El MANSEVO no save ke es mansevo kuando es mansevo ! Por la simple razon ke no siente ke es posivle de estar otramente del estado ke se topa en akeya epoka. No va kerer ni pensarlo ! No es koza ke se aspera kon kuatro ojos komo la manseves kuando somos chikos ! Ah yegaremos a los 18 anyos ! Los 30 !! Los 40 ??? No ! Los 50 ? Barminnam.. I dospues de esto ya eskapo la vida !
Ve las kreaturas komo kreaturas i no lo enteresan. Los kere bien si son sovrinos o sovrinikas… Djuga i riye un poko kon eyos ma… nada mas.
Ve los aedados ke no lo enteresan tambien…Mas…Se alesha de eyos sin darse kuenta por olvidarse del fakto ke un dia va vinir i el tambien va ser komo eyos ! Se espanta de esto i para el es koza ke va okurir en mil anyos! Nunka puedeser…Munchas vezes tengo oyido de los mansevos :
”Bive kom’un loko i muerete mansevo “
No tiene la pasensya ni el tiyempo para peryer kon estas personas mas avagar en sus pasos, en sus penseryos i en sus desizyones.
No topa nada ke los aserke de el, solo si son granmamas i granpapas keridos, ademas si tienenla bolsika mas o menos yennizika !
Son raros los mansevos ke se interesan del tiempopasado i de lo ke los aedados tienen de kontar !Sus memoryas i lo ke es kerido por estos aedados no tienen sinyifikasyon para los mansevos.
Tengo visto munchas vezes ke el estado fiziko de la vejes, de las hazinuras i las restriksyonesde la edad avansada arondja los mansevos…Se olvidan ke los viejos tienen de menester de muncho karinyo i karesias ke mostran la amistad i el kerer. Komplimentos, respekto i dar este sentimiento ke les importa i ke siempre se pueden fiar a eyos, siempre seran prezente fina el momento d’alkavo…. serka, mano en la mano….Porke se tiene menester de muncho koraje para enfrentar la muerte i los dalkavos sufrimientos…
Se kontente de todos los otros kon ken lavora, estudya, sale, bive, toma plazer o se peleya, en kurto pasa la vida…I esto le parese ke va kontinuar sin fin…La vida parese muy larga kuando somos kreaturas i mansevos. Mas avansamos en edad i mas kurta mos asemeja la vida…
TODO LO KE EL MANSEVO AZE ES PARA LOGRAR 3 KOZAS I NADA MAS ! Por seguro ke ay eksepsiyones ma eksepyones kedan eksepsyones. El mansevo puede azer TODO para lograr, asegurar estas 3 kozas ke son :
1. El amor
2. El pueder ekonomiko
3. Los amigos
Su famiya, sus hobis, sus estudyos, su futuro, sus prensipyos vienen dospues. Su ordinador es el mijor instrumento para komunikar kon sus amigos, topar amor i arekojer muzika komo kuadro a este amor. La musika ke lo egzalta, lo emborracha, le da koraje, lo transforma en un estado romantiko o allegre o triste kuando ansina lo siente o lo enlokese de enerjiya i plazer de todos los tipos
La manseves es la flor de la vida. ” Si mansevo lo saviya i si vejes lo puediya …. ” es la famoza dicha en fransez…Ke pekado ke savemos su valor, komo kada koza, kuando lo piedremos i ke lo deshimos fuyir de muestras manos a vezes tan inkonsientes i de manera tan barata !
(Ayyyyy ke no me plaze eskrivir kozas seryozas i antipatik komo esto ! Kale de todo ! Ay personas enkeltual…hmmm antenkual…. Ke era esto ? Intelkual… si si, intelektual ke les plaze meldar aver pezgado ! Ma mas livyano de esto no se puediya eskrivir !)