Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Vos akodro ke agora las emisyones de Radio J se pueden oir sovre internet. Si el tekniko lo kyere byen, mi emisyon se puede oir kuando se kyere, eya sola, o de toda manera se puede oir indose kuando se kyere al kavo de la redifuzyon de la emisyon del djueves a la tadre.
Ayer tuvimos el diya de Kipur, i auguro ke tuvitesh un tanith livyano. Agora kale mirar delantre i aparejarse para Sukoth, ke va empesar alhad a la tadre. De agora vos dezeo buenas fyestas asta Simhat Tora.
I agora de kualo avlarvos oy? Me pensi ke seriya enteresante de avlarvos de un filantropo djudyo sefardi del siglo 19, ke lavoro i izo muncho no solo para los djudyos ama tambyen para la Fransya i los fransezes, ke se yamava Daniel Iffla, i se aziya yamar Osiris.
daniel_ifflaYa vos dishe dos byervizikos sovre este ombre kuando vos avli, en mi emisyon del 23 de desyembre 2010, sovre los djudyos de Bayonne, dizyendovos ke este Osiris fue el ke dyo las paras ke eran menester para fraguar en Paris, en 1877, el kal de Buffault ande yo mismo me topava ayer para Kipur.
Empesaremos por el empesijo, kijo dizir el nasimyento en Bordeaux, el 23 de djulyo 1825, de Daniel Iffla, ijo de Isaac Iffla, chiko merkader de 25 anyos, i de su mujer Lea Cardozo d’Hourbino, tambyen aedada de 25 anyos.
Por la alkunya se ve ke la madre es de orijen krypto-konversa, komo lo eran kaji todos los djudyos de Bordeaux komo de Bayonne, ke teniyan antepasados ke aviyan fuyido la Inkizisyon del Portugal i aviyan topado refujyo en Fransya komo sözde kristyanos (si aviyan atorgado ke eran djudyos en vedra, no uvyeran sido akojidos por el Reyno de Fransya).
En kuanto a la famiya Iffla del padre, meldi ke aviyan venido en Fransya en los anyos 1720, sea mas de 120 anyos antes del nasimyento del chiko Daniel, desde la sivdad de Sale, serka de Rabat i a su norte, en el Marroko. No pude saver si esta famiya era djudeo-espanyola, komo lo son los djudyos del norte del Maroko. (Sale es por siguro al norte de Casablanca i de Rabat, ama al sur de Kenitra, ke un tyempo se yamo Port-Lyautey). De toda manera una koza es sigura: syempre Daniel Iffla se konsidero komo syendo sefardi.
Nasyo en una famiya bastanta prove, i izo sus primeros estudyos en una eskola djudiya de Bordeaux, ke va deshar a los 14, dunke verso el anyo 1839, para suvir asta Paris i azer otros tres anyos de estudyos en la eskola Turgot, ke dainda no es el liseo ke sera despues, i ke vyene solo de fundarse tres anyos antes komo eskola primarya.
En 1842, a la edad de 17 anyos, entra para lavorar ande un ombre de Bolsa yamado Moreau. Aya se ambeza muy presto los echos de la bolsa, i se va lavorar ande djudyos yamados Mirès i Millaud. I muy presto se va azer muy riko, lavorando solo, i lo ke es kuryozo es ke reushe lo ke dinguno a nunka reushido, ganar muncha para sin tomar rizikos. Es meoyudo, kyere azer a su idea, i sus ideas son fruchiguozas! No va avrir banka, no va krear kualkyer kompaniya, va lavorar soliko i por si mizmo.
En 1854, a la edad de 29, kaye pedrido de amor por una mansevika kristyana, Léonie Carlier, i se kaza kon eya. Malorozamente, un anyo solo despues, en un negro diya, esta mujer de 19 se muere al nasimyento de dos buchukes ke se mueren en mizmo tyempo. El luto i la dolor van a ser terrivles para muestro Daniel, ke de este diya va kedarse solo, sin mujer ni kriaturas, i no se kazara nunka mas despues. Vida entera va guadrar tal i komo era la kamareta de su mujer sin tokarla, i se kedara syempre fyel a su memorya.
Poko despues, Daniel Iffla se aze yamar Osiris, a tal punto ke va obtener un juzgamyento en 1861 permityendole de yamarse Iffla-Osiris. Deke tener tomado este kuryozo nombre de un dyo de la mitolojiya ejipsyana? En vedra no se save byen, i komo a kada vez kuando no se save byen, ay munchas eksplikasyones:
– la primera seriya ke su madre prenyada de el i tenyendo otro ijo ido en un vapor yamado Osiris, uvyera prometido ke si su ijo marinero aboltariya bivo de su viyaje, el ijo ke le iva naser seriya yamado Osiris…
– la sigunda seriya ke Daniel keriya ser el Osiris de la mitolojiya ejipsyana arrebivido por su mujer Isis, ke seriya la defunta Léonie.
– la tresera seriya ke Daniel era fran mason, i ke en la franka masoneriya, el nombre de Osiris, padre de la luz, es muy konosido syendo ke es el nombre del Ojo del kual se van tres rayos, figura klasika del masonismo.
Vos desho eskojer la eksplikasyon ke keresh, ama de toda manera este ombre no aziya komo los otros, i es tambyen por esto ke se kedo solo.
Agora vamos a vinir a lo mas importante, ke es la ovra filantropika de Osiris. Kale saver ke Osiris era muy eskaso para si mismo, i muy hovarda para los otros. Gastava unos 50.000 frankos al anyo para el mismo, kuando ganava unos dos milyones al anyo. No kijo elektrisita en su kaza porke kostava demaziya. Komiya en chikas lokandas. De orijen eznaf, biviya komo un eznaf. I al lado de esto gastava mas i mas para un alay de ovras, de fraguas de kales, ets.
Disho a un amigo, poko antes de su muerte en 1907: “La djente se burla de mi eskasura. A mi ke me sale. A mi me agrada de pensar ke de mi eskasura se aprovecharan los menesterozos, i ke, al kavo al kavo, es para eyos ke lavori”.
I agora avlaremos de lo ke izo Osiris para los otros.
Mas de un siglo antes de Coluche, empeso por kerer dar “pan para todos” (vos akodro lo ke era el pan en estos tyempos, i komo Victor Hugo konto en su livro Les Misérables (los desmazalados) komo un ombre puediya toparse kondenado a los lavores forsados solo por tener arrovado un pedaso de pan). Osiris fundo en varyas males de Paris “ornos populares” publikos para dar de komer de baldes a los menesterozos.
El es tambyen ke invento el mikro-kredito, sin interes, para los merkaderikos de la kaye. Emprestan 50 frankos (unos 160 euros de oy) lo ke les permite de merkar sus ropas antes de dar atras despues de la vendita, las paras emprestadas.
Osiris es a la vez un fransez muy patriota (su papu kombatyo al lado de Bonaparte en Toulon i otras batayas) i un djudyo sefardi muy apegado kon su relijyon.
Empesaremos por el fransez patriota. Kuando meldi su vida, me akodri de otruno, el nasido en 1895, kyero avlar de Albert Cohen, ke kriatura teniya en su kamareta una forma de altar konsagrado a las gloryas de la Fransya…Osiris es un poko lo mizmo en mas aedado. Los dos dyozes fransezes de Osiris son en primero Jeanne d’Arc i Napoleon. Por lo ke es de Jeanne d’Arc, el es ke ofrese dos estatuas a kavayo de la manseva, eskultadas por su amigo Emmanuel Fremiet: la una la ofrese a la sivdad de Paris, ke la mete Place des Pyramides, la otra la ofrese a la sivdad de Nancy para amostrar el atadijo de los fransezes a los departamentos de Alsace i de Lorraine tomados en 1871 por los Almanes.
La ironiya de la istorya es ke agora es la Frente Nasyonala, el partido eredero de Vichy i de la kolaborasyon, ke se reune kada anyo en Paris el primo de mayis, fyesta de Jeanne d’Arc, delantre la estatua de la manseva, entera dorada, ofresida por un djudyo, ama por siguro sin saverlo… Si lo saviyan, esto no trokariya nada: los antisemites se kedan antisemites kual ke sean las buenas kozas ke izyeron los djudyos. Esto, malorozamente, es una koza de saver.
Por lo ke es de Napoleon, Osiris merka en Waterloo un kampo frente al monumento dicho del Leon, ande aze fraguar un memoryal yamado “la agila ferida” , para la glorya de los granaderos de la Guardya Imperyala matados sin renderse.
Mijor, en 1896, merka el palasyo de la Malmaison, ande biviya Josephine, la Imperatris primera mujer de Napoleon. Este palasyo se estava derrokando de si para si i es Osiris ke va azer los lavores enormes para adovarlo, ke var merkar ande la topa la mobilya ke se topava aya, i ke despues va dar lo todo al Estado franses.
No solo Osiris se amostra hovarda kon la Fransya, ama se va amostrar tambyen hovarda kon la Suisa. Va azer regalo de una estatua de Guillaume Tell a la sivdad de Lausanne, para rengrasyar la Suisa de tener akojido la armada franseza de Bourbaki en 1871. Osiris, en su testamento va mismo deshar a la sivdad de Lausanne paras para fraguar una kapiya dedikada a Guillaume Tell, i en mismo tyempo paras a la komunita djudiya de Lausanne para fraguar un kal.
Al lado de esto, Osiris va fraguar a lo manko syete otros kales: en Arcachon, en Bordeaux, en Bruyères, en Tours, en Tunis, en Vincennes, i en Paris, el kal de la rue Buffault. Todos estos kales no son de la misma importansya. El mas chiko es el de Bruyères, ke kosto solo 15.000 francos.
Por lo ke es del kal de la rue Buffault, es una otra koza. Ya se fraguo en 1874 (ama los lavores aviyan empesado en 1867) el kal de la rue de la Victoire (en primero deviya de salir rue de Châteaudun, ama la imperatriz Eugénie, espanyola muy katolika i mujer de Napoleon III, refuzo ke los djudyos tengan un kal ke sea mas ermozo ke las iglesias de al lado…Es vedra ke el kal fue eskapado kuatro anyos mas despues ke el Imperyo tenga sido echado a basho, ama era demazyado tadre para trokar de muevo los planes).
Los djudyos sefardim keriyan un kal para eyos, ke sea ermozo komo el de la Victoire, fraguado por lo mas kon las paras de la famiya Rothschild. Fundan una sosyeta sivil ke arrekoje 300.000 frankos. Es muncho, ama solo para merkar el terreno kale pagar 245.000 frankos. Ande topar las paras para la fragua de un grande i ermozo kal? Es Osiris ke vyene i ofrese de pagar a el solo 200.000 frankos. Ama komo syempre, mete sus kondisyones: kyere ke se metan dos lajas de marmol kon los nombres de grandes djudyos i otros grandes ombres… i tambyen de su defunta mujer. Ay un ueso: la mujer de Osiris no era djudiya, ni tampoko Heine ke era konvertido. En kuanto a Spinoza, era enheremyado…El haham bashi de Fransya, Zadok Kahn, se opone a estos nombres. El pleto va delantre la djustisya: Mme Osiris kedara, ama los konvertidos o enheremyados se tyennen de ir (i no los halizes goyim komo Mirabeau o Clermont Tonnerre). Un djuzgo de Shelomo ke va vinir unos diez anyos despues ke el kal de Buffault a sido eskapado en 1877, solo tres anyos despues de el kal de la Victoire.
La amargura es ke un siglo mas despues, en 1977, ya no aviya en el kal Buffault ni un solo djudyo sefardi de Bordeaux o de Bayonne. Kedavan unos kuantos sefardim djudeoespanyoles. Oy ni eyos no vyenen kaji mas, solo unos kuantos, muy pokos, el diya de Kipur. El kal Buffault es oy un kal para los djudyos de Afrika del Norte. Si eyos no estavan, el kal seriya vaziyo anyo entero. Ama esto no es la kulpa de Osiris.
Osiris no se okupa solo de fraguar kales. Se interesa tambyen a un alay de kozas otras, komo por egzemplo merkar los 65 ektaros del dominyo de vinyas de la Tour Blanche, en la rejyon de Bordeaux, para dar un grande vino de Sauternes. Kyere azer komo los Rothschild i sus Château Yquem, i se interesa al vino afillu si el mismo kaji no beve vino. Demanda mismo a Louis Pasteur de ayudarle para amijorar la vinifikasyon.
A su muerte, Osiris desha este dominyo al Estado franses, kon la kondisyon ke aga una eskola “popular i de baldes”, para ambezar la vinya i la vinifikasyon. Lo ke fue echo.
Tambyen para Bordeaux, su sivdad de nasimyento, ofrese a la sivdad sesh fuentes publikas, a la manera de Richard Wallace, el ingles ke ofresyo a la sivdad de Paris 50 fuentes. Demanda ke una de estas sesh fuentes sea instalada place del General Serail, en la male de su nasimyento. Despues de la gerra, tres de estas 6 fuentes, an dezaparesido, al pareser arrovadas por los Almanes. Kuando en 2003 el mayor de Bordeaux Alain Juppé kijo trokar de lugar la fuente de la plasa Serail, a la kontra de lo ke aviya sido prometido, un djudyo yamado Richard Zéboulon se metyo kontra i el es ke gano.
A parte de esto, Osiris desho por testamento a la sivdad de Bordeaux una suma de dos milyones de frankos para meter al bodre de la Gironde un “vapor-sopa” ke sea yamado Osiris, para dar a komer de baldes a los proves de la sivdad. Este vapor va dar mas de 14.000 komidas al mez entre 1912 i 1940. En 1944 va batirearse por modo de la gerra.
Osiris se muere en 1907. Desha un testamento de 14 pajinas, ande aze un alay de donos a varyas ovras, i el kusur, ke reprezenta unos 40 milyones, es deshado al Instituto Pasteur, en “memorya del grande Pasteur, una de las gloryas mas ermozas de mi pais”, dize Osiris en su testamento. Es la mas grande suma ke resivyo este instituto asta oy. I es grasyas a estas tantas paras ke se pudo azer el Instituto de radium de Marie Curie.
I para eskapar kyero kontarvos komo Osiris nunka se olvido de su amor por su mujer, ke keriya, afillu si eya era kristyana i el djudyo, ke sus dos tumbas en el semeteryo de Montmartre sean al lado la una de la otra. No era posivle porke kada tumba teniya de toparse en su male. A poko a poko, ograsheando durante 35 anyos, Osiris obtuvo ke la tumba de su mujuer sea al bodre de la pared de su male, i Osiris dechido ke su tumba seriya djusto al lado de la suya, separada por una sola pared, i al kavo esta pared pudo ser derrokada…
Kon esta ermoza istorya de amor, vos desho astal djueves ke vyene, si kyere el Dyo!