Sobibor

Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Mi emisyon se puede oir en el mundo entero sovre internet, al sityo de Radio J, http://www.radioj.fr, sea en direkto (el djueves a las 4 i sesh, kale klikar arriva a la derecha, sovre Ecoutez Radio J en direct) sea en redifuzyon, indose al kavo de la redifuzyon de las emisyones de la medyudiya del djueves.
De otra parte, vos akodro ke el proksimo atelye de konversasyon de Vidas Largas se va tener el martes primo de marso, de las dos a las kuatro, en el Centre Communautaire. Estos atelyes son avyertos a todos, venid munchos.

Vos tengo tambyen de dizir ke no vo pueder aparejar una emisyon para el djueves ke vyene 25 de fevrero, syendo ke vo ser muy okupado kon el aparejamyento de las dos seremoniyas, una este alhad en Paris, otra myerkoles 24 en un kazal del sur de Fransya, para el entrego de la medaya de los djustos a los desendyentes de las santas mujeres ke me eskondyeron durante la gerra, a mi i a mis padre i madre, i tres otros djudyos. Vos kontaré esto todo en una emisyon espesyala ke tengo la entisyon de azer despues de estas seremoniyas. Ama entremyentres, el djueves ke vyene, va ser una redifuzyon.

Esto dicho, para oy vos kyero avlar de una koza un poko apretamyento de korason, kijo dizir el kampo de Sobibor i la rebuelta i fuyida del kampo el 14 de oktobre 1943. Lo ke me dyo la idea de azervos esta emisyon, es kuando me ambezi ke el Prezidente Poutin dyo el 22 de janvier de este anyo, 25 anyos despues de su muerte, à Alexander Peshersky, el ke organizo la rebuelta i la fuyida, la medaya de Gibor de Rusiya, la mas alta medaya de Rusiya, ke tyene munchas.

Kale saver ke desde el otonyo 1941, los Almanes an dechidado de matar a todos los djudyos de Evropa del este, i sovre todo de Polonya. Este lavoro tomo el nombre de Operasyon Reinhard, no pishin, solo despues de la muerte el 4 de djunyo 1942 de Reinhard Heydrich, el ke se okupava al empesijo de este lavoro, i ke fue firido a muerte el 27 de mayo por rezistantes tchekos. Ama en marso 1942 ya empesa la fragua de un kampo de eksterminasyon (entre otros, komo Belzec, Chelmno i Treblinka) serka de la sivdadika de Sobibor ke se topa al este de la Polonya, muy serka de las fronteras de Ukranya i de Byelorussiya.

En avril 1942, ya no es mas Heydrich, sino el Brigadeführer Odilo Globocnik, ke es kargado del lavoro jeneral de matansina. Eskoje el Obersturmfuhrer Franz Stangl komo komandante del kampo. I este se va en el kampo de Belzec para ver komo se aze aya i ambezar el lavoro de matar a lo mas munchos en djuntos.

Por lo ke es de Sobibor, tenemos el plano del kampo, ke aze 400 metros sovre 600 metros, i se topa separado en kuatro pedasos:

– el vorlager (kampo de delantre, ande moran los SS i sius ayudantes (baltes o ukranyanos)

-el kampo 1, ande moran los prezoneros ke lavoran antes de ser matados.

– el kampo 2 ande los ke van a ser matados tyenen de desnudarse i dar sus kozas de valuta

– separado del kampo 2 por un kamino yamado schlauch, el kampo 3 ke es el lugar ande se mata la djente, despues de pasar andel berber. En el kampo 3 se topan las kamaretas de gaz. Ay tres kamaretas maskadas en duchas, kada una de 4 metros sovre 4, ke pueden akojer unas 160 personas (10 por metro kuadrado) .El gaz no es el zyklon B komo en Auschwitz. Es el gaz vinyendo de un motor de tank russo T 34. La djente se muere en diez minutos.

Konosemos los nombres de los komandantes, el del kampo en jeneral komo el del kampo 3 en partikolar, i lo ke les afito despues. Vas avlaré de eyos al kavo de la emisyon.

A sus yegada al kampo, un SS apasigua a los djudyos, dizyendoles ke despues del banyo van a resivir atras sus kozas, i ke despues van a ser embiyados en Ukranya para bivir i lavorar. I a los vyejos i hazinos, les dizen ke seran yevados al ospital. A un buro ande esta eskrito “kasha”, se les da un resivo para las paras tomadas, i a la entrada de las kamaretas de gaz ay eskrito “banyos”.

Entre mayo i djulyo 1942, yega en jeneral un treno de 20 vagones al diya (entre 2.200 i 2.500 deportados). Todos no son matados pishin. Son eskojidos unos kuantos lavoradores.

El 19 de djulyo 1942, Himmler da el orden de matar a todos los djudyos de los ghettos de Polonya antes del kavo del anyo. Esto ovliga de ir mas presyo i de tres, las kamaretas de gaz pasan a sesh en Sobibor. Pueden matar a 1.200 personas a la vez. Esto va turar asta el enverano 1943.

Ama desde el enverano 1942, Himmler da el orden de eskonder toda trasa de las matansinas, i por esto kale kemar los puerpos ke eran solo enterrados. I esto es lo ke se va azer, no en ornos komo en Auschwitz, ama al ayre. La golor de karne kemada fyede de muy leshos.

Al kavo de desyembre 1942, el kampo de Sobibor resive los ultimos deportados venidos de Belzec, ke se syerra despues de tener matado a unos 430.000 djudyos. A sus yegada en Sobibor, los de Belzec, savyendo muy byen ke no ay dinguna aftaha, se solevantan pishin en salyendo del treno, i son matados aya. Kuando los deportados de Sobibor lavoran sovre sus pijamas, topan eskondidos papelikos dizyendo: “Somos de Belzec, vengadmos!”

Los de Sobibor ya kyeren muncho, ama komo azer? No es ke los nazis sean tantos: solo unos 30 SS, i unos 100 Ukranyanos. Los SS tyenen armas otomatikas. Los Ukranyanos no tyenen mas armas otomatikas (los SS se espantan ke se syervan kontra eyos), solo armas mas livyanas.

Ama el kampo es entero enserrado por paredes o barbelados elektrikos, i despues el kampo es arrodeado de foyas yenas de agua i despues el suelo es yeno de minas. I despues no ay nada, sino arvoles muncho mas leshos. De los miradores, los nazis pueden travar muy kolay sovre el ke aprova de fuir.

Yene 5 deportados van a reushir a eskabuirse de un waldkomando, el 27 de julyo 1943, i a sovresalirsen. Komo izyeron? Asigun lo ke entendi, salyeron del kampo para un lavoro afuera, basho la guardya de un Ukranyano ke mataron.

A parte de estos sinko, a poko a poko los deportados de Sobibor se ambezan, por los ke ayegan, de las rebueltas de djudyos: la de janvier i despues, sovre todo, de avril 1943, en el Ghetto de Varsovia, i tambyen la rebuelta del 2 de agosto en el kampo de Treblinka (un diya tendré de azer una emisyon sovre esta rebuelta). Los de Sobibor kyeren azer komo los de Treblinka. Ama komo? Se toman un kapo, Leon Feldhendler, ijo de haham i kapo del Judenrat de su sivdadika Zolkiewka. Toma la kavesa de un grupo dechidado de aprovar una rebuelta segida de una fuyida. Ama Feldhendler no reushe a fraguar un plano ke pueda kaminar. En primero, pensa a entosigar guardyas ukranyanos i tomarles sus armas, ama los almanes se ambezan la koza i matan a sinko deportados por pizma. Despues pensa a meter el fuego al kampo, ama ve ke este plano no es kolay de azer. Ama ayega, en septyembre 1943, el ombre ke teniyan menester: se yama Alexander (dicho Sacha) Pechersky, ke dainda yeva su uniforme de lugartenyente en la armada kolorada. Kaido en una aselada, a sido echo prezonero de gerra, ama despues embiyado a Sobibor kuando los Almanes se apersivyeron ke es djudyo. Este Sacha va ayudar a Feldhender kon su savidurya militar, i esta vez van a tomar en djuntos un plano ke van a egzekutar.

Ya saven ke si no azen nada, todos van a ser matados. An sido testigos del asasinato de los otros, i saven ke los almanes van a serrar el kampo sin deshar dingun testigo bivyente. Kaler fuir antes, kual ke sea la sekana. De toda manera, no azer es mas sekanozo ke azer.

Ama kualo azer? En primero tomar armas: los ke lavoran en los atelyes tyenen de arrovar unos kuantos kuchiyos i baltas. Lo ke reushen de azer. Despues estas armas son espartidas entre los ke tyenen de matar a unos kuantos SS. Kuando? El 14 de oktovre 1943. Salvo ke, djusto este diya, el komandante del kampo 3, el kampo de las kamaretas de gaz, Erich Bauer, sale del kampo para ir a Chelm a merkar kozas. Halbuki, Bauer es el ke los deportados, kon muncha razon, keriyan matar en primero.

Yene empesan la rebuelta. Komo? Los shastres ke visten a estos SS los yaman uno por uno para un aprovamyento. El SS entra armado en el atelye del shastre. Aya lo asperan los matadores kon baltas, matan al SS i le toman sus armas. Lo azen munchas vezes en sira, antes ke los SS se apersiven ke los otros dezaparesyeron. Ama Bauer abolta de Chelm i se apersive ke el SS Rudolph Beckmann a sido matado, i pishin trava sovre los dos prezoneros ke estavan deskargando su kamyon. Oyendo esto, Pechersky entyende ke no kale mas asperar. Una vez ke mataron a unos kuantos SS i les tomaron sus armas, unos 300 deportados atakan en djuntos a los guardyas Ukranyanos i kortan los barbelados, ke saven so ser elektrifyados por esta vanda. I es la fuyida de estos 300 deportados en djuntos. Los Ukranyanos i los SS travan. Los poveretos de deportados saltan sovre las minas. 80 son matados. Yene munchos ayegan a los arvoles de las sharras, ama los Almanes los bushkan kon perros, i unos 170 son aferrados i matados, komo lo son los ke kedaron en el kampo. Yene van a ser 42 ke se salvan, entre los kuales los dos kapos Feldhendler i Pechersky. Lo mas de eyos entran en grupos de partezanes i kontinuan una lucha armada kontra los Almanes i sus amigos.

Kuando Himmler se ambeza este negro haber, se arravya muncho. Mueve SS i dos ukranyanos an pedrido la vida en esta rebuelta. Es poko si se kompara a los mas o menos 200.000 deportados matados aya, en muy grande mayoriya djudyos. Himmler da el orden de serrar el kampo i de eskonder todas las trasas de su egzistensya. Sembran arvoles ensima de la tyerra ande estava el kampo.

Por lo ke es de Feldhendler, se fue a eskonderse en Lublin, i aya fue liberado el 24 de julyo 1944 por la yegada de los Rusos. Lo vemos en una foto, kon otros sovrebivyentes de Sobibor. I por tanto, el povereto no va bibir muncho. El 2 de avril 1945, es firido a muerte por un kurshum travado a traves de la puerta de su kaza. Se va astal ospital ande muere kuatro diyas despues. Kyen travo? No se save byen. En primero se disho ke eran nasyonalistos polakos antisemites; despues se disho ke eran bandidos ke keriyan arrovarlo.

En kuanto a Pechersky, el despues de ayegar a las sharras de Byelorusiya, se adjunto a un grupo de partezanes. Su lavoro es de meter bombas debasho de trenos militares. En 1944 ayegan los rusos, i, tresalido, Pechersky se va para entrar de muevo en la armada kolorada, i aya las kozas no se pasan komo lo pensava: se ve akuzado de traisyon, porke se desho azer prezonero bivo de los almanes. Es embiyado en un batayon disiplinaryo “para lavar kon su sangre la traisyon de la patria”. Esto dicho, va kontinuar la gerra, luchando kon koraje en este batayon, i va suvir de grado i eskapar la gerra komo kapitan.

En Unyon sovyetika Pechersky va ser persegido komo kosmopolito (kale entender djudyo) i asta la muerte de Stalin en 1953, le va ser muy yuch de topar lavoro. Despues va topar un lavoro de ovrero en una fabrika de Rostov, su sivdad de nasimyento, ande va morir deskonosido en 1990 a la edad de 81.

Antes de eskapar esta emisyon, me keda de dizirvos lo ke afito a los kriminales. Ya savesh ke Hitler i Himmler se mataron de si para si en 1945, i ke Heydrich ya aviya sido matado en 1942.

Odilo Globocnik, kapo de la Organizasyon Reinhard, aferrado por los Inglezes, se mato en mayo 1945.

Franz Stangl, komandante jeneral del kampo de Sobibor, antes de ser el de Treblinka, fue aferrado en mayo 1945 komo SS por los amerikanos, ke lo meten en un kampo en Glasenbach. En 1947 los amerikanos lo entregan a los austriakos para ser djuzgado, no por Sobibor i Treblinka, ama por la matansa de los lokos. Lo meten en un prezo avyerto, i por siguro se fuye de aya, se va en Italya, aya un ovispo, Alois Hudal, el ke ayudo a Eichmann, le da papeles para fuir en Syria, ande se va kon mujer i kriaturas asta 1951, i de aya se va al Brazil, ande keda asta 1967, asta ke la polisiya brazilyana lo aferre i lo entrege a los almanes ke lo djuzgan i lo kondenan en 1970 a la rekluzyon perpetuala. Aze appel kontra el djuzgamyento, ama se muere antes el sigundo djuzgamyento, en 1971.

Erich Bauer, komandante del kampo 3 de Sobibor, el kampo kon las kamaretas de gaz, va ser aferrado en Austria por los Amerikanos ke lo meten en un kampo de prezoneros, i lo liberan en 1946. Bauer abolta en Berlin ande topa lavoro.

Ama en 1949 se topa kara kon kara kon dos sovrebivyentes de Sobibor, dos de los 42 sovrebivyentes del 14 de oktovre 1943. “Komo se aze ke estesh dainda bivos?” es lo ke topa solo de dizir. Es aferrado i el anyo despues, en 1950, empesa su djusgamyento por los almanes. El dize ke es inosente de todo, solo kondusiya kamyones. Vyenen kuatro testigos djudyos sovrebivyentes ke kontan kon ke krueldad matava a los deportados, no solo por gaz ama de todas maneras. Es kondenado a muerte, ama la ley almana eskapa la pena de muerte (pekado…) i su pena es trokada en prezo perpetuala. Se muryo en prezo en 1980, trenta anyos mas despues.

Aki me tengo de kedar, i vos digo, no al djueves ke vyene porke, komo vos dishe, va ser una redifuzyon, ama en kinze diyas, si kyere el Dyo!