Angel Pulido nasio en 1852 en Madrid en una famiya de kondisyon muy modesta, su padre i madre syendo venidos en Madrid desde Asturias para avrir una botikita de vinos en la kaye de las Infantas.
Ama este ijiko, sezudo i intelijente, izo estudyos de medikerya i salyo doktor.
Desdel empesijo se amostro komo un luchador para lo ke kreia. Su vida entera tuvo un karakter independyente i ideas liberas.
Sirvio en el partido liberal de Sagasta en los anyos 1880, i siendo tambien un gran syentifiko, Pulido entro en la Real Akademia de medikerya en 1884 (dunke a 32 anyos) i se izo Sekretaryo Perpetuo en 1912, a la edad de 60 anyos.
Komo ombre de medikerya, se okupo de adjensias sanitaryas, para luchar por la sanedad publika, en las sivdades i en los kampos, por la ijyena en los ospitales, kontra la malarya, la kolera, la malnutrisyon, i la tuberkuloz. Se okupo tambien de antropolojiya, jinekolojiya, i psikyatriya.
I su lucha va por la proteksyon de los flakos: syegos, hazinos del meoyo, kriyaturas abandonadas, mujeres prenyadas ke lavoran, ets.
Publika unos dos mil artikolos syentifikos en varyas revistas.
Es mas konosido komo ombre politiko ke komo mediko. Desde 1888 se okupa de munchos kargos publikos, i es elejido deputado, senador, i desde 1910 senador para vida. En el Governo fue nombrado Direktor Jeneral de Sanedad, de la Posta, subsekretaryo de Governo i kuatro vezes Vise-Prezidente del Senado. Ideolojikamente, se va amostrar liberal de ideas i va votar leyes penales mas blandas, i en favor de la liberasyon de la mujer.
Esto todo seriya bastante para ke mos interesemos en esta presona, ama su emportansa para el mundo sefaradi en jeneral esta en el atadijo entre Angel Pulido i el djudeo-espanyol, porke el izo un grande lavoro en su kampanya de aserkamyento i konosensya entre los djudyos sefaradis del mundo entero, yamados por el “espanyoles sin patria”, i el puevlo espanyol. El keriya reparar el yerro ke sus kompatriyotos aviyan echo en arondjando los sefaradis en 1492 i promover el ritorno de los djudyos a la Espanya.
Por dita kampanya el fue nombrado “Apostol de la kavza sefaradi”. Por siguro ke sin Angel Pulido, Miguel Primo de Ribera (ke no kale konfundir kon su ijo antisemito Jose Primo de Rivera) no uvyera kitado el Real Dekreto de 20 de desembre de 1924, rekonosyendo la nasyonalidad espanyola a los sefaradis ke la keriyan, en uzando byervos mismos del dekreto, a los “antiguos protegidos españoles o descendientes de éstos, y en general a individuos pertenecientes a familias de origen español que en alguna ocasión han sido inscritos en los Registros españoles.” Ama muy pokos fueron los djudyos ke demandaron a aprovecharsen de este dekreto i ke ansi, unos kuantos anyos mas despues, en las oras pretas de la okupasyon almana, esta nasyonalidad espanyola salvariya sus vidas. Ansi fue ke, por egzemplo, el diplomato espanyol Angel Sanz Briz (nombrado komo djusto entre las nasiones por Yad Vashem el 8 de oktobre de 1966) tomo en 1944 este dekreto komo fundamento juridiko para distribuyr la nasyonalidad espanyola a syenes de djudyos ungarezos sefaradis (i no sefaradis, porke su buto era salvar vidas) i por esto espanyoles.
Ama, komo es ke el Doktor Angel Pulido se entereso por los “espanyoles sin patria”? El Doktor Angel Pulido deskuvryo en primero el djudaismo, vijitando un kal en Berlin un diya de vyernes a la tadre, komo lo konto Martina Lemoine en radio Sefarad (17 de desembre de 2010, el enlase vos lo doy mas abasho para ke puedash sintir a Martina Lemoine avlando ensima el Doktor Pulido). Pulido admiro la ermozura no solo del kal, ama sovre todo de la liturjiya i de las bozes del hazan i de los koros de kriyaturas kantando teilim. Despues, en viajando Pulido deskuvryo tambyen la egzistensya de los sefaradís en el Imperyo Osmanli i sus atadijo a la lingua espanyola despues de tantos siglos de la ekspulsion de 1492 por los reyes katolikos.
En su livro “Espanyoles Sin Patria, La Raza Sefardí” Pulido mos konta las sirkonstansyas en las kualas enkontro, el 24 de agosto 1903 en un vaporiko sovre el Danubio entre Belgrado i Orsova, a Enrique Bejarano, direktor de una eskola djudiya espanyola de Bucarest, i su mujer. Pulido fue esmovido de ver su amor a la tyerra ispana, kuando Bejarano se abolta verso su mujer i Pulido lo oye dizirle: “Ves komo la Providensya …mos da la ventura de ir en este barko i konoser a estos senyores, ke son de Espanya, de muestra kerida madre patriya, i azermos sus amigos”.
El Doktor Pulido mos konta ke tuvo relasyones epistolares kon munchos djudeo-espanyoles al derredor del Mediterraneo, dainda estamos en el empesijo del venten syeklo, ande aviya djudeo-espanyol avlantes en todas partes, aun el djudeo-espanyol era komo una “lengua franka” para los djudyos del Imperyo Osmanli, los de Turkiya podyan ir a Gresya o a Bulgaria, los de Monastir podiyan vyajar a Rodes o a Yerushalayim, en kada sivdad, mezmo si no konosiyan la lengua del paiz, podian darsen a entender en djudeo-espanyol.
Angel Pulido kijo azer aboltar a los sefaradis a la Espanya ke los aviya echado. Komo fue oido por el puevlo espanyol? Los unos alavaron su eskopo i provaron de ayudarlo, espesialmente los politikos liberales i las figuras literaryas mas emportantes de la epoka, las kualas se interesan en el apoyo a la konservasyon de la lengua espanyola en las komunidades sefaradis. Entre eyos estavan Miguel de Unamuno, Menéndez Pidal, Emilio Pardo Bazán, Juan Valera, Pérez Galdós, Bretón, Camba i José de Echegaray. Otros, mas konservadores i antisemitas, lucharon kontra las ideas del Doktor Pulido, al grado de akuzarlo de tener sangre djudya en sus venas, tal komo lo avya echo la enkisizyon kon munchas presonas durante el tyempo ke duro, i se le impide tomar postos politikos mas altos en el governo de Espanya.
El Doktor Pulido, bushka el kompromiso de la “Real Academia de la Lengua” i la “Asociación de Escritores y Artistas”, i les demanda la kreasyon de eskolas i de premyos ke fomenten la lengua djudeo-espanyola. Durante el governo del rey Alfonso XIII (1886-1941) se krea la Unyon Ispano-Ebrea i la Kaza Universal de los Sefaradis komo instrumentos para el aserkamyento de Espanya i los sefaradis, se fraguan eskolas para ninyos sefaradis en Marruekos, se dan ayudas finansaryos para katedras de espanyol en los Balkanes i se krea en Madrid una katedra de Ebreo, ke okupa Abraham Yahuda.
Grasyas al material rekojido en las komunidades djudias ke vijito, prinsipalmente en Salonik, Pulido eskrive munchos artikolos en peryodikos i dos livros: “Los israelitas españoles y el idioma castellano” i “Españoles Sin Patria I La Raza Sefaradí”, ke mensyonimos un poko mas arriva i del kual meldaremos una parte kada kinze diyas, i avagar avagar lo eskaparemos de meldar.
Para eskapar, kale dizir ke ay i un Premio yamado Senador Angel Pulido, dado kada anyo por la “Federación de Comunidades Judías de España” desde el anyo 2005, el anyo ke se kumplyeron 100 anyos de la publikasion de “Españoles Sin Patria I La Raza Sefaradí”, kon el buto de “reconocer a personas o instituciones que se hayan destacado por su contribución al desarrollo de las comunidades judías en España y en el mundo hispánico, la defensa de la libertad de conciencia y el pluralismo religioso o su lucha contra el antisemitismo”.
Komo ya vos dishe, a la proksima vamos empesar a meldar “Españoles Sin Patria I La Raza Sefaradí”, malgrado ke esta eskrito en kastelyano, kreygo ke para los djudeo-espanyol avlantes no sera pezgado de meldar, por modo ke es plazer i no pena viajar al Imperyo Otomano al empesijo del venten syeklo i konoser komo bivyan muestros nonos en los Balkanes.
Semanada buena ke tengash, al vermos, si kere el Dyo!
Fredy Cauich Valerio de Meksiko
Fuentes:
Lisbona, José Antonio. Retorno a Sefarad, La política de España hacia sus judíos en el siglo XX. Comisión Nacional del Quincentenario del Descubrimiento, Comsión Nacional Judía Sefarad ’92, Riopiedras Ediciones, Barcelona, 1993.
Angel Pulido, Haïm Vidal Sephiha, Martine Lemoine. Emisyon de radyo en djudeo-espanyol del 1 novembre 2012 en Radio J, presentado por Edmond Cohen de Paris Fransya.
Martina Lemoine, El Dr. Pulido y el Judaísmo, Emisyon de radyo en kastelyano del 17 desembre 2010 en radiosefard.com
http://www.radiosefarad.com/joomla/index.php?option=com_content&view=article&id=7671:universfarad&catid=103:universfarad&Itemid=126
De Ángel Pulido, en el 110 aniversario de su “descubrimiento” de los sefardíes centroeuropeos, en eSefarad.com
http://esefarad.com/?p=44324
Niyego, Dora. Anjel Pulido Ferdinand i su bushkida por buenas relasiones entre los Espanyoles i los Sefaradis, en salom.com.tr
http://www.salom.com.tr/newsdetails.asp?id=66304#.UldIolBi39N
Sitio web de la Federación de Comunidades Judías de España
http://www.fcje.org/index.php?option=com_content&view=article&id=58&Itemid=26
La bandera de España en Budapest en yadvashe.org en kastelyano
http://www.yadvashem.org/yv/es/righteous/stories/sanz-briz.asp
Letra del redaktor, Moshe Shaul. Aki-Yerushalayim, revista kulturala djudeo-espanyola, numero 93, avril 2013, version elektronika
http://www.aki-yerushalayim.co.il/ay/093/093_00_letra.htm
La imajen fue tomada de esefarad.com