Bleus, vedres, pretos….
Los ojos !
Espejos de l’alma,
de los sentimentos,
para ver, ver mas,
i ver mas aya
ver el mundo ke bivimos,
sus ermozuras, muestros keridos
kon miles de ojos grandes avyertos,
para entender i tender muestras manos
a muestros ermanos i a los etranjeros
komprender la vida basho los sielos
este maraviyozo regalo del abastado
i bendizir kada diya su ovra
alavar su nombre santo i su glorya….
Bleus, vedres, pretos….
