En los ultimos dias estamos meldando en los jurnales amerikanos del djuzgo (trial en inglez, mahkeme en turko) ke va tener lugar a la semana ke viene entre dos kehilas djudias istorikas de Norteamerika: Shearith Israel/Spanish Portuguese Congregation en New York, i Touro synagogue de Newport, Rhode Island.
No se si es de alegrar o keshar ke el biervo “sefaradi” no esta pasando en estos artikolos (mas djusto dezir, el mezmo artikolo del Associated Press ke se publiko en miliun periodiko ayer, debasho el titolo “A Bitter Battle for Control of America’s Oldest Synagogue” (una batalia amarga por kontrol de la mas antigua sinagoga amerikana) o otros semejantes titolos (komo en este: Trial Over Touro Synagogue, The Nation’s Oldest Jewish House Of Worship, Begins In Rhode Island.
Ma kuando meldamos el artikolo, vemos ke en kestion es unos rimonim antiguos de plata ke estan valorados a mas de 7 milyones de dolares amerikanos. Los rimonim se topan en la kehila de Touro, ke por razon de difikultades finansiales los kere venderlos. Ma Shearith Israel dize ke apartiene a eya, i lo trusho el echo al djuzgo.
Esta “batalia” tiene una baza de larga istoria sefaradi, porke las dos kehilot (kongregasiones) fueron fondados por los primeros Sefaradim en la Amerika (aunke, komo dishe, el artikolo dize solo “djudios” i no sefaradis.)
Aki vo tratar de dar una kurta version de akeya istoria, empesando de la istoria de las dos kehilot.:
Shearit Israel i Touro son las primeras sinagogas del Norte Amerika. Shearit Israel fue fondada por los 24 Sefaradim ke arivaron en 1654 de Recife, Brazil, a “New Amsterdam” (ke despues se izo New York.) Otros 15 (tambien sefaradim) vinieron a Newport 4 anyos despues de Barbados, despues otros tambien se adjuntaron a estas . (Todos eran djudios espanyoles i portugezos, ke es sefaradis de Amsterdam i Londra, venidos enprimero para Brazil i las islas de Surinam, Barbados, Curaçao, i Jamaica.)
Shearith Israel fue la unika sinagoga en New York desde 1654 asta 1824. Su edifisios anteriores no egzisten, el aktual es de 1897.
Los de Newport fondaron la kehila yamada ‘Yeshuat Israel’, i sus sinagoga fue dedikada en 1763. Oy es la mas antigua sinagoga (edifisio) de Norte Amerika, i es un “National Historic Site”. ( Tres prezidentes la vijitaron: Washington, Eisenhower, i Kennedy.) Duante la revolusion i gerra de independensia, los djudios de la sivdad se fuyeron a otros lugares, kedo solo el Hazan Isaac Touro, ke era muevo venido de Amsterdam. La sinagoga sirvio komo ospital. Kuando ya se fueron los inglezes (en 1779) los djudios aboltaron demuevo, i abolto a ser kehila. En los 1820s se empeso a yamar kon el nombre de Touro.
Estoria de los Rimonim:
En los anyos ke estava serrada la kehila de Newport, sus kontenidos fueron transferados a Shearith Israel en New York. Kuando se avrio demuevo, Shearith se los mando todos atras, inkluyendo los rimonim. Ma en 1903 la kehila paso a ser posesion de Shearith Israel, la kuala elkilava el edifisio a Yehsuat Israel, o Touro. por un dollar al anyo!
Agora los de Touro dizen ke los rimonim son suyos i pueden venderlos porke tienen menester de paras. El Muzeo de Artes Finas de Boston ofresyo a merkarselos por $7,4 milyones en 2011, ma se arrepintieron despues de ver el pleto entre las dos kehilot
Shearith dize ke es el “patron benevolente” de la kehila de Newport, i ke los rimonim apartienen a eya. En la litigasion dize ke kere kitar komo kiradjis (alkiladores) a Yehsuat Israel del edifisio Touro, ma al juez disheron ke no keren kitar a la kehila, si no ke remplasar sus dirijadores, ke keren vender “un pedaso de la istoria de Touro”.
El djuzgo puede turar dos semanas, ma la desision puede ser mas tadre.
Pleto entre djudios nunka no es ermozo. En este kavzo, puede ser es mijor ke no estan uzando el biervo “sefaradi.”