Esto es lo ke salyo dospues de tanto tiempo ke no eskriviya poemas….
Kuando lo meldi tuve friyos en la espalda…. So yo ke eskrivi todo esto ?
Kon karinyo
Sharope Blanco
El esuenyo yega
komo un regalo a mis ojos….
A ken avrire mi korason
i vazyare sus pezgos ?
Traduizire mis sufriensyas
i mis penas kon biervos ?
Mi korason bate
komo las olas ke chaftan a las rokas
Enterrarse en las kazas
es mas negro de estar en tombas
No tener por kompanyia
ke su propria kansada miente
Bever las lagrimas
del vino dulse ke te mira de enfrente
I aogar avagar avagar
el nombre ke se deryite…
So deskonosida en estos lugares,
de ande vengo ?
Bushko mis espasyos,
mi intimitad, lo dulse i lo amargo
Mis kantones goliendo el klaven,
el pimiento, la kanela i la menta
Las golores i las savores
de mis diyas de primavera
Oy esto enserrada, no tengo salida,
no tengo esperansa ni mizmo dezeyo
Prefero la oskuritad a la klaritad,
el grizo ke kovre todo
No me interesa la gloria..
No la kero ! Mi alma la rechessa !
Me yama el silensyo, las estreyas
i el vaziyo ke mos abrasa…
