dias antes, pasar de basho de muestras ventanas, kavalgando kon muncho rezalet sovre aznikos rekizisionados, kon barva de tantos dias ke no pudian arapar, medio durmiendos porke los FFI i los Amerikanos no les deshavan dingun momento de repozo…Ande se aviya ido la arrogansia del zabit Alman…Ke gudrura! Una armada entera en dekompozisyon, fuyandose…no mas kantos militares ke aviamos tanto oido , solo askeres suzios, mal vestidos, durmiendo sovre la paja de arabas kon kavayo.
Louis Aragon eskrivyo a esta okazyon una poeziya muy kurta ama todo fue dicho en kuatro versos:
Ô mois d’août quarante-quatre
Maintenant maintenant il peut
Ce vieux coeur s’arrêter de battre
Je sais ce que c’est qu’un ciel bleu
(O mes de agosto kuarenta i kuatro
Agora agora puede
Este viejo korason kedarse de batir
Se lo ke es un sielo blu)
Komo ya vos dishe, la emisyon del djueves pasado a sido preenrejistrada, porke kuando me oitesh, ya no estava mas en Paris, ama en el treno yevandome a Bedarieux, para toparme, el vyernes 29 a la demanyana, a la inogurasyon por el Mayor de Bedarieux i por la reprezentante de Yad Vashem, de la Avenida de los Djustos entre las Nasyones. Yo era kombidado, en tanto ke ijiko eskondido por kristyanos en la rejyon de Bedarieux, a asistir a esta seremoniya.
Fue muy esmovyente, porke se topavan mujeres salvadas 70 anyos antes, kuando eran chikas komo yo, por djustos de Bedarieux agora muertos ama sus inyetos eran al lado de eyas, i aviya tambyen kriaturas de las eskolas traidas a esta seremoniya para ambezar un pedaso de glorya de la istorya de la sivdad.
I yo, de mi lado, aprovechi esta okazyon ke estava aya para aserkarme de la reprezentante de Yad Vashem , ke va azer todo lo posivle para ke las senyoras Laetitia Carayol i Gabrielle Gasset obtengan eyas tambyen, afillu muertas agora, esta medaya de los Djustos ke meresyeron vente vezes. Ke plazer seriya para mi, komo para los inyetos de estas mujeres, si pudiyamos reushir.
Aprovechi tambyen ke estava aya para ir a vijitar a la ija de Laetitia Carayol en la kaza de vyejos ande bive agora. Kuando la konosi teniya 23 anyos, kuando la vide teniya 93. Mos bezimos kon alegriya. Se akodrava de todo…Eya i yo kedamos los solos sovrebivyentes de estos tyempos.
Ya vino el tyempo de eskapar esta emisyon. Esta semana deshi esbafar un poko a Avraham i a Itshak. Los veremos de muevo el djueves ke vyene, si kyere el Dyo!