Uno de los simbolos de la kultura turka es el “kafe turko” ke oy ya es konosido en el mundo entero. Ma, kon el dezvelopamiento de la gastronomia mundiala, de mizmo ke munchos platos de komida trokaron de savor a kavza de los muevos ingredientes ke les adjustan, en siertos lugares, el kafe turko tambien oy ya tiene otras savores.
Segun manaderos istorikos los granos de kafe yegaron al Imperio Otomano en el siglo 15, de Yemen. Tostados i molidos delgado, se transformaron en el kafe turko, ke oy bevemos kon grande plazer, grasias a la manera ke los turkos supieron uzarlo i “kozerlo” kon grande maestria, dando a este beveraje popular su savor tan delisioza.
En Turkia, el kafe es siempre servido akompanyado de un vazo de agua yelada, ke se beve antes de degustarlo.
Este kafe se deve kozer a lumbre muy basha, kon muncha pasensia, asta ke se forma ensima el “kaymak”, una espuma ke se desparte kon una kuchara a los findjanikos, i despues se adjusta el resto del kafe ke esta en el djezve (el atuendo en el kual se koze el kafe.).
El kafe turko tuvo i tiene asta oy dia un lugar importante al seno de los sefaradis tambien, i es servido en alegrias ansi komo en dias de dolio.
El primer kafe se bevia la demanyana, i kualo mijor ke bever un kafiko oras de tadre, al deskanso, kon un biskochiko dulse. Kuando vinian musafires a muestras kazas, en primer lugar eran adulsados i despues, sin demandar a dingunos kualo dezean bever, porke este era el uzo, se servia el kafe kon algo de dulse al lado. Kuando eskapavan de bever, a sorvikos chikos, teniendo en la mano siedra el platiko i en la otra el findjaniko de kafe, bendizian a la balabaya diziendole “kafes d’alegria”, siendo ke el kafe se sierve en dias de lutio tambien, aun ke entonses sin dingun akompanyamiento i es mas amargo.
En el pasado, en los dias yelados de invierno, en kazas ke tenian un ogar, (o “tandur”) muestras nonas metian el djezve de kovre sovre las brazas para aprontar el kafe de oras de tadre. Kuando las kreaturas demandavan a bever kafe, klaro ke no les davan, diziendoles ke si beven “pishan preto”.
Uno de los uzos muy populares era, despues ke se eskapava de bever el kafe, de aboltar el findjan sovre el platiko, asperar ke se yele enteramente i darlo en manos de una tia o vizina, ke savia deshifrar las figuras ke se formavan de la solada, i endivinar el mazal. Este uzo es muy popular oy dia tambien. Sea komo sea, ke bevamos siempre kafes d’alegria..