Keridos amigos,
Mi emisyon de amanyana djueves va ser sovre los djudyos del Yemen (primera parte, del tyempo ande biviyan en el Yemen). Munchos djudyos no saven ke uvo un tyempo, antes de los muzulmanos, ande los reyes del Yemen fueron djjudyos, i tambyen una parte importante de la povlasyon.
Los ke van a kerer oirme en direkto lo podran indosen a las 4 h 06 PM, ora de Paris, sovre www.radioj.fr Kale klikar arriva a la derecha sovre Ecouter Radio J en direct.
I si no es en direkto, abasta asperar un diya o dos, i despues ir a oirme en redifuzyon sovre http://www.radioj.fr/node/145
Saludos a todos
Edmond Cohen Paris Fransya
——————————————————————————————
LOS DJUDYOS DEL YEMEN (1)
Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Edris en la kabina.
Vos akodro ke agora las emisyones de Radio J se pueden oir sovre internet sea en direkto, sea kuando se kyere, kale klikar en el sityo de Radio J, i irse sovre las emisyones de despues de medyudiya. http://www.radioj.fr/node/55
De otra parte, tengo de anunsyarvos ke los atelyes de konversasyon de Vidas Largas van a empesar de muevo, despues de largas vakansas, en el Centre Communautaire, el martes 14 de novyembre a las dos i medya (asta las kuatro i medya – sinko). Los atelyes son avyertos a todos, mismo los ke no saven avlar i kyeren solo oir. Venid munchos.
Esto dicho, tengo el plazer de darvos a la vez en muestra lingua i en franses el anunsyo ke sige:
Kavod al Profesor Haïm-Vidal Sephina
Un omenaje al Profesor Haïm-Vidal Sephiha se tendra el alhad 19 de novyembre 2017 a las 2 i medya en el kal Don Isaac Abravanel (84/86 rue de la Roquette), inogurado en 1962 por la komunidad djudeo-espanyola.
Todas las organizasyones djudeo-espanyolas, kijio dizir Vidas Largas i Vidas Largas Marseille, J.E.A.A. (judeo-espanyol en Auschwitz), Muestros Dezaparesidos, La Komunidad Don Isaac Abravanel, Al Syete, Aki Estamos-Les amis de la Lettre Sepharade, U.I.S.F. (Unyon de los Djudyos Sefaradis de Fransya), organizan por esta okazyon la inogurasyon de un espasyo Haïm Vidal Sephiha para onrar un ombre ke konsagro su vida a la defensa del djudeo-espanyol i de los djudeo-espanyoles.
Varyas personalidades diran unos kuantos byervos en onor del Profesor Haïm-Vidal Sephiha, ke pronunsyara el mismo una konferensya sovre la ovra de Joseph Nehama.
La seremoniya se eskapara por una kupa de la amistad.
Lo mismo en franses, para los ke no entyenden byen muestra lingua:
Hommage au professeur Haïm Vidal Sephiha
Un hommage au professeur Haïm Vidal Sephiha se tiendra le dimanche 19 novembre 2017 à 14h30 à la synagogue « Don Isaac Abravanel », 84/86 rue de la Roquette, inaugurée en 1962 par la communauté judéo-espagnole.
Toutes les organisations judéo-espagnoles de France, à savoir Vidas Largas et Vidas Largas Marseille, J.E.A.A. (judeo-espagnol à Auschwitz), Muestros Dezaparesidos, La Communauté Don Isaac Abravanel, Al Syete, Aki Estamos-Les amis de la Lettre Sepharade, U.I.S.F. (Union des Juifs Sefaradis de France), organisent à cette occasion l’inauguration d’un espace Haïm Vidal Sephiha pour honorer un homme qui a consacré sa vie à la défense du judéo-espagnol et des Judéo-Espagnols.
Le professeur Haïm Vidal Sephiha prononcera à cette occasion une conférence sur l’œuvre de Joseph Nehama. La cérémonie se conclura par un verre de l’amitié.
Despues de este anunsyo me keda de eskapar mi emisyon de la semana pasada, syendo ke, komo munchas vezes, empeso despues de mi tyempo de tal manera ke no pude eskapar lo ke teniya aparejado sovre la etika djudiya asigun los hahamim liberales Ryner i Garaï. Lo ke me kedava de dizirvos tokava a la etika legala.
Djuzgadores i litigantes
Respekto de la ley
Es una mitsva de estableser la djustisya en la sosyedad, asigun esta eskrito: “Juezes i alguaziles daras a ti …Juzgaran al pueblo juizio de justedad (Devarim XVI Es una mitsva de estableser la djustisya en la sosyedad, asigun esta eskrito:, 18) i ” Justedad justedad persiguiras” (Devarim XVI, 20). Este orden va en primero a las cortes de djustisya. Una sosyedad sivilizada es la ke save rejir los komportamyentos de sus myembros i impedir ke syertos se aprovechen de sus situasyon o pozisyon para impozar un orden ke les sea provechozo. El respekto de la ley kyere ke el kulpavle sea kondenado i el inosente blankeado, kual ke sea la pozisyon sosyala okupada por el uno i por el otro. En la lista de los fundamyentos de la sivilizasyon asigun Rabi Shimon, la ley, el derecho vyenen en primero, antes de la vedra i la paz (Avot, I, 18) (Aki, yo Edmond Cohen avro una paranteza para dizir ke en mi livro de orasyones eskrito por el haham Nisim Ovadya en Vyena en 1924, livro ke era el sidur de los sefaradim del kal Saint-Lazare en Paris, esta mishna del Pirke Avot esta eskrita en un otro orden: emet (verdad) din (justisya) shalom (pas). Ama es vedra ke sovre internet el Pirke Avot ke me fui a bushkar no es ansina: el din vyene en primero, komo en el artikolo del haham Garaï. Deke Nisim Ovadya lo metiya en sigundo, no lo sé, i komo se muryo en 1942, tengo la negra impresyon ke nunka lo savremos…syerro la paranteza). El establesimyento de kortes de djustisya es una ovligasyon esensyala para toda sosyedad i aze parte de las syete leyes de Noah, leyes fundamentales para toda sosyedad (Sanhedrin 56a).
Ansina me teniya de eskapar mi emisyon de la semana pasada, i me pensi, para trokar un poko de la etika djudiya – sin desharla, aboltaré a la etika djudiya otra semana – de avlarvos oy de otra koza, ke es la istorya de los djudyos del Yemen, ke, afillu si fueron una de las mas vyejas komunidades djudiyas del mundo, no biven mas agora en el Yemen, ama en Israel (a parte de unos kuantos ke son menos de syen i ke dainda kedan aya).
No se save muy byen kuando empeso la prezensya de djudyos en el Yemen. En el livro de Iyov, uno de sus tres amigos yamado Eliphaz vyene del Teman, nombre ebreo del Yemen. Se pensa ke el livro de Iyov fue eskrito verso el siglo V antes de la era kristyana.
Se save tambyen, por egzemplo, ke el rey Herodes, en el anyo 25 antes de la era kristyana, dyo a sus amigos los Romanos una chika armada de askeres djudyos para ayudar a Aelius Gallus kuando aprovo, sin reushir, de konkistar la Arabiya del Sur inkluyendo el Yemen, yamado Himyar en estos tyempos.
Meldi un estudyo dizyendo ke despues de la desfecha de Bar Kohba en 135, munchos djudyos de la Djudea vensida se fuyeron en Arabiya, al punto ke aviya unos 100.000 djudyos en la Arabiya del sur (inkluyendo el Yemen de oy) en el sigundo siglo.
Lo ke saven los istoryanos, ama ke pokos djudyos saven, es ke, kuando el emperador romano Constantino verso 312 i el rey etyopyano de Aksum en 380, se konvirtyeron al kristyanismo, los arabos, ke eran paganos, se toparon entre dos poderes fuertes: el poder kristyano de los Romanos al norte i etyopyanos al oeste, i al este el poder de los Persos sasanides, zoroastrianos en mayoriya. Entre los dos, los reyes de Himyar, el Yemen de oy, eskojeron verso el anyo 380 de azerse djudyos, i no solo eyos, ama una grande parte de la povlasyon.
Se konta, por egzemplo, komo el rey de Himyar Tuba Abu Kariba Asad, ke reyno sovre Himyar entre 390 i 420, se izo djudyo. Estava kon su armanda enserrando la sivdad de Katrib, al norte de su reyno, kuando kayo hazino. Los djudyos bivyendo en Katrib estavan luchando al lado de los otros moradores de Katrib, kontra su armada. Dos savyos djudyos de Katrib, oyendo ke el rey enemigo era hazino, demandaron a verlo, i le avlaron tan ermozo ke no solo renunsyo a enserrar la sivdad de Katrib, ama ensima dechido de azerse djudyo, el i toda su armada. I aboltado en Himyar, el rey demando a toda su povlasyon de azerse djudiya, lo ke una grande parte acheto i izo.
En 523, un otro rey djudyo de Himyar, named Yusuf Dhu Nuwas, atako a la sivdad kristyana de Najran, i aya mato a munchos kristyanos. Oyendo esto, el emperador romano kristyano Justinyo Iero (tiyo del muncho mas famozo Justinyano, ke va ser emperador despues de el en 527) empusha a los Etyopyanos, kristyanos eyos tambyen, de atakar desde la mar, lo ke azen en 525, i destroyen la armada de Dhu Nuwas, el kual eskoje de matarse echandose a la mar kon du kavayo. Desde este diya, fin del reyno djudyo del Yemen, ke va ser kristyano basho los Etyopyanos, asta 570. Este anyo, un principe djudyo yamado Saif Ibn Dhi Yazan, yama a los Persos Sassanides para arondjar al rey kristyano Masruk. De 571 a 632, son los Persos sasanides ke reynan sovre el Yemen asta ke un yemenito muzulmano, Ayhala el preto, eche afuera los Persos i tome el poder, ke va kedar entre las manos de los muzulmanos desde este tyempo.
De manera jenerala, se puede dizir ke los djudyos del Yemen, despues de tener sido los maestros del pais del tyempo de los reyes djudyos, fueron muy arrebashados, atrazados i mismo persegidos basho la dominasyon muzulmana.
No solo los djudyos, kuando eran liberos de tener sus relijyon, eran tratados komo dhimmis, i esto de manera muy pezgada, ama ensima eran empushados, i en vezes ovligados komo los uerfanos por egzemplo, de azerse muzulmanos. Kuando se supo ke el grande haham Rambam se topava en Ayifton, despues de 1170, el haham del Yemen Yakov ben Natanael Al Fayumi le eskrivyo para demandarle konsejo sovre kualo azer, i Rambam le respondyo por una letra yamada en ebreo Igeret Teman, la letra al Yemen, dando konsejos de koraje para nada abandonar de la fey, i se dize ke esta letra ayudo muncho a los djudyos del Yemen.
Kale dizir ke en una otra letra, yamada letra sovre la persekusyon, Rambam eskrive: “Kyen se aze matar por (…) el kidush Ashem (sanktifikasyon del nombre), ke sea bendicho i alavado; ama al ke vyene demandarme si deve azerse matar o rekonoser (a Mahomet) para no azerse matar, le respondo ke rekonoska i no se aga matar”. Esto mos amostra komo Rambam, afillu syendo muy fuerte en su fey, no se rekonosiya el derecho de embiyar los otros a la muerte.
Si Rambam fue onrado por todos los djudyos del Yemen, uvo un otro haham unos 400 anyos despues, ke tuvo el tambyen una grande influensa sovre syertos djudyos del Yemen, es el haham kabalisto Isaac Luria ke nasyo i muryo en Erets Israel (1534 – 1572).
Asigun lo ke meldi sovre Wikipedia (kualo seriya yo sin Wikipedia bendicha sea) los djudyos del Yemen se espartyeron en tres vandas:
Los djudyos Baladi (del arabo balad, pais) de la vanda de Rambam, kon yene una syerta influensa de la kabala de Luria,
Los djudyos Shami (del arabo sham, el norte, kijo dizir Israel) muy influensados por la kabala de Luria i por la liturjiya sefaradiya.
Los djudyos dichos Talmide ARambam (los dishiplos de Rambam) atados solo a la tradisyon asigun Rambam, sin el Zohar ni Luria.
Pasa el tyempo, i ayegamos al siglo 19, son los turkos osmanlis ke son los maestros del Yemen, i ayegan en el Yemen djudyos venidos de las partes evropeas del Imperyo osmanli, kijo dizir djudyos sefaradim, ke traen kon eyos haberes muevos i ayre mas fresko.
Dos viajadores djudyos, el franses Joseph Halevy i el austriako Edward Glaser, tyenen eyos tambyen una grande influensa sovre un haham del Yemen, Yihiya Kafah, ke moderniza el ambezamyento de los chikos i los avre a las luzes venidas de Evropa. El haham Kafah funda el movimyento Dor Daïm, la jenerasyon de los savyos. Son kontra la Kabala, i se refyeren a Rambam por lo ke es de la relijyon. Kontra los Dor Dalim se alevantaron en 1913 los partezanos del hahambashi del Yemen Yahya Itshak, yamados Ikshim, atados al estudyo de la kabala i del Zohar. Los Dor Daïm i los Ikhshim kedaron separados desde 1913 asta la aliya verso Israel en los anyos 1949.
Una koza ke no meldi, ama ke me aparesyo pishin kuando vide por la primera vez en Beer Sheva en 1955 un djudyo del Yemen, es su manera de yevar peot. Los ashkenazim – avlo de los sufus – tyenen peot i los sefaradim, afillu muy sufus, nunka tuvyeron por lo ke se, i esto vyene de una interpretasyon diferente de lo ke ay de azer kon esta mitsva travada de Vayikra XIX, 27: “No arrodees a rincon (peat) de vuestra cabeça, y no dañes (lo tashhit) a rincon (peat) de tu barba”. Komo interpretar no danyes? Para los sefaradim, i asigun Rambam, solo arapar es danyar, i no kortar kon tijera. Los Djudyos del Yemen yevan peot komo los ashkenazim, lo ke me da a pensar ke izyeron la misma meldadura del byervo ebreo tashhit.
Es en 1882 ke un primer grupo de unos 150 djudyos (o mas – meldi 2.000 en un otro teksto, ama deve ser en un tyempo mas largo) se fueron del Yemen i izyeron un viaje de …mueve mezes asta Yerushalaïm i al lado de la sivdad se instalaron en grotas komo trogloditos.
Entre 1919 i 1948, kuando fueron los inglezes en Erets Israel en vez de los Osmanlis, unos 15.000 djudyos del Yemen reusheron a venir, i entre eyos, en 1924, una famiya kon su ijika nasida en la sivdad de Dhamar un anyo antes. Esta ijika se va yamar Shoshana Damari i va ser la mas famoza kantadera de Israel, sovre todo en el tyempo del nasimyento del Estado. Los ke la oyeron – komo mi – kantar Kalaniyot o Bab el Wad nunka la podran olvidar.
En el Yemen las kozas se azen mas i mas sekanozas para los djudyos, komo en los otros paizes arabos, para dizir la vedra. Al lado del Yemen, en la sivdad de Aden 82 djudyos son matados en un solo pogrom en desyembre 1947. Al lado de Aden se topa un kampo ande los inglezes enserraron unos 5.000 djudyos venidos del Yemen i ke keriyan ir por la mar en la Palestina, lo ke les era proibido por los Inglezes. La Adjensiya djudiya va engrandeser este kampo para akojer los djudyos ke pueden fuirse del Yemen. Por esto el kampo es yamado Geula (Salvasyon) por los djudyos. En mayo 1949, el governo del Yemen permite a los djudyos de fuir del Yemen. Kaji todos, kijo dizir unos 45.000, aprovechan esta otorizasyon, entendyendo ke no se save kuanto tyempo va turar. Ama ir a pye a Aden de todas partes del Yemen es una odisea para los poveretos Djudyos kon vyejos i kriaturas, muertos de ambre i de sed, atakados en kamino por bandidos i por ladrones, i ayegando al kampo de la Geula mas muertos ke bivos. Los medikos israelyanos ke se topan en el kampo para akojerlos son espantados de ver en ke hal estan. Afillu si son numerozos, afillu si kale embiyarlos en sekreto por modo de todos estos paizes arabos en gerra kontra Israel, los medikos se renden kuenta ke kale salirlos del kampo lo mas presto posivle i embiyarlos en Israel para ke sean kurados.
Veo ke ya vino el tyempo de kedarme. El kusur va ser, no para el djueves ke vyene, syendo ke no estaré en Paris, ama para el djueves de despues, 16 de novyembre, si kyere el Dyo!
Edmond Cohen
Paris Fransya