Oy estava luvyozo,entri a una libreria,
Por meldar empresos y kitar el deskanso del dia.
Vide entrar una Senyora de grande elegansya
Ke haze olvidar al ombre la kanserya , la ansya.
Teniya kaminada de alguna artista famosa,
Eya era bien vistida y de kara muy hermosa.
Serka de mi meza metyo su bolso y sus gantes
Mismo sus chikos movimientos estavan elegantes.
En vezes echava una ojada muy fujitiva
Komo mujer kuryosa por saver lo ke yo hazia.
Teniya sonriza enrikisida en su mirada
Ke dava la dulsura de una persona estimada.
Yo un timido,kayado,sin mostrar una reaksyon
Ma era enflamado por krear una konversasyon.
Subito tomo sus kozas se aparejo por yirse,
Teniya el ayre de una ke keriya fuyirse.
Yo me sinti penozo,deskontente de su desizyon
Para mi fue komo un grande golpe de desilusion.
Su siya y su meza piedro el sol de mi alegria
Se amato el plazer ke me dava la libreria.
Mis miradas se entezaron en su meza y siya
Por iluzyonar su kuerpo y su fizionomiya.
En mis suenyos komo si fuera ke biviya kon eya
En su boka una rosa,en sus miradas senteya .
Un amor loko platoniko nasiya en mi vida,
Ke bueno iva ser si mi memorya la olvida.
Un amor platoniko
