La verdad es ke por seguro meldi kozas asemejantes en munchos lugares, komo munchos de mozotros, ma penso ke es siempre pozitivo de tener en tino lo ke mos puede adelantar, azermos mas felis, darmos mas alegriya de bivir sin olvidar los buenos efektos ke se pueden notar sovre muestra salud.
Kuando empesi a eskrivir este artikolo no pensi del todo a publikarlo en los jurnales o en los foros ma azer una lista de lo ke seriya bueno i pozitivo para mi-mizma i tenerlo en frente de mis ojos para no olvidarmelos!… Simplamente para gozar mas de la vida ! Saver es bueno… Savemos munchas kozas ma pasar de la teoriya a la praktika es otra koza!
Para azer un lista kale romperse la kavesa ! Pensar en todas las direksyones… No se a ke punto puide meter las kozas importantes en sira ma kreyo ke no es la sira ke es importante ma lo ke tenemos de akodrarmos !
Dospues ke eskrivi lo ke el pezgo de los anyos me kargo i los ambezos de todos los ke trataron de inchir mis 5 gramos de meoyo, vide ke atyoooooo (!) esto puedriya interesar mis amigos tambien ! Persona asemeja a persona dizen ! I si yo me konsidero una persona, es ke las otras personas me asemejan ! Dunke… Si es bueno para mi es bueno para los otros !
I es ansina ke desidi de prezentarvos mi lista, medya bavajada i medya sezuda ! Diremos mas sezuda ke bavajada… Ma esto es vozotros ke lo vash a juzgar…
BIVIR DENTRO UN SERKLO AL DEREDOR
Ay munchas personas ke trasan un serklo imajinaryo en sus deredor i biven al interyor! Komo una prizyon spiritual! Dezgrasya. Ke es esto? Este serklo reprezenta las leyes ke mozotros mizmos mos metemos porke fuimos enfluensados por tales o otros faktores!
La famiya, los vizinos, los amigos, la eskola, el echo…. Komo, si aziyamos kozas ke no son permetidas por las leyes a las kualas mos atimos kon kadenas (!) seriya una katastrofa! Los biervos de esta manera de komportamiento son :
” No ay deke! Ansina es i punto!”
“No me demandes… Ansina me disheron!”
“…i kualo el mundo va dizir? ”
“Atyo! Te estan mirando!”
“Va demandele a tu madre!”
“Lo ke vide en mi kaza ago!”
“Ansina mos ambezaron!”
“Esto no se aze!”
“Ke manera de komporto es esto!”
“No te van a akseptar en dingun lugar !”
“Ansina se avla ?” “Ke verguensa!” ets ets…
Mos sintimos esklavos de lo ke mos enklavaron en la kavesa, por seguro pensando edukarmos i para muestro bien. En realitad mos rovaron muestra personalitad, muestra libertad, i lo ke devemos desidir por mozotros mizmo si es bueno o mal… Si se deve o no…. Si devemos ekspresarmos o no, o mizmo, si keremos o no!
No es bueno de demandar mas de una komida ke mos eskudyan, kuando estamos en vijita… No se aze ! Deke ? Es verguensa! NO ! Yo penso ke es un komplimento para la ke preparo el plato…
No es bueno de kitar la jaketa en vijita ! Deke ? Ke se toste el benadam i le venga gongoshas ? No es bueno de dizir lo ke se pensa… Deke ? Guadrar sus ideyas es mijor ? Las mintiras para no frustrar uno son mijor ? Kedar kalma kuando los inyervos asuven a la kavesa es saludozo ? Dizir lo ke se kere i no se kere, azer lo ke trava la gana o gusta, salir, entrar, komer, durmir ets.. kuando asi se siente la persona, deke ke se konsidere komo un pekado ?Disiplina…
Fina ke grado ? Fina ke la persona se aze hazina de inyervos, o kompleksada o dependyente de los otros ! O…Rompe todas las kavenas i no se puede mas kontrolar ! El Di-o ke guadre !
BIVIR KON LO MANKO POSIVLE…
La felisitad no es kon lo ke tenemos ma kon komo mos sintimos! Mas kozas son mas tomar polvos, mas almaryos, mas lugar, mas poko espasyo en kaza i en la miente, mas gastar, mas lavorar, mas ladrones i espanto ke mos roven… Mas difikultad para trokar de morada o viajar largo tiempo, mas pezgo a los ojos i al korason… En realitad el noventa por sien de las kozas ke tenemos son demasyado i se akumularon kon los anyos… No los puedemos echar… Mos duele pormodo de los rekuerdos i lo mas por lo ke kostan ! “No es pekado ?” Estos muebles i trapos i kalderas i platos i kupas i mas i mas i mas kozas entosegan muestra vida….
No tenemos de bivir por la djente ma para mozotros! El ke viene a vermos no tiene menester de un salon sharonfonfon ma de una soriza i de un abraso kaynte. La kaza no es un muzeo ma un puerto d’abrigo!
AMOR-AMISTAD-KARINYO
Son la komida de la alma i del repozo de la miente.Es demonstrado ke sin estos la persona perye su salud fasilmente i se muere mas presto. Estos sentimentos de los mas importantes en muestra vida mantienen la manseves, el optimizmo, la energiya i el buen humor. Son las yaves de la felisitad i del bienestar.
RESPEKTO PARA TODOS I PARA SI MIZMO
Devemos respektar las personas para ke mos respekten mizmo si la kerensya es muncho mas importante ke el respekto. Aki se avla sovre todo del respekto a la natura en prezervandola para muestro interes i para muestros desendyentes a ken pasaremos la bandyera kuando la hora va sonar… Avlo del respekto a los animales ke Di-o mos dyo komo kompanyeros i no komo alimentos i esklavos… Mizmo si komemos unos de eyos… Les devemos respekto porke Di-o los kriyo mizmo antes de los humanos…
Komo mozotros nasen, sufren i mueren. Sus kondisyones para bivir son muy duras… Luchan siempre kon la ambre i la sed… Las hazinuras sin kuras o medikos, el friyo o la kayntor ke ezmaya.. Ademas el hombre es krual i los mata. Los bebes kedan guerfanos i se mueren kon sufriyensas horrivles, los ke se firyen tambien… Para kualo?
Lo mas por el plazer… Por la samara… Para el orgulyo en kontando las viktoryas ! Devemos respekto a los arvoles, a todas las plantas porke sin eyos no tenemos vida… I lo kuryozo ke puede pareser… Tienen una neshama!
ARREKOJER FUERSA
Kon egzersisyos i komida sana ! No fuimos kriyados para ser asentados ma para kaminar, korrer, lavorar fizikamente, nadar, saltar, asuvir i abashar. Tenemos de menester tambien de fuersa spiritual.
La fe, arrogar, adresarmos a Di-o, meditar, konsentrarse en si mizmo para topar el repozo, el kalmo i la pasyensya mos ata a la vida… Mos da fuersa para gozar de kada momento. La fruta i la verdura mos mantyenen mansevos.. La leche alarga muestros diyasi el pan mos arregla el puerpo. La agua alimpya los toksines … Es importante komo la sangre !
Una vida kon Di-o Arriva, sin stress, sin inyervos i pletos, espantos, injustisyas, una vida limpya yenna de kerensya i de buendad es todo lo ke tenemos de menester fina los 120!
