Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Vos akodro ke agora Radio J tyene un sityo internet. Agora mis emisyones se pueden oir en el mundo entero indose sovre Radio J kon internet ( http://www.radioj.fr/node/145 ) sea en direkto, sea kuando se kyere: mis emisyones (kuando el tekniko lo kyere byen) son enrejistradas a mi nombre.
Vos akodro tambyen ke el proksimo atelye de konversasyon de la asosyasyon Vidas Largas se tendra el lunes 2 de fevrero de las tres a las sinko en el Centre Communautaire en Paris.
Oy tuve la gana de avlarvos de los scouts djudyos, syendo ke si yo nunka fui scout, mi ijo el mas chiko lo fue durante su mansevez entera, al punto ke konosyo a su mujer (ke morava en Nice) en un kampo scout en Espanya, ande los scouts de Paris i los de Nice se fueron en djuntos. Agora tyenen un ijiko de syete anyos ke ya es scout el tambyen (i una ijika de 5 ke por esto dainda no es).
En primero unos kuantos byervos sovre lo ke es el scoutismo. Todos savesh ke el scoutismo fue fundado en 1907 por un zabit ingles ke ya era retirado, Lord Robert Baden-Powell. Este zabit aviya kombatido en la armada ingleza durante la gerra de los Boers en Sud Afrika, i se izo konoser kuando reusho a rezistir al enserramyento de la sivdad de Mafeking por enemigos kuatro vezes mas numerozos. Para su lucha se aviya servido de los mansevikos de la sivdad komo eksploradores (scouts en ingles) bekshis, postadjis, observadores, ets.
Despues de la gerra, aboltado en Ingletyerra, penso ke seriya bueno de kontinuar de mantener a los mansevikos en una organizasyon asemejando a una organizasyon militar, ama para la paz i la buendad. “A la fin de mi karrera militar, disho Baden-Powell, me esforsi de transformar lo ke era la manera de ambezar a los ombres de azer la gerra, en una manera de ambezar a la mansevez de azer la paz; el scoutismo no tyene nada de ver kon los prinsipyos militares”.
El 29 de djulyo 1907, a la edad de 50 anyos, organiza un kampo kon vente mansevikos en la isla de Brownsea. Esto va ser el empesijo de un movimyento de mansevez ke va enfloreser en todo el imperyo britaniko en unos kuantos mezes. Vyene en Fransya en 1909. En 1910, el movimyento a ganado kaji el mundo entero!
Meldi ke empeso en Turkiya en 1912. Mi madre, de bendicha memorya, nasida en 1915 i ke izo sus estudyos en la eskola de la Scotish Mission (protestante) en Estambol, fue girl guide kuando era mansevika, vamos a dizir entre 1925 i 1930.
Esto dicho, mi madre deviya ser kon los scouts protestantes britanikos. No uvo scoutismo djudyo en todos los paizes.
Yene kale saver ke el primer grupo djudyo de scouts ke nase es, si no me yerro, en 1913 en New York. Otro nase en 1919 en Tel Aviv, i a poko a poko, va aver scouts djudyos en paizes del mundo entero (ama no en Turkiya, si no me yerro).
I en Fransya? En Fransya, un estudyante manseviko de 17 anyos, Robert Gamzon, inyeto, por su madre, del haham bashi de Paris, Alfred Lévy, aze konosensya en 1922 de lo ke es el scoutismo vyendo a los scouts protestantes, i en 1923 el da nasimyento al primer grupo scout djudyo de Fransya. Toma el nombre de Castor Soucieux (kastor – beaver en ingles – merekiyozo). En 1926, da nasimyento a un scoutismo djudyo de mansevikas, i en 1930 se kaza kon una de estas mansevikas (Denise Lévy) nombrada Pivert (woodpecker).
Kualo es el scoutismo djudyo en Fransya? Es el scoutismo, kijo dizir un movimyento de mansevez asigun las ideas de Baden-Powell, dunke komo los otros movimyentos scoutes (en Fransya, agora, ay scoutes katolikos, protestantes, laïkos, djudyos i muzulmanes) kon esta partikularidad de ser djudyo. En 1932, Gamzon obtyene la unifikasyon de todos los djudyos scouts en lo ke se yama el minimum komuno: observar shabath i kasherut. Los ke no achetan esto se pueden ir, sea, si son mas laïkos, ande los scouts laïkos, o ande los movimyentos djudyos syonistos komo Hashomer Hatsaïr por egzemplo. Ande los scouts djudyos, no son ovligados de ser syonistos, ni ovligados tampoko de no serlo. I para los ke topan ke los scouts djudyos no son bastante djudyos, ay movimyentos mas relijyozos komo los Bne Akiva, ke son tambyen syonistos…Komo diriya el profesor Sephiha, kada uno kon su djiz i kon su shishit!
El scoutismo djudyo se desvelopa a poko a poko, sale de Paris para ganar las otras sivdades de Fransya, i despues de Afrika del Norte. Afillu si el movimyento aviya nasido entre djudyos fransezes de la burgeziya, va akojer todas las olas de djudyos venidos de todas partes de Evropa, sovre todo de Evropa del Este i despues de Almanya a la venida de Hitler.
Pasa el tyempo, i ayegamos al empesijo de la gerra, en 1939, i la venida de los Almanes en Fransya en 1940. Malgrado esto, los scouts (ke se yaman EIF, Eksploradores Israelitos de Fransya) se reunen en Viarose ande dechidan de kontinuar su lavoro, i esto mismo en la zona norte okupada por los Almanes. Malgrado la Gestapo i las deportasyones, los scouts de Paris kontinuan sus aktividades, ke konsistan en ayudar a los otros djudyos de todas las maneras posivle. Mismo despues del aferramyento del Vel d’Hiv, en djulyo 1942, van a ser kapaches de azer salir a unos kuantos mansevikos scouts ajenos del Vel d’Hiv. Sus kapo, Fernand Musnik, ferido de la gerra, va organizar la salvasyon de djudyos: Marc Amon, selanikli de 20 anyos, se okupava de saver kyen eran los djudyos menasados de aferramyento, Sam Kugel dirijiya el servisyo de falsos papeles (falsos papeles tan ermozos ke la Rezistansya Franseza va demandarle de azerle tambyen ), Jo Degen el servisyo de bushkar eskondijos siguros. Musnik i Amon van a ser ser aferrados en 1943 i deportados en Auschwitz ande va morir Amon. Ama es en Dachau ke, en marso 1945, se va morir Musnik de kanseryo despues de aver echo la marcha de la muerte.
Vos dishe dos byervos sovre Marc Amon, este selanikli ke muryo en Auschwitz. Vos vo avlar un poko mas sovre un otro djudyo de los muestros, nasido en Selanik en mayo 1924, i ke teniya dunke 18 anyos a la venida de los almanes en 1940. Se yama, digo se yama porke por lo ke este ombre de 90 dainda bive, Freddy Menahem. Si entendesh el franses, vos kombido de ir a verlo i oirlo durante 14 minutos sovre youtube. Abasta bushkar Freddy Menahem sovre Google i lo topash. Vos asiguro ke no vos vash a enfasyar.
Aviya venido en Fransya en 1930, dunke a la edad de 6 anyos. El 11 de novyembre 1940, dunke a los 18, aze parte de la famoza manifestasyon de unos 3.000 estudyantes ke kyeren selebrar delantre el Arko de Triumfo en Paris la viktorya franseza de 1918 unos 15 diyas despues ke Petain anunsyo a la radyo ke la Fransya iva kolaborar kon los Almanes. Esta manifestasyon, por siguro proibida por los almanes i la polisiya franseza, i ande uvo unos 15 feridos i 200 aferrados i metidos en prezo, es konsiderada komo el primer akto de rezistansya en Fransya.
Despues de esto va ser kapo de las milisyas patriotikas del sinken arrondissement de Paris. Es en estas milisyas ke va kombatir el 20 de agosto 1944 para tomar la mayoriya de Paris. Va mismo ser deputado en oktovre 1944, ama lo va kedar solo 3 diyas, porke se apersivyeron ke no teniya dainda la edad para pueder ser legalmente deputado…
Esto es su rolo en la rezistansya franseza. Ama al lado de esto, ay su rolo en la rezistansya djudiya scout. Desde 1939, Freddy Menahem era kapo de su grupiko (patrouille en franses). En 1940, Musnik le topa un lokal en Paris, rue Claude Bernard. Menahem se va kedar aya durante toda la okupasyon, lavorando -a eskondidas, porke era proibido – para los scouts djudyos, al punto ke fueron 800 mansevikos i mansevikas en el kortijo para resivir en 1943 la vijita de Gamzon (el kastor merekiyozo, me olvidi de dizirvos ke Menahem era Girafe – Jirafa).
La haliz rezistansya djudiya sivila empeso despues del aferramyento del Vel d’Hiv el 16 de julyo 1942. Menahem el mismo es aferrado a las syete de la demanyana. A las ocho i medya logra de fuirse, i a las mueve, ya se topa rue Claude Bernard i resive la misyon de avrir una kaza para eskonder las kriaturas ke pudyeron salvar del aferramyento.
En avril 1943, Simon Levitte vyene a verlo i le dize:”agora vas a lavorar para la sejena”. Kualo es la sejena? Ofisylmente, era la sejena seksyon (scoutismo, ama komo el scoutismo djudyo es agora proibido, el nombre es Servisyo sosyal de los mansevos) de la kuatrena divizyon (mansevez) de la UGIF, la Unyon Jenerala de los Israelitos Fransezes, fundada por orden del governo de Petain para aunir todas las organizasyones djudiyas. En vedra la sejena lavorava a eskondidas para salvar lo mas posivle de djudyos, sovre todo mansevikos de mas de 15 anyos, syendo ke otras organizasyones se okupavan de los mas chikos.
Menahem i sus amigos ke vos dishe mas antes van a lavorar diya i noche. En los sesh primeros mezes de 1944, van a azer 7.000 falsos papeles. Menahem aviya echo sus estudyos ande los papazim katolikos, i por esto konosiya un poko, de kuando era chiko, al ovispo de la sivdad Le Mans. Se va verlo, agora el, Menahem, es un mansevo de 19 o 20 anyos, i dize al ovispo ke lo konosyo de kuando era chiko i ke agora tyene menester de el, para eskonder kriaturas djudiyas. El ovispo acheta , i va eskonder o azer eskonder mas de 700 kriaturas i unos 100 adultos.
Menahem va ser ayudado tambyen por los scouts protestantes, ke van a darle a el mismo una falsa karta de myembro del scoutismo protestante kon la alkunya Menard, muncho mijor ke Menahem en estos tyempos…
Vos avli un poko mas de Freddy Menahem porke este ombre es de los muestros i ke dainda bive, savyendo ke su aksyon – i la de munchos de sus amigos ke lo pagaron de sus vida – a salvado a miles de djente ke sin eyos no egzisteriyan oy.
Kon esto todo vos konti solo lo ke se pasava en Paris. Dainda poko vos avli de lo ke izyeron los scouts djudyos en el sur de Fransya.
En la zona sur se topa el fundador Robert Gamzon, i arrekoje lo mas de kapos del scoutismo djudyo en un eskondijo en la sivdad de Moissac (famoza por su uva i su vino, ama es vedra ke esto se puede dizir de munchas sivdades fransezas). El lavoro es de salvar lo mas posivle de mansevikos djudyos eskondyendolos kon falsos papeles, i por esto empesar por topar los eskondijos.
El kapo de la Sejena, de la kuala ya vos avli por lo de Paris, era Marc Haguenau, aferrado en fevrero 1944, i pishin torturado por la Gestapo. Reusho a echarse por la ventana i muryo ansina. Teniya 40 anyos.
El lavoro de la Sejena era de aprovar de azer pasar en Suisa lo mas posivle de kriaturas djudiyas. Uno de los ke se okupava de esto era Georges Loinger, nasido en 1910, i ke teniya dunke 34 anyos en 1944. Agora tyene 104 i le dezeamos ke biva asta 120 (ya izo lo mas yuch!). El tambyen kontribuyo a salvar un alay de kriaturas.
Otros no tuvyeron el mismo mazal. Ya vos avli en una otra emisyon de Marianne Cohn ke kijo azer pasar la frontera a kriaturas, fue aferrada, torturada i matada.
A poko a poko, los scouts del sur entraron en la rezistansya armada. En junyo 1944, eran 60 rezistantes organizados en una armadika yamada Kompaniya Marc Haguenau, del nombre de este rezistante muerto poko antes. Aziya parte de la OJC (Organizasyon djudiya de kombate). Al kavo del mes eran 120. Resiviyan armas por parachut. En agosto, los Almanes los toparon i mataron 7 de eyos, entre los kuales Gilbert Bloch, kapo de 24 anyos. El 19 de agosto la kompaniya Marc Haguenau es yamada para atakar a un treno alman yevando kanones i armas pezgadas. Tres djudyos fueron feridos ama los almanes tuvyeron sinko matados, munchos feridos, 60 prezoneros, i munchas armas tomadas.
El 21 de agosto, entro en la sivdad de Castres ke libero, i de aya se fue kombatir asta la liberasyon de la Alsace, lo ke kosto dos muertos muevos.
Aki me vo kedar de la istorya gloryoza del scoutismo djudyo franses. Pago muy karo su aksyon en favor de sus ermanos. Uvo unos 150 kapos scouts djudyos fuziyados o deportados ke no aboltaron.
Ay munchos giborim ke no puedo nombrar porke tengo dainda de avlar de lo ke se paso despues de la gerra en el scoutismo djudyo internasyonal, afillu si martes estavamos dainda komemorando el setenten aniversaryo de la entrada de los Rusos en el kampo de Auschwitz.
A propozito del scoutismo djudyo internasyonal, kale saver ke, ya en 1931, scouts djudyos de la Evropa entera aviyan venido en Fransya para partisipar al primer kampo internasyonal de scouts djudyos. Se dechido aya de fundar una unyon mundyala del scoutismo djudyo. Ama vino Hitler al poder i esta Unyon no se pudo azer. Es solo el 2 de novyembre 2006 ke se pudo fundar en Yerushalayim el Foro Internasyonal de Scouts Djudyos, entre delegasyones venidas de Israel, de Estados Unidos, de Ingletyerra i de Fransya.
Agora son los mismos kon tambyen los scouts brazilenyos. No solo los djudyos: es el scoutismo brazilenyo entero ke kijo entrar en el foro.
El eskopo de esto todo es de desvelopar el scoutismo entre lo mas posivle de djudyos. Por lo ke es de mi, komo lo dishe al empesijo de esta emisyon, tengo una muy buena opinyon sovre el scoutismo djudyo, porke vide ke este movimyento aze valer en djuntos el ideal scout, ke mete arriva las valores moralas i de paz, i el djudaismo, lo ke no es mal tampoko.
Esto dicho, vos digo al djueves ke vyene, si kyere el Dyo!
Edmond Cohen
Paris – Fransya