Parte I
Es Posivle De “Ir” I “Tornar”?
Oy vos kero kontar una historya ke me paso por la kavesa i fina oy en diya no se si me afito en vida o entre esuenyos porke es muy difisil de kreyerla… Son kozas ke se oyen ma nunka se save si es vedra o si es posivle ke seyan verdad, tan imposivle mos vienen…
Antes de kontarvos lo ke me paso a mi, kijyera kontarvos lo ke mi padre me konto…
El anyo 1981….Aviya 3 anyos ke yo biviya en Israel. Mi padre estava refuzando de vinir a morar kon mi… Le estava rogando siempre, kon buenas, kon ravyas, kon lagrimas…Sin efekto ! El ke disho “NO” fue NO !
Adorava mi madre i lo “bolo” dospues ke la peryimos el i yo… M’estava dizyendo ke era imposivle ke la “deshara sola aki “! (Mi mamita se fue al Gan Eden en Janvier 1968 !!!!) Le aparejava la “chemise de nuit “metiya la meza para dos personas eya i el i 3 personas kuando yo estava en kaza…De fuyir lo por mivida ma asi era ! Esto a parte…todo estava klaro i bueno en
su miente. Estava arrondjando la realitad de la muerte de mi madre.
Me konto ke un dia se fue a vijitar un kliente suyo en la parte Asiatika de Istanbul i estava tornando a kaza kon otobus en pasando por siguro del kupri (el ponte) del Bosphorus entre la mar Marmara i la mar Preta. Supito oyo un bruido muy fuerte i avriyo los ojos en el hospital Etfal de Shishli.
Kuando me disho esto kreyi ke me estava ezmayando tanto me espanti i me meti otra vez a rogar lo de tornar kon mi a Israel, ke lo tengo de menester etc… Nada izo hayre ! No lo estava puediyendo konvenser. Ke iva ser kon mi madre ? Le dishe ke la vamos a trayer kon mozotros nada ! Disho ke no puede vinir i punto ! Alora empeso a kontar me kualo afito antes ke avre los ojos en el hospital. Se muryo ! Se vido a parte de su puerpo i munchas personas ensima de su kavesa, No les estava puediyendo dizir ke no estava aya….
Vido una luz divina mas klara de la luz del sol ma ke no estava ensiegando, de una ermozura maraviyoza kon una muzika tan bella ke ni se puediya aserkar de lo ke aviya oyido fina este momento.
Vido tres viejos ke eran komo mansevos, vistidos de blanko ke lo estavan arrondjando de leshos kon las manos dizyendo su nombre i el nombre de su padre. “Va-te, no te keremos, tu momento no vino.” i dezaparesyeron. Mi padre keriya yegar a esta luz 
ma avriyo sus ojos en lagrimas en el Hospital….
Me estava mareyando del espanto….No saviya ke pensar. Mi padre nunka avlo mintiras… NUNKA. De una manera saviya ke esta istorya era vedra…LO SAVIYA i punto. Le rogi mas i mas ke venga kon mi, no izo hayre. Mi padre MURYO i TORNO ATRAS…. Todos las kolores estavan pasanda delantre de mis ojos…Me esfuersi para no ezmayarme i kedar fuerte.
PARTE II
LA MUERTE DE MI PADRE I HOLLAND
Empesi por kontarvos lo ke le afito a mi padre antes de kontarvos lo ke me paso a mi ! Era por dizirvos kuanto kuryozo i inkreivle pueden ser las kozas …..i estos mos azen pensar, dar una idea, kalmarmos o darmos un espanto inkontrolavle…. Mi papa se muryo en 1985… Kuando estava kantando los Tehilim a boz alta. Kuando le disheron ke esto estava deranjando los otros (estava en una kaza de rehabilitasyon), les arespondyo ke los Tehilim se kantan de esta manera i ke esta arrogando a su Di-o de tomarlo de “aki”. Teniya diabet i malorozamente se aviya ensyegado. Akeya semana el doktor me aviya dicho ke kaliya amputar su pie i yo me estava aparejando a dizir NO ! El no lo saviya…Lo “sintyo” i no kijo dar me la amargura de la desizyon! Se “bolo” komo un anjelito sin pena kon el nombre del Di-o en su boka a boz alta….
Mozotros todos ke bivemos kon sanedad fin a la “fin” i no konoseremos oras pretas, dolores insuportavles, espantos, Amen…..
*
En 1991…..Ize un viaje de dos semanas a Hollanda i a Beljika antes de irme a la Inglaterra para ver a mi ijo ke era estudiente en akeya epoka. Ize un viaje maraviyozo porke lo aviya planeado paso a paso durante el invierno en Israel. Tomi el avion el 15 de Mayo porke penso ke es la mijor epoka de vijitar la Europa.
Amsterdam se aviya metido su manto de primavera para saludarme a brasos aviertos. Nunka de mi vida vide tantas flores de kolores tan diversas enjuntas…
Era un mundo enkantador i yo me lo estava gozando kon una soriza konstante en la karika i la djente deviyan tomarme por una bova o una ke se riye de si para si !… No uvo kalejika ke no entri o kanal ke no me aserki. Un dia tomi un otobus ke deviya azermos vijitar los lugares enteresantes afuera de Amsterdam, komo la guerta de las miniaturas de los palasyos, todos los monumentos, el stadium, el aeropuerto, la estasyon de trenos, el merkado de kezos de Volendam, Merkem i sus kazikas de una kamareta, la bursa de las flores, Roterdam, Delf i la famoza fabrika de porselena, los molinos, las fabrikas de los “sabots” i mas i mas…..
Estava feliz i kon keyf… No teniya de menester de dingunos para romper me el plazer kon konversasyones sin gusto o stupidas o ganas diferentes de las mias, angustyas ke no keriya saver de eyos…..
Sharopiko i yo somos las mijores amigas del mundo ! Me entyende, me kere bien, me aregala, me aze riyir, es enkantadora para mi! (Kon los otros ke aze no se !!!) Envezes le da ganas de kozas muy difisil a realizar o yerros fatales en la vida ma ansina, en viajes etc…No ay komo eya ! Afita, por seguro, ke mos peleyamos de negra manera. Es tan imprediktivle… tengo difikultades a alkansarla i korrer detras de eya !
PARTE III
PASEANDO EN HOLLANDA
El tiempo estava maraviyozo… Justo komo la persona se siente lo mijor ke puedeser ! Ni kayente ni demasyado fresko ! Puedeser ke la soriza en mi karika estava un poko mas ancha, no se, ma me vino una mujerika i se asento al lado de mi en el otobus…En el primer rango a la derecha… El mijor lugar…Yo estava pensando ke dingunos se van a asentar i vo gozar el dia entero….
Me dyo la mano i me disho en inglez ” Me yamo Renate. Vo ser tu kompanyera de viaje i te suheto muncho plazer..” Ya me estava tresalyendo de tener una almana a mi lado ! Mi soriza se fue al diavlo i le suheti de manyera muy yelada “buen viaje !” El otobus no estava inchido kompletamente i aviya lugares por detras ma a mi me plaze el primer rango para ver del djam (Ventana) kualo ay en frente. Kuando empesimos a ir otra vez me disho “Saves…Tengo un ijo en Inglaterra ke estudya medisina. Me tomi unos kuantos dias de konje antes de ir a verlo ! ” La kedi mirando. Estava eskrito koza en mi frente ? No dishe nada.
Vinimos a unos de los lugares ke teniyamos de ver i la topo allado de mi ! Mirando a una vitrina de djoyas-suvenir… “Me ayudas a eskojer un Magen-David aki ? “Si…” Parese ke es djudiya… I las dos metemos la mano en el mizmo Magen David entre puedeser 100 deyos ke mos kitaron ! Bueno !
Me dize ke bive en Israel… Ke avla Fransez i ke su madre era Judia Turka i le avlava siempre en Judeo-Espanyol i en Turko…. Me kita una foto de su chikes i DI-o Santo ! Asemeja su padre al mio ! No es el ma paresen komo dos ermanos ! Empeso a sintir me desreposada de todo esto…
“Renate.. Mos konosemos ? Kero dizir antes de este viaje. Saviyas ken so yo o ansina una koza?
“No. Ma kuando te vide en el otobus una koza me empusho a asentarme allado de ti. Mi lugar era tres rangos detras.”
Porselenas de Delft
Vinimos a la fabrika de Delf. La tengo allado otra vez.
“Me vo ir una semana a Beljika dospues de este viaje”
me dize. Empeso yo a tremblar !
Yo esto tomando fotos…. Eya no tiene makina.. Le digo “Si keres te tomo en fotos i los mando a tu adreso” Me responde “No.. No me plazen fotos” Ma uno ke mos estava siempre mirando i suivando (no se ken de las dos le plazyo o todas las dos porke Renata teniya mas o menos mi edad, los mizmos kaveyos blondos largos i muncha asemejensa en la kara) mos saludo i mos demando si lo puedemos tomar en foto en su makina. Lo travi i le di la makina miya para ke mos travara a Renate i a mi. Renate se kijo fuyir ma no la deshi i le tomi la mano. Akel momento el ombre (Dospues supe su nombre i todo porke era de Israel) mos travo a mozotros…
Teniya un apretamiyento de korason…Kuando Renate estava mirando las porselenas mas aya, la tomi otra vez en foto i otra vez d’espalda dospues…
” Renate.., le dishe, saves ke todo lo ke me dishites sovre ti korresponde a mi vida, fina el detalyo el mas chiko ? ”
“Si ? No lo puedo saver porke tu no me kontas nada” me arrespondyo.
PARTE IV
HARABI MALLAH ZURZUVI
Muestro viaje kontinuo i yegimos a Hollanda en Miniatura. Fotos de muevo… Se izo kayinte i estava pensando de merkar una dondurma (glida, glace, ice-cream) i darle una a eya… Bolto la kavesa i la veygo kon dos dondurmas en la mano vinyendo a mi lado…. Miri los sielos para demandar a “Harabi Mallah Zurzuvi” si teniya ganas de djugar kon mi o si le ize pizmaz fina oy!! Le dishe “mersi ! ” i mas nada.
En Rotterdam estavamos kaminando endjuntas… Le iva demandar ande mora ke a la mizma segunda me demando ande moro yo ! La kedi mirando…..Se lo dishe….Eya morava en Tel-Aviv ! Grasyas al Di-o una koza de benadam i no de “los mijores de mozotros !” Djusto kuando estava pensando ansina me dize “mijor de tomar el treno para Bruxelles, para kualo ir kon otobus. No ?” Ni me akodro kualo le dishe….Puedeser nada porke teniya la palavra tomada…El bilyeto del otobus de la manyana para Bruxelles lo teniya en la chanta….(mi bolsa)
En la kaya en kaminando me disho ke paso un diya muy agreavle en mi kompaniya i supito me bezo…. Ma no senti su bezo kuryozo. Estava mirando a un magazen de jugetes ke me namoro. Me peryo yo kuando miro a los jugetes… No se kuanto tiempo paso ma kuando kije tornar al otobus no estava a mi lado…. Me dishe ke se fue a l’otobus… Kuando vine a mi lugar no estava. Le demandi al shofor si vido mi kompanyera me kedo mirando.
Me fui al lado del hombre ke mos estava mirando i le demandi si la vido a Renate ? Me demando ken es Renate. Le dishe ke es mi kompanyera i ke mos travo en foto endjuntas… Me kedo mirando !
Lo iva bolar…. Me estava sintyendo mal kon ganas de gomitar… Tomi la chanta para kitar un bonbon de menta, vide ke mi portofolyo estava avierto. Miri nada no mankava. Solo el bilyeto de otobus de la demanyana para Bruxelles. No tuve safek ke es eya ke lo tomo !
Dingunos no se akodraron de eya en el otobus… No la viyeron i no saviyan ken era ! Les demandi si no me oyeron avlar afilu sola ? Me disheron ke estava durmyendo en el kamino.
Di-o mio ! me aviya enlokesida ????
PARTE V –
KEN ES RENATE ?
Kuando tornimos a Amsterdam ya estavan las 10 de la noche. El otobus mos desho al lado de la estasyon de trenos i no ande mos aviya tomado. Le demandi porke i el shofor me disho ke tomo el orden de la kompaniya de desharmos en esta estasyon…. Yo me estava riyendo… Por siguro ke me tomariya por loka. Ke me sale ! Yo lo estava fuyendo por vedra ma saviya ke los ke lo fuyen no se dan kuenta o es ansina no darse kuenta ?
Entri aryento de la estasyon i tomi un bilyeto para la manyana a Bruxelles… Kada momento me estava tornando para ver si aviya alguno detras de mi. Una Renate, un Renato, un zurzuvi ?
Nada… Dingunos… Bueno !
Torni al hotel sudando i no ke estava kaynte tanto. Tomi un banyo i empesi a avlar “le”…..
“Porke me izites esto… ? Yo so una mujerika simple… M’espanto !… Koza ke no m’inche lo ke pensaron de mi, ke me tomen por loka de atar…No es importante… Ma yo ?…Komo vo bivir agora kon esto he ? Ken eras ? O….Es vedra ke lo enventi en mi miente i nunka fuites a mi lado avalando kon mi ? Ma eksplikame ! Komo es ke tengo el korolado de la dondurma en mi rida dospues ke me alimpyi los mushos i yo NO MERKI DONDURMA ! Puedo kontar las paras… Ande mi ya saves.. Tengo el kuento del grosh kuando esto en viaje ! I mira el kuento…. Aviya merkado antiyer el bilyeto del otobus para Bruxelles… Lo tengo eskrito… Esto no me lo efasates…. Ma me “rovates” el bilyeto o lo “tomates”. Ke importa…. No es ke te kero ensultar. Entyendo ke kijites ke me vayga kon treno porke ya me lo dishites…Ya me merki el bilyeto del treno… Estas kontente ?
Una kayntor paso por mi puerpo i mas nada.
Tres dias dospues estavan dando en las novitades ke un otobus se chafteyo kon un TIR (grande kamyon internasyonal de transportes) indose a Bruxelles i se kayo en un ravino. No uvo ken se salvo ! El shofor del TIR estava muerto tambien. Parese ke se aviya durmido 
….
En Beljika kuando tomi las fotos ke aviya dado a developar ayi, Renate no estava en dinguna de mis fotos… La foto ke travi kuando estava dando l’espalda salyo totalmente blanka kon un poko de grizo al kanton….
KEN ERA RENATE ?
KE PENSASH VOZOTROS DE TODO ESTO ?
